Kegeyli tumani 11-sonli maktabgacha taʼlim tashkiloti binosi foydalanishga topshirildi. Mazkur tashkilot 2022-yilning fevral oyida kapital taʼmirdan chiqarilgan, 300 oʻringa moʻljallangan. Shuningdek, Qoraqalpogʻiston Respublikasi Kegeyli tumani «Kok Oʻzek» ovul fuqarolar yigʻini aholisi uchun yana bir qulay sharoit yaratilmoqda. Ushbu mahallada yashovchi aholi farzandlari uchun avvaldan bogʻcha mavjud boʻlmagan.   Ular uchun qulay sharoitlar yaratish maqsadida ushbu mahallada Asaka tumani hokimligi va tuman maktabgacha taʼlim boʻlimi tomonidan 50 oʻringa moʻljallangan xususiy maktabgacha taʼlim tashkiloti tashkil etildi.

Qashqadaryo viloyati Qamashi tumanida bir kunning oʻzida 3 ta maktabgacha taʼlim dargohi faoliyat boshladi. Buning natijasida yana 300 nafar bolajonlar maktabgacha taʼlimga qamrab olindi. Jumladan, “Balandchayla” MFYda 150 oʻringa moʻljallangan 23-DMTT, “Toʻqboy” MFYda esa Nilufar Sanayeva rahbarligidagi 100 oʻrinli xususiy va «Savsantepa» MFYda Iroda Mengaliyeva tashabbusi bilan 50 oʻringa moʻljallangan oilaviy bolalar bogʻchasi faoliyat boshladi. Shu bilan birga Surxondaryo viloyati ham 4 ta maktabgacha taʻlim tashkiloti ochildi. Oltinsoy tumani “Oqarbuloq” mahallasida 90 oʻrinli yengil konstruksiya asosida qurilgan 25-sonli davlat maktabgacha taʼlim tashkiloti bolajonlarga oʻz eshigini ochdi. Ushbu tashkilotga hududdagi 24 nafardan ortiq pedagog va ishchi xodimlar ishga qabul qilindi. Shundan 2 nafar xodim “Ayollar daftari”da hamda 1 nafar xodim “Yoshlar daftari”da roʻyxatda turuvchi fuqarolardir. Viloyatdagi Boysun tumanning olis va togʻli hududida zamon talablariga mos maktabgacha taʼlim tashkiloti faoliyat boshladi. Boysun tuman markazidan 15 km olisda joylashgan “Toʻda” mahallasida 90 oʻrinli yengil konstruksiya asosida qurilgan 15-sonli davlat maktabgacha taʼlim tashkilotining oʻz faoliyatini boshladi. Ushbu tashkilotga hududdagi 25 nafardan ortiq pedagog va ishchi xodimlar ishga qabul qilindi. Shundan 6 nafar xodim “Ayollar daftari”da roʻyxatda turuvchi fuqarolardir. Surxondaryo viloyati Qiziriq tumani “Bogʻiston” mahallasida 50 oʻrinli 56-sonli oilaviy nodavlat maktabgacha taʻlim tashkiloti oʻz faoliyatini boshladi. Sherobod tumani “Chuqurkoʻl” mahallasida 90 oʻrinli yengil konstruksiya asosida qurilgan 38-sonli davlat maktabgacha taʼlim tashkilotining ochildi.   Ushbu tashkilot mahalliy byudjet mablagʻlari hisobidan yangidan qurildi. Bundan tashqari, aholi bandligini taʼminlash maqsadida, ushbu tashkilotga hududdagi 17 nafar pedagog va ishchi xodimlar ishga qabul qilindi. Shundan 2 nafar xodim “Ayollar daftari”da roʻyxatda turuvchi fuqarolardir. Shuningdek, Sirdaryo viloyati Mirzaobod tumanida bir kunda 3 ta davlat maktabgacha taʼlim tashkilotlarining yangi binolari foydalanishga topshirildi. Tumanning “Mirzo Ulugʻbek” mahallasida 150 oʻrinli 16-sonli davlat maktabgacha taʼlim tashkiloti investitsiya dasturi asosida 5 mlrd 700 mln soʻm mablagʻ evaziga yangitdan bunyod etildi. T.Axmedov mahallasida “Obod qishloq” dasturi bilan 150 oʻrinli 13-sonli davlat maktabgacha taʼlim tashkilotiga 4mlrd 300mln soʻm mablagʻ sarflandi. Tumanning “Navbahor” mahallasida joylashgan 20-sonli davlat maktabgacha taʼlim tashkiloti esa homiylik asosida qurilgan boʻlib, 7 mlrd mablagʻ evaziga 100 nafar bolajonni oʻz bagʻriga oldi.

Oʻzbekiston Respublikasi Prezidentining 2022-yil 7-martdagi “Oila va xotin-qizlarni tizimli qoʻllab-quvvatlash borasidagi ishlarni yanada jadallashtirish chora-tadbirlari toʻgʻrisida”gi PF-87-son farmoniga muvofiq, joriy yilning 1 aprelidan boshlab, toʻliq quvvat bilan ishlamayotgan davlat maktabgacha taʼlim tashkilotlariga 2 yoshdan 3 yoshgacha boʻlgan bolalarni pullik xizmat koʻrsatish shaklida qabul qilish tartibi  belgilandi. Quyidagilar, 2 yoshdan 3 yoshgacha boʻlgan bolalarni pullik xizmat koʻrsatish shaklida maktabgacha taʼlim tashkilotlariga qabul qilishda amal qiladi: Ushbu tartib 3-7 yoshli bolalar navbatda turgan davlat maktabgacha taʼlim tashkilotlariga qoʻllanilmaydi. Maktabgacha taʼlim tashkilotlarida tashkil etilgan Ilk rivojlanish guruhlardagi bolalar uchun toʻlov tegishli maktabgacha taʼlim tuman (shahar) boʻlinmasi  bilan tashkilot direktori tomonidan kelishilgan holda tasdiqlangan preyskurant narxlar asosida amalga oshiriladi. Ilk rivojlanish guruhlari tarbiyalanuvchilari ota-onasi yoki ularning oʻrnini bosuvchi qonuniy vakili bilan tuziladigan shartnoma bola qabul qilingan kuni oʻrnatilgan tartibda tashkilot direktori tomonidan tuziladi. Ilk rivojlanish guruhlarda tarbiyalanayotgan bola 3 yoshga toʻlgan kundan boshlab ota-ona bilan tuzilgan shartnoma bekor qilinadi va oʻrnatilgan tartibda tashkilot direktori tomonidan rasmiylashtiriladi. Maktabgacha taʼlim tashkilotida 3-7 yoshli bolalarga moʻljallangan guruh tashkil qilish uchun “Bolalar bogʻchasi” axborot tizimida guruhni toʻldirishning eng kam miqdoridagi bolalar soniga teng navbat shakllangan oyning yakunida Ilk rivojlanish guruhlar faoliyati toʻxtatiladi va bu haqda bolaning ota-onasi yoki uning oʻrnini bosuvchi qonuniy vakili xabardor qilinadi. Bundan tashqari, maktabgacha taʼlim tashkilotlari tomonidan dam olish kunlarida va ish kuni tugagandan keyin quyidagilarni nazarda tutuvchi Ilk rivojlanish guruhlari tashkil qilish mumkin: dam olish kunlari va maktabgacha taʼlim tashkilotida ish kuni yakunlangandan keyin bolani parvarishlash, unga qarab turish; maktabgacha taʼlim tashkilotining oʻquv dasturidan tashqari sport-sogʻlomlashtirish va boshqalar. Shu bilan birgalikda, ilk rivojlanish guruhlari maktabgacha taʼlim tashkilotlaridagi foydanilmayotgan va jihozlangan xonalarida tashkil etiladi.   Maktabgacha taʼlim tashkilotlaridagi Ilk rivojlanish guruhlarga bolalar ularning ota-onalari yoki ularning oʻrnini bosuvchi shaxslarning va bola sogʻligʻi holati toʻgʻrisidagi tibbiy xulosa asosida qabul qilinadi. Ilk rivojlanish guruhlarida bolalarning soni 20 nafardan ortiq boʻlishiga yoʻl qoʻyilmaydi. Bolalarni bola qonuniy vakilining arizasi va tibbiy koʻrsatmalar asosida Ilk rivojlanish guruhlardan chiqarib yuborish maktabgacha taʼlim tashkiloti direktorining buyrugʻi bilan rasmiylashtiriladi. Ilk rivojlanish guruhlardagi taʼlim-tarbiya jarayonining mazmuni Oʻzbekiston Respublikasida Ilk va maktabgacha yoshdagi bolalar rivojlanishiga qoʻyiladigan davlat talablari hamda maktabgacha taʼlim tashkilotining  “Ilk qadam” davlat oʻquv dasturiga hamda muvofiq ishlab chiqilgan maktabgacha taʼlim tashkiloti dasturida belgilab beriladi. Ilk rivojlanish guruhlarda bolalar bilan mashgʻulotlarni tashkil etishda oʻquv yuklamasi bir haftalik taʼlim yuklamasining eng koʻp ruxsat etilgan hajmidan va mashgʻulotlarning eng koʻp ruxsat etilgan sonidan oshmasligi kerak. Ilk yoshli guruhga tarbiyalanuvchilari uchun toʻlovlar tijorat banklari orqali naqd pulda, plastik kartochkada, elektron toʻlov shaklda yoki pul oʻtkazish yoʻli bilan naqd pulsiz shaklda toʻlanadi. Bunda, toʻlovning amalga oshirilganligini tasdiqlovchi hujjat nusxasi maktabgacha taʼlim tashkilotiga taqdim etiladi (elektron toʻlov bundan mustasno). Ilk rivojlanish guruhlarda koʻrsatiladigan xizmatlar uchun tarbiyalanuvchilarning ota-onalari yoki ularning oʻrnini bosuvchi shaxslar tomonidan 100 foiz miqdorda oldindan toʻlov amalga oshiriladi. Ilk rivojlanish guruhlarda koʻrsatiladigan xizmatlar uchun hisob-kitoblar tarbiyalanuvchilarning davomat tabeli asosida haqiqiy qatnagan kunlariga muvofiq amalga oshiriladi. Ilk rivojlanish guruhlarning tarbiyachi, pedagog va xodimlari mehnatiga qonun hujjatlarida belgilangan tartibda haq toʻlanadi. Davlat maktabgacha taʼlim tashkilotlari Ilk rivojlanish guruhlarni tashkil etish paytida oʻziga biriktirilgan hamda byudjet va byudjetdan tashqari mablagʻlar hisobiga xarid qilingan asosiy vositalardan foydalanishlari mumkin. Alohida qayd etish joizki, davlat maktabgacha taʼlim tashkilotiga byudjetdan tashqari qoʻshimcha mablagʻlarning jalb etilishi byudjetdan moliyalashtirishning kamayishiga sabab boʻlmaydi. Mazkur yoʻriqnoma talablari buzilishida aybdor boʻlgan shaxslar qonunchilik hujjatlariga muvofiq javobgar boʻladilar.

Barchamizga maʼlum maktabgacha taʼlim tizimidagi pedagogik kadrlar zaxirasini shakllantirish va taʼlim sifatini zamon talablari asosida rivojlantirish maqsadida, Oʻzbekiston Respublikasi Prezidentining 2018-yil 2-iyuldagi “Toshkent shahrida Puchon universitetini tashkil etish toʻgʻrisida”gi 3821-sonli qaroriga muvofiq, Toshkent shahrida Oʻzbekiston Respublikasi Maktabgacha taʼlim vazirligi, Oliy va oʻrta maxsus taʼlim vazirligi va Puchon universiteti (Koreya Respublikasi) bilan hamkorlikda Puchon universiteti tashkil etilgan. Puchon universiteti mamlakatimizda oliy taʼlim sifatini oshirishda faol ishtirok etib, maktabgacha taʼlim, oʻrta maxsus va oliy taʼlim muassasalari oʻrtasida bilim almashishga katta eʼtibor qaratmoqda.Shu munosabat bilan 2022-yil 1-aprel kuni universitetda “Global transformatsiyalar davrida yangi avlodni tarbiyalash: muammolar va istiqbollar” mavzusidagi birinchi yirik xalqaro konferensiya oʻtkazildi.Anjuman Oʻzbekiston Respublikasida oliy taʼlim sifatini oshirish boʻyicha birgalikdagi harakatlar strategiyasini ishlab chiqishga bagʻishlandi. Tadbirda uch davlatdan: Oʻzbekiston Respublikasi, Koreya Respublikasi va Rossiya Federatsiyasidan umumiy soni 200 kishini tashkil etgan mutaxassislar ishtirok etishdi. Konferensiyadan koʻzlangan asosiy maqsad – yetakchi xorijiy va mahalliy oliy oʻquv yurtlari, ilmiy-innovatsion markazlar bilan hamkorlikdagi faoliyatni muhokama qilish, yuqori malakali kadrlar tayyorlash sohasida hamkorlikni kengaytirishdan iborat. Yalpi va seksiya majlislarida Oʻzbekistonda oliy taʼlim tizimini rivojlantirish boʻyicha dolzarb muammolarni aniqlash va tavsiyalar beruvchi maʼruzalar tinglandi. Konferensiya yakunlari boʻyicha ilmiy maqolalar toʻplami nashr etilishi maqsad qilingan.

Telegramm kanallarida Qarshi tumanidagi 20-Davlat maktabgacha taʼlim tashkilotida boshlangʻich taʼlimga majburiy bir yillik tayyorlash guruhi bolalari polda dars qilishayotgani xususida xabar tarqalmoqda. Ushbu holat yuzasidan Qarshi tuman maktabgacha taʼlim boʻlimi tomonidan oʻrganish oʻtkazildi. Oʻrganish davomida 2022-yil 1-aprel kuni Qarshi tumanidagi 20-Davlat maktabgacha taʼlim tashkilotidagi maktabgacha tayyorlash boʻyicha tashkil etilgan boshlangʻich taʼlimga majburiy bir yillik tayyorlash guruhidagi bor oldingi jihozlar boshqa xonaga olib chiqilganligi, yangi jihoz qoʻyilguniga qadar bu holat uyushtirilganligi aniqlandi. Xalqimizga faktlarga asoslanmagan maʼlumotlarni tarqatganlik uchun, anonim foto surat egasini aniqlash maqsadida vazirlik topshirigʻiga asosan qayta bu holat oʻrganiladi.   Aslida 20-davlat maktabgacha taʼlim tashkiloti uchun jihozlar ajratilgan, qoʻshimcha guruhlar tashkil etish maqsadida ilgari oshxona sifatida foydalanilgan xona, hozirgi kunda taʼmirlanib, yana bitta qoʻshimcha guruh tashkil etildi, qoʻshimcha guruh uchun ajratilgan qoʻshimcha jihozlar oʻz vaqtida yetib kelgan va foydalanilmoqda.

Yosh avlodning boʻsh vaqtini mazmunli oʻtkazishni tashkil etish dolzarb masala hisoblanadi. Maʼlumki, davlatimiz rahbari ijtimoiy, maʼnaviy-maʼrifiy sohalardagi ishlarni yangi tizim asosida yoʻlga qoʻyish boʻyicha 5 ta muhim tashabbusni ilgari surgan edi.   Ana shu ezgu gʻoya Toshkent viloyati Quyi Chirchiq tumanida davom ettirilib, tumandagi Davlat va nodavlat maktabgacha taʼlim tashkilotlari tarbiyalanuvchilari oʻrtasida “Aqlvoyda besh tashabbus” koʻrik-tanlovi boʻlib oʻtdi. Mazkur koʻrik-tanlovda 105 nafar tarbiyalanuvchilar oʻzaro bellashib, tanlov yakunida maxsus diplom va esdalik sovgʻalari bilan taqdirlandilar.

Maktabgacha taʼlim vazirligi delegatsiyasi Parijda xizmat safarining uchinchi kuni navbatdagi samarali uchrashuvni oʻtkazdi. YUNESKO Bosh direktori Odri Azule xonim joriy yilning noyabr oyida Toshkent shahrida erta yoshdagi bolalarni tarbiyalash va taʼlim berish boʻyicha II Butunjahon konferensiyasini oʻtkazish masalasini muhokama qilish uchun tashkilot bosh ofisida vazirlik rahbariyatini qabul qildi. Vazirlar darajasidagi mazkur anjumanni oʻtkazish uchun Oʻzbekistonning mezbon davlat sifatida tanlanishi YUNESKO rahbariyati tomonidan toʻliq qoʻllab-quvvatlandi. Shu bois mazkur uchrashuv tashkilot Bosh direktoriga minnatdorchilik va hurmat-ehtirom bildirish uchun navbatdagi imkoniyat boʻldi. Odri Azule mamlakatimizning maktabgacha taʼlimni nafaqat mamlakat miqyosida, balki xalqaro miqyosda rivojlantirishga qoʻshayotgan hissasini yuqori baholadi.   Respublikamizning erta rivojlanish sohasidagi yutuqlari sezilarli boʻlib, xalqaro ekspertlar va hamkorlar tomonidan haqli ravishda baholanmoqda.

Bugun Oʻzbekiston Respublikasi Prezidenti Administratsiyasi huzuridagi Axborot va Ommaviy Kommunikatsiyalar Agentligida Maktabgacha taʼlim vazirligining “Davlat-xususiy sherikligi xususidagi muammolar va ularning yechimlari borasidagi amalga oshirilayotgan ishlar” mavzusida matbuot anjumani boʻlib oʻtdi. Ushbu matbuot anjumanida soha mutaxassislari tomonidan 2017 — 2021-yillarda maktabgacha taʼlim tizimini tubdan isloh qilish va takomillashtirish, maktabgacha taʼlim tashkilotlarini davlat tomonidan boshqarishning samarali tizimini yaratish hamda uning moddiy-texnika bazasini mustahkamlashda davlat-xususiy sherikligi hamda nodavlat sektorini rivojlantirishga qaratilgan loyihalar va bu borada olib borilgan ishlar, natijalar, kamchiliklar, yutuqlar haqida soʻz yuritilib, quyidagilar maʼlum qilindi: Maktabgacha taʼlim tizimini, shu jumladan maktabgacha taʼlim xizmatlari nodavlat sektorini yanada rivojlantirish, maktabgacha taʼlim tashkilotlari tarmogʻini kengaytirish va moddiy-texnika bazasini mustahkamlash, bolalarning maktabgacha taʼlim tizimiga yanada kengroq qamrab olinishini taʼminlash hamda maktabgacha taʼlim sohasidagi davlat-xususiy sherikchiligi uchun qulay shart-sharoitlar yaratish maqsadida, davlat-xususiy sheriklik yoʻnalishida Oʻzbekiston Respublikasi Prezidentining 3 ta, Oʻzbekiston Respublikasi Vazirlar Mahkamasining 13 ta qarorlari qabul qilinib hozirgi kunga qadar amal qilinmoqda. Qabul qilingan qarorlar ijrosi sifatida 2018-2021-yillarda davlat-xususiy sheriklik asosida 179 270 quvvatga ega nodavlat maktabgacha taʼlim tashkilotlarini tashkil etish uchun 1 733 nafar tadbirkorlar bilan bitimlar imzolangan. 2018-2021-yillarda davlat-xususiy sheriklik asosida 20 643 nafar tadbirkorlar tomonidan 626 374 quvvatga ega nodavlat maktabgacha taʼlim tashkilotlari faoliyati yoʻlga qoʻyildi hamda 70 mingdan ortiq yangi ish oʻrinlari yaratildi. Xususan, 116 267 quvvatga ega 1 154 ta davlat-xususiy sheriklik hamda 510 107 quvvatga ega 19 489 ta oilaviy nodavlat bogʻchalar faoliyati yoʻlga qoʻyilgan. Jami faoliyati boshlangan 20 643 ta davlat-xususiy sheriklik asosidagi nodavlat maktabgacha taʼlim tashkilotlariga qamrab olingan 626 374 nafar bolalarning 384 593 (61,4%) nafari ijtimoiy koʻmakka muhtoj oila farzandlari hisoblanadi (DXSH loyihalarida 28 601 (24,6%), oilaviy loyihalarda 360 135 nafari (70,6%). Oʻzbekiston Respublikasi Prezidentining “Qamrov darajasi past boʻlgan tumanlarda maktabgacha taʼlim tashkilotlari tarmogʻini kengaytirish boʻyicha qoʻshimcha chora-tadbirlar toʻgʻrisida” 2021-yil 10-iyundagi PQ-5144-sonli qaroriga asosan qamrovi past boʻlgan tumanlarda 54 825 oʻringa moʻljallangan 2 033 ta oilaviy shakldagi bitimlar imzolandi va oʻz faoliyatini boshladi. Natijada, bolalarni maktabgacha taʼlimga qamrab olishda davlat-xususiy sheriklik ulushi 2019-yilga nisbatan 14,0 foizdan 31 foizga oshirildi. Moliya vazirligi va hududlarga biriktirilgan tijorat banklari bilan hamkorlikda 118 042 quvvatga ega 1 155 ta loyihalarni imtiyozli kreditlar bilan moliyalashtirish uchun 2,1 trln. soʻm miqdorida resurs mablagʻi yoʻnaltirildi. Qolgan loyihalar oʻrnatilgan tartibda moliyalashtirish ishlari amalga oshirilmoqda. Qamrovi past boʻlgan tumanlarda Ishchi guruhi tomonidan koʻrib chiqilgan 90 ta davlat xususiy sheriklik bitimlari imzolanib, oʻrnatilgan tartibda Moliya vazirligiga moliyalashtirish uchun yoʻnaltirildi. 2018-2021-yillarda davomida davlat-xususiy sheriklik asosida 179 270 quvvatga ega 1 733 nafar tadbirkorlar bilan bitimlar imzolangan. Shundan: 118 042 quvvatga ega 1 155 ta loyiha toʻliq moliyalashtirildi; 19 643 quvvatga ega 180 ta loyihaga kredit talab etilmaydi; 7945 quvvatga ega 64 ta loyihaga imtiyozli kredit ajratish uchun tavsiya berildi; 5350 quvvatga ega 48 ta loyiha Saudiya taraqqiyot fondi tomonidan moliyalashtirilishi rejalashtirilgan; 10 975 quvvatga ega 97 ta loyihaga biriktirilgan tijorat tomonidan oʻrnatilgan tartibda oʻz mablagʻlari hisobidan imtiyozli kredit ajratish ishlari olib borilmoqda. 14 550 quvvatga ega 166 ta bilan bitim bekor qilindi (tadbirkorlarning oʻz mablagʻi evaziga davom ettirish hamda iqtisodiy jihatdan samarasiz deb topilgan loyihalar) 2 765 quvvatga ega 23 ta loyihalar bilan bitim bekor qilish ishlari olib borilmoqda 2018-2020-yillarda imtiyozli kredit ajratilgan, biroq bitimda koʻrsatilgan muddatda oʻz faoliyatini boshlamagan loyihalar soni 74 tani tashkil etadi. 74 ta loyihalardan 46 tasi boʻyicha 9 mlrd. 712 mln.soʻm penya undirish maqsadida sudlardagi daʼvo arizalar qondirildi. Qolgan 28 ta muammoli loyihalar boʻyicha daʼvo arizalari tayyorlanmoqda. Islom taraqqiyot banki hamda Neftni eksport qiluvchi mamlakatlar tashkiloti (OPEK) hamkorligida jami 53 mln. AQSH dollari miqdorida imtiyozli mablagʻlarni ajratilishi hisobiga 200 dan ziyod davlat-xususiy sheriklik loyihalarini amalga oshirilishi yuzasidan muzokaralar olib borilmoqda. Kelishuvga erishilgan taqdirda 2023-yildan boshlab loyihalar moliyalashtirilishi rejalashtirilgan. 2022-yilda amalga oshiriladigan asosiy vazifalar. 2022-yilda davlat-xususiy sheriklik asosida 100 ta hamda 1 200 ta oilaviy shakldagi nodavlat maktabgacha taʼlim tashkilotlarini tashkil etish orqali qoʻshimcha 45 000 dan ziyod quvvat hamda 4 000 ta yangi ish oʻrinlarini yaratish rejalashtirilgan.   Saudiya taraqqiyot jamgʻarmasi bilan umumiy qiymati 10,9 mln. AQSH dollari miqdoridagi “Maktabgacha taʼlim tashkilotlarini yaratish” loyihasini amalga oshirish boʻyicha ikki tomonlama kelishuvga erishilgan. Kelishuvga asosan 5 350 quvvatga ega 48 ta loyiha moliyalashtirilishi nazarda tutilgan.

Abdulla Qodiriy nomidagi Jizzax davlat pedagogika institutida “Talaba ishga joylashadi” shiori ostida oʻtkazilgan mehnat yarmarkasida Jizzax viloyat maktabgacha taʼlim boshqarmasi xodimlari, boshqarma tasarrufidagi tuman boʻlimi mudirlari ishtirok etdilar. Boshqarma tasarrufidagi davlat maktabgacha taʼlim tashkilotlarida mavjud 109 ta vakant oʻrinlarga 200 dan ziyod talabalardan murojaat qabul qilindi. Qabul qilingan murojaatlar boʻyicha boshqarma hamda institutning maktabgacha taʼlim fakulteti bilan memorandum imzolandi. Shuningdek, Xalq deputatlari viloyat kengashining 34-sessiyasi boʻlib oʻtdi. Sessiyada Jizzax viloyat maktabgacha taʼlim boshqarmasi tomonidan Oʻzbekiston Respublikasi Qonunining ijrosi yuzasidan amalga oshirilgan ishlar haqida maʼlumot berildi. Sessiya davomida viloyat hokimining buyrugʻi bilan Jizzax viloyat maktabgacha taʼlim boshqarmasi uchun alohida bino ajratildi.

Joriy yilning 31-mart kuni soat 10:00 da Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Maktabgacha taʼlim vazirligining “Davlat-xususiy sherikligi xususidagi muammolar va ularning yechimlari borasidagi amalga oshirilayotgan ishlar” mavzusida matbuot anjumani boʻlib oʻtadi. Unda sizlarni qiziqtirgan barcha savollarga javob olishingiz mumkin.   Shu munosabat bilan Maktabgacha taʼlim vazirligi barcha OAV vakillari, mustaqil jurnalistlar hamda blogerlarni matbuot anjumanida ishtirok etishga taklif etadi. 

Fargʻona viloyati Uchkoʻprik tumanidagi 16-davlat maktabgacha taʼlim tashkilotining 90 oʻrinli yangi binosi foydalanishga topshirildi. “Begmurod” mahalla fuqarolar yigʻinida joylashgan 16-davlat maktabgacha taʼlim tashkilotida shu kunga qadar 8 ta guruhda 210 nafar bola taʼlim va tarbiya olayotgan edi. Qoʻshimcha zamonaviy bino qurilishi natijasida yana 3 ta guruhda 90 nafar bolani maktabgacha taʼlimga qamrab olish imkoniyati yaratildi. Buning uchun 580 million soʻm mablagʻ sarflanib, kichkintoylarning sifatli boshlangʻich taʼlim olishlari uchun barcha sharoitlar muhayyo qilindi.   Shuningdek, Surxondaryo viloyati Boysun tuman markazidan 30 km olisda joylashgan “Munchoq” mahallasida 14-sonli davlat maktabgacha taʻlim tashkiloti oʻz faoliyatini boshladi.Ushbu tashkilot 90 oʻringa moʻljallanib, mahalliy byudjet mablagʻlari hisobidan (sendvich panel) yangidan qurildi. Maktabgacha taʻlim tashkilotida 3 ta guruh uchun moʻljallangan keng va yorugʻ xonalar, zamonaviy musiqa zali, shinam yotoqxona, oshxona, zarur mebellar bilan jihozlar va yozgi ayvonchalar barpo qilingan. Ayni vaqtda “Munchoq” mahallasida 287 nafar 3 yoshdan 7 yoshgacha boʻlgan bolalar mavjud boʻlsa, shularning 150 nafari ushbu davlat maktabgacha taʻlim tashkilotiga qamrab olinishi koʻzda tutilgan. Bundan tashqari aholi bandligini taʻminlash maqsadida ushbu tashkilotga hududdagi jami 30 nafardan ortiq pedagog va ishchi xodimlar ishga qabul qilinadi.

Ijtimoiy tarmoqlarda tarqalgan audioyozuv yuzasidan Yangixayot tumanida joylashgan 48-sonli davlat maktabgacha taʼlim tashkilotiga borib oʻrganilganda quyidagilar aniqlandi. Holat yuzasidan 48-sonli DMTT xoʻjalik mudirasi Mastura Aʼzamova oʻz tushuntirish xatida, 2022-yil 28-mart kuni ijtimoiy tarmoqlarda tarqalgan ovozli xabarni tashkilot telegram kanaliga 7-mart kuni oldidan qoʻyilganligini maʼlum qildi.   Holatni batafsil oʻrganish uchun vazirlik tomonidan Ishchi guruh tuzildi. Oʻrganish natijalariga koʻra, xolat yuzasidan maʼlumotlar oʻrnatilgan tartibda huquqni muhofaza qilish organlariga taqdim etiladi.

Natijada 1500 nafar bola qamrab olindi. Navroʻzga tuhfa sifatida Qashqadaryo viloyatida ham 3 ta MTT foydalanishga topshirildi. Xususan, markazdan ancha uzoqda joylashgan Qashqadaryo viloyati, Shahrisabz tumanidagi “Gʻyelon” mahallasida 22-davlat maktabgacha taʼlim tashkiloti foydalanishga topshirildi. Ushbu tashkilot 120 oʻringa moʻljallangan. Mazkur davlat maktabgacha taʼlim tashkiloti avval huddudagi kollej binosida vaqtincha faoliyat koʻrsatib kelayotgan edi. 2021-yilda Investitsiya dasturiga asosan 3 milliard 22 million 300 ming soʻm mablagʻ hisobiga yangidan bino qurilib, foydalanishga topshirildi. Shuningdek, Yakkabogʻ tumani “Chinobod” MFYda 21-sonli davlat maktabgacha taʼlim tashkiloti foydalanishga topshirildi. Qariyb 4 milliard soʻm evaziga tashkil etilgan mazkur bogʻcha 150 oʻringa moʻljallangan. Shu bilan birga, Dehqonobod tumanining “Otqamar” mahallasida ham 120 oʻringa moʻljallangan 11-davlat maktabgacha taʼlim tashkiloti binosining foydalanishga topshirilishi bayram kunlariga toʻgʻri keldi. Yangi bogʻcha ish tushishi bilan 25 ta yangi ish oʻrni ham yaratildi. Qayd etish joizki, bayram arafasida Toshkent shahrida ham yangi MTT bolajonlarga eshik ochdi. Misol uchun, Toshkent shahar maktabgacha taʼlim bosh boshqarmasi tasarrufidagi Chilonzor tumanida joylashgan 24-sonli davlat maktabgacha taʼlim tashkiloti 1960-yilda qurilgan boʻlib, 2020-yil investitsiya dasturi asosida taʼmirlandi. 360-oʻringa moʻljallangan ushbu tashkilotda taʼmirlash ishlaridan soʻng qoʻshimcha ravishda umumiy oshxona, sport va musiqa zallari qurib topshirildi. Surxondaryo viloyati Qumqoʻrgʻon tumani “Joziba” mahallasida investitsiya dasturi asosida 21-sonli maktabgacha taʼlim tashkiloti yangidan qurilib, foydalanishga topshirildi. Tuman markazida uzoqda joylashgan ushbu MTTning avvalgi qamrovi 50 oʻrinni tashkil etgan boʻlsa, hozirda 150 oʻringa moʻljallandi. Fargʻonaliklar ham bayramni yangiliksiz kutib olishmadi. Xususan, Oʻzbekiston tumani “Qaynarbuloq” mahalla fuqarolar yigʻini Elash qishlogʻida joylashgan 16-sonli davlat maktabgacha taʼlim tashkilotining binosi yangidan barpo etilib, foydalanishga topshirildi. Bogʻchaning mavjud eski binosi oʻrnida umumiy qiymati 520 million soʻmlik loyiha hisobiga 120 oʻrinli koʻrkam bino qad rostlab, zamonaviy jihozlandi. Navroʻz umumxalq bayrami munosabati bilan Andijon viloyati Boʻston tumani Yangiobod mahallasida joylashgan 9-davlat maktabgacha taʼlim tashkiloti ochildi. Ushbu maskan 150 nafar bolajonlarni oʻz bagʻriga sigʻdira oladi. Maktabgacha taʼlim maskanining xonalari zamonaviy tarzda bolalarga manzur boʻluvchi jihozlar bilan taʼminlangan. Shuningdek, Qoraqalpogʻiston Respublikasi Shumanay tumanida ham 10-sonli maktabgacha taʼlim tashkiloti ham foydalanishga topshirildi. Tashkilotning 3 mlrd 30 mln soʻm ajratilgan boʻlib, 90 oʻringa moʻljallangan. Ushbu maskanning ochilishi natijasida 15 nafar fuqaro ish bilan taʼminlandi.   “Obod” qishloq dasturi doirasida Namangan viloyati Chust tumanining ikki mahallasida, har biri 120 oʻrinli, loyiha qiymati esa, qariyb uch yarim milliard soʻmdan, jami 7 milliard soʻmga yaqin mablagʻ sarflangan 2 ta – 25-sonli hamda 19-sonli davlat maktabgacha taʼlim tashkilotlari foydalanishga topshirildi.

Toshkent shahar Olmazor tumani "Bahtiyor makon" nomli 120-davlat maktabgacha ta‘lim tashkilotida "Ekomarafon" tashkil etildi.  Marafon haqda batafsil "O‘zbekiston 24" telekanalida namoyish etildi.

Ayni damda Oʻzbekiston Respublikasi Maktabgacha taʼlim vaziri Agrippina Shin M.V.Lomonosov nomidagi Moskva davlat universiteti rektori Viktor Sadovnichiy bilan videomuloqot tarzida uchrashmoqda. Muzokaralar chogʻida tomonlar hamkorlikning asosiy yoʻnalishlari va kelgusidagi hamkorlik istiqbollarini muhokama qilishmoqda. Uchrashuv davomida tomonlarprofessor-oʻqituvchilarni tayyorlash, qayta tayyorlash va malakasini oshirish, shuningdek, Oʻzbekiston Respublikasi maktabgacha taʼlim tizimining pedagog va rahbar kadrlari uchun Moskva Davlat universitetining qoʻshimcha taʼlim dasturlarini amalga oshirish sohasida hamkorlik oʻrnatish yuzasidan kelishib olishmoqda. Oʻzbekiston Respublikasi maktabgacha taʻlim tizimi pedagog kadrlarini qayta tayyorlash va ularning malakasini oshirish masalalari muhokama qilindi. Shuningdek, magistratura yoʻnalishi boʻyicha Moskva davlat universitetining Toshkent shahridagi filiali negizida “Taʻlimni boshqarish” taʻlim dasturini 25 nafardan iborat boʻlgan holda ochish masalasini belgilandi. Qoʻshma fundamental va amaliy tadqiqotlar oʻtkazish, ilmiy ishlanmalar va ilmiy anjumanlar, simpoziumlar tashkil etish istiqbollari, ilmiy va ilmiy-pedagogik kadrlar tayyorlashda hamkorlik masalalari alohida muhokama qilinmoqda. Soʻng, yuqoridagi hamkorlikda kelishib olingan mavzular asosida ikki tomon Memorandum imzolashadi.

Yurtimizga Navroʻzi olam kirib kelishiga ham oz fursat qoldi. Ushbu bayram arafasida barcha hududlarda katta-katta tadbirlar oʻtkazilmoqda. Xususan, Toshkent shahar Shayxontohur tumani MTB tasarrufidagi 229-241-sonli davlat maktabgacha taʼlim tashkilotlari tarbiyalanuvchilari ishtirokida ham “Assalom Navroʻz” tadbirdan tashkil etildi.  Tadbirda bolajonlar ishtirokida sahna koʻrinishlari namoyish etildi hamda raqslar ijro etildi.

Prezidentning tegishli qaroriga koʻra, Koʻp tarmoqli ixtisoslashtirilgan maktabgacha taʼlim tashkilotlari(KTIMTT)ni korreksion, pedagogik va reabilitatsiya uskunalari bilan taʼminlash vazifasi belgilangan.  Oʻtgan vaqt davomida birgina Namangan viloyatining oʻziga 13 turdagi, jami 263 dona, umumiy qiymati, 1 milliard 865 million 600 ming soʻmlik zamonaviy protez-ortopediya moslamalari yetkazib berildi. Joriy yilning 16-mart kuni loyihaning galdagi bosqichi amalga oshirildi.   Mazkur bosqichda viloyatning Davlatobod tumanida joylashgan 31, Uychi tumanidagi 1, Yangiqoʻrgʻon tumanidagi 20 hamda Toʻraqoʻrgʻon tumanidagi 21-sonli KTIMTTlarning 32 nafar tarbiyalanuvchilari 63 ta eshitish moslamasi bilan taʼminlandi.

Joriy yilning 16-17-mart kunlari Toshkent shahrida sportning oʻzbek jang sanʼati doirasidagi “Kompleks mashq”, “Temuriylar jang usuli”, “Koʻrgazmali chiqish”, “Assalom tong” yoʻnalishlari boʻyicha Oʻzbekiston birinchiligi oʻtkazildi.   Turnirda Namangan viloyati Chortoq tumani Maktabgacha taʼlim boʻlimi xotin-qizlaridan tarkib topgan jamoa Namangan viloyati sharafini munosib himoya qildi. Ular musobaqaning “Assalom tong!” yoʻnalishi boʻyicha faxrli 1-oʻrinni egalladi.

O‘zbekiston Respublikasi Maktabgacha ta’lim vazirligida Jahon sog‘liqni saqlash tashkilotining O‘zbekistonda reabilitatsiyani kuchaytirish bo‘yicha ekspert missiyasining ekspertlar guruhi bilan uchrashuv bo‘lib o‘tdi. Uchrashuvda Maktabgacha ta’lim vaziri o‘rinbosari Uzoqboy Begimqulov imkoniyati cheklangan bolalarning maktabgacha ta’lim tizimini takomillashtirish borasida amalga oshirilayotgan ishlar haqida ma’lumot berdi. Davlat ixtisoslashtirilgan maktabgacha ta'lim tashkilotlarida ko'p tarmoqli kompleks yondashuv amalga oshirilmoqda, bunda alohida ta'limga muhtoj bolalarga maktabgacha ta'lim bilan birgalikda yuqori sifatli reabilitatsiya yordami ko'rsatiladi. Bu esa bolalikdan nogironlikning oldini olish va kamaytirishga yordam beradi. Shu bilan birga bolalarning ijtimoiy moslashuvi, nogiron bolalarning har tomonlama hayotiy faoliyati va jamiyat hayotiga faol jalb etilishini ta'minlanadi.   Uchrashuvda maktabgacha yoshdagi bolalarni reabilitatsiya qilish bo‘yicha mavjud vaziyatning ustuvor masalalari muhokama qilinib, Jahon sog‘liqni saqlash tashkiloti mutaxassislari bilan o‘zaro hamkorlik qilish belgilab olindi.

Fargʻona viloyati “Uchkoʻprik” mahalla fuqarolar yigʻinida joylashgan 9-davlat maktabgacha taʼlim tashkilotida shu kunga qadar 16 ta guruhda 480 nafar bola taʼlim va tarbiya olayotgan edi. Bu yerda qoʻshimcha zamonaviy bino qurilishi natijasida yana 3 ta guruhda 90 nafar bolani maktabgacha taʼlimga qamrab olish imkoniyati yaratildi. Buning uchun 580 million soʻm mablagʻ sarflandi.   Shuningdek, Qoraqalpogʻiston Respublikasi Beruniy tumanida barcha sharoitlarga ega boʻlgan 42-sonli davlat maktabgacha taʼlim tashkiloti ishga tushirildi. 42-sonli DMTT 1997-yilda oʻz faoliyatini tugatib, 2021-yilgacha qarib 25 yil davomida tashlandiq ahvolga kelib qolgan edi. Endilikda 120 oʻringa ega.

Ijtimoiy tarmoqlarda endilikda bolalar 2 yoshdan bogʻchaga qabul qilinishi haqida xabarlar tarqalmoqda. Ushbu xabarlar yuzasidan Maktabgacha taʼlim vazirligi quyidagilarni maʼlum qiladi: Bugun Oʻzbekiston Respublikasi Prezidenti Shavkat Mirziyoyev tomonidan imzolangan “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida”gi farmonining 17 “b” bandiga koʻra, toʻliq quvvat bilan ishlamayotgan davlat maktabgacha taʼlim tashkilotlariga 2 yoshdan 3 yoshgacha boʻlgan bolalarni pullik xizmat koʻrsatish shaklida qabul qilishga ruxsat beriladi. Yaʼni, Maktabgacha taʼlim tashkiloti tomonidan koʻrsatilishi rejalashtirilayotgan qoʻshimcha xizmatlar turlari hamda ular uchun belgilanadigan toʻlovlar miqdori maktabgacha taʼlim tashkilotining kuzatuv kengashi yigʻilishida muhokama qilinadi. Maktabgacha taʼlim tashkilotlari tomonidan koʻrsatiladigan qoʻshimcha xizmatlarning narxlar preyskuranti tegishli maktabgacha taʼlim tuman (shahar) boʻlinmasi bilan kelishilgan holda maktabgacha taʼlim tashkilotining direktori tomonidan tasdiqlanadi.

Prezident “Oila va xotin-qizlarni tizimli qoʻllab-quvvatlashga doir ishlarni yanada jadallashtirish chora-tadbirlari toʻgʻrisida”gi farmonni imzoladi. Farmonga koʻra, 2022-yil 1-apreldan boshlab: a) boquvchisini yoʻqotgan xotin-qizlarning: farzandlari davlat maktabgacha taʼlim tashkilotlariga toʻlanadigan ota-onalar badalidan ozod qilinadi; 3 yoshgacha boʻlgan farzandlari uchun nodavlat maktabgacha taʼlim tashkilotlariga Davlat byudjetidan subsidiyalar belgilangan tartibda ajratiladi; b) toʻliq quvvat bilan ishlamayotgan davlat maktabgacha taʼlim tashkilotlariga 2 yoshdan 3 yoshgacha boʻlgan bolalarni pullik xizmat koʻrsatish shaklida qabul qilishga ruxsat beriladi; v) kechki smenada xotin-qizlar ishlaydigan korxona va tashkilotlar oʻz huzurida maktabgacha taʼlim tashkilotini tashkil qilganda, ulardagi tarbiyachilarning ish haqi Davlat byudjeti mablagʻlari hisobidan qoplab beriladi. Ushbu bandda nazarda tutilgan kompensatsiya toʻlovlarini amalga oshirish tartibini nazarda tutuvchi Hukumat qarori loyihasi ishlab chiqiladi.

Joriy yil 4-mart kuni Oliy Majlis Senatida “Eng yaxshi ijtimoiy tashabbus” koʻrik-tanlovining respublika bosqichi gʻoliblarini taqdirlash marosimi boʻlib oʻtdi. Koʻrik-tanlovning tuman (shahar)lar bosqichida 3072 nafar, hududiy bosqichida esa 792 nafar ishtirokchi quyidagi nominatsiyalar boʻyicha bellashdi: Tanlov natijalariga koʻra “Eng yaxshi ijtimoiy tashabbuskor davlat boshqaruvi organi” nominatsiyasida 1-oʻrinni Respublika maʼnaviyat va maʼrifat markazi Qashqadaryo viloyati Kitob tumani boʻlimi, 2-oʻrinni Buxoro viloyati Vobkent tumani xalq taʼlimi boʻlimi, 3-oʻrinni Toshkent viloyati Zangiota tumani 32-sonli davlat maktabgacha taʼlim tashkiloti qoʻlga kiritdi.

Oʻtgan yilning 24-dekabr kuni Maktabgacha taʼlim vazirining “Maktabgacha taʼlim vazirligida 2021-yil natijalari va 2022-yilda rejalashtirilgan strategiya haqida press-kofe hamda «Maktabgacha taʼlim sohasida yilning eng faol axborot xizmati” tanlovi gʻoliblarini taqdirlash marosimini oʻtkazish toʻgʻrisida»gi 247-sonli burugʻi imzolangan edi. Mazkur buyruq, joriy bahorning birinchi haftasida, vazirlikning anjumanlar zalida ijro etildi. Dastlab press-kofe oʻtkazildi. Unda mamlakatning barcha telekanallari, taniqli blogerlar, OAV vakillari qatnashdi. Ular soha rivoji doirasida 2021-yilda olib borilgan ishlar natijalari va galdagi maqsadlarga doir savollariga atroflicha javob olishdi. Keyin ikki kun davomida esa, maktabgacha taʼlim vazirligi va uning hududiy boshqarmalarida faoliyat olib borayotgan matbuot kotiblari uchun “Yangi media taʼlim markazi” nodavlat-notijorat tashkiloti bilan hamkorlikda tashkil etilgan “Zamonaviy media muhitida yangi PR trendlar” mavzusidagi oʻquv-seminar oʻz ishini olib bordi.   Tadbirlar soʻngida “Maktabgacha taʼlim sohasida yilning eng faol axborot xizmati” tanlovining taqdirlash marosimi oʻtkazildi.