Maktabgacha ta'lim agentligi faoliyatining ochiqligini ta'minlash hamda tizimda jamoatchilik nazoratini takomillashtirish mavzusida o‘tkaziladigan  matbuot anjumani haqida PRESS-RELIZ   Toshkent shahar                                                                                                      28-mart 2024-yil           O‘tgan davr mobaynida maktabgacha ta’lim tizimi tubdan isloh qilish hamda maktabgacha ta’lim tashkilotlari tarmog‘ini kengaytirish va bolalarni maktabgacha ta’lim bilan yanada kengroq qamrab olinishini ta’minlash yo‘nalishida qator ijobiy natijalarga erishildi.          Jumladan, 2017-yilda maktabgacha ta’lim tashkilotlari soni 5 211 tani tashkil etgan bo‘lsa, sohaga nodavlat sektorni keng jalb qilish uchun qulay shart-sharoitlar yaratish hamda mamlakatda ilk marotaba davlat-xususiy sheriklik tizimini joriy qilish natijasida 2023-yilga kelib, maktabgacha ta’lim tashkilotlari soni 6,5 barobarga ortib, 33 942 taga yetkazildi. Misol uchun, nodavlat sektorning ulushi 2017-yilda 0,5 foiz (250 ta)ni tashkil etgan bo‘lsa, hozirda ularning ulushi 80 foiz(28 ming ta)ga yetkazildi. Respublika bo‘yicha 2017-yilda bolalarni maktabgacha ta’lim bilan qamrovi  27 foiz(700 ming nafar)ni tashkil etgan bo‘lsa, 2024-yilga kelib ushbu ko‘rsatkich 2,6 barobarga orttirilib, 74 foiz (2,2 mln. nafar)ga yetkazildi.                                                          Respublikadagi barcha bolalar uchun bir xil boshlang‘ich imkoniyatlarni yaratish yo‘lida har bir bolaning maktabga kirishidan bir yil oldin umumiy o‘rta ta’limga majburiy bir yillik tayyorgarlikdan o‘tishga bo‘lgan huquqi “Maktabgacha ta’lim va tarbiya” to‘g‘risidagi qonun bilan kafolatlandi. Endilikda bolalar maktabga chiqishdan oldin bir yillik majburiy bepul maktabga tayyorlovdan o‘tkazilmoqda. 2023-yil yakuniga kelib qamrab olingan 6 yoshli bolalar ulushi 93 foizga (692 ming nafarga) yetdi.          Maktabgacha ta’lim xizmatlarini yanada kengaytirish maqsadida maktabgacha ta’limning muqobil shakllari yaratildi. Xususan, barcha bolalarga teng imkoniyatlar yaratish maqsadida, 25 mingta oilaviy nodavlat maktabgacha ta’lim tashkilotlari faoliyati yo‘lga qo‘yilib, 662 ming nafar bolalar qamrovi ta’minlandi.          Maktabgacha ta’lim tashkilotlarini qurish imkoni mavjud bo‘lmagan olis va chekka hududlarda “Aqlvoy” loyihasi doirasida 156 ta mahallalarda qayta jihozlangan 72 ta ISUZU avtobuslarda negizida 429 ta mobil guruhlar tashkil etilib, ularga 9,5 ming nafar bolalar qamrab olindi.          YUNISЕF xalqaro bolalar tashkiloti bilan hamkorlikda tashkil etilgan 20 ta “Turli xil yoshdagi maktabgacha ta’lim guruhlari” (o‘yin guruhlari)ga 496 nafar bolalar qamrab olindi.          Jahon bankining “Bolani erta rivojlantirish” loyihasi doirasida tashkil etilgan “Ilk rivojlanish markazlari”ga jami 1 600 nafar bolalar jalb etildi.          Respublikadagi 3 519 ta davlat maktabgacha ta’lim tashkilotlarida 535 160 o‘rinli qurilish-ta’mirlash (yangi 513 ta 73 905 o‘rin, rekonstruksiya 2 215 ta qo‘shimcha 104 030 o‘rin yaratilgan va mavjud 231 278 o‘rin ta’mirlangan, mukammal ta’mir 791 ta – 125 946 o‘rin) ishlari amalga oshirilgan.             2023-yilda tizimda qator o‘zgarishlar amalga oshirildi. Jumladan:  3-7 yoshli bolalarning maktabgacha ta’lim bilan qamrab olish darajasi ko‘rsatkich 71,8 foizdan 74,0 foizga va 6 yoshli bolalarning maktabga tayyorlov tizimi bilan qamrovi 91,0 foizdan 93,0 foizga yetkazildi; ·        4 522 ta davlat va nodavlat maktabgacha ta’lim tashkilotlari tashkil etildi; ·        71 ta DXSH asosidagi NMTTlar (7 100 o‘rin) hamda 4 402 ta (116 998 o‘rin) oilaviy shakldagi NMTTlar faoliyatini boshladi; ·        jami 26 890 quvvat (o‘rin)ga ega bo‘lgan 182 ta (53 ta yangi qurilish va 123 ta rekonstruksiya, 2 ta mukammal ta’mirlash) obyektlarni qurish va rekonstruksiya qilish ishlari olib borildi.          Maktabgacha ta’lim agentligiga 2023-yil davomida jami 4 492 ta murojaat kelib tushgan bo‘lib, 2022-yilga nisbatan ushbu ko‘rsatkich 1 012 taga yoki 22,5 foizga kamaygan. Agentlikka kelib tushgan murojaatlarning 2 578 tasi (57,3 foiz) ijobiy hal qilingan. Bundan tashqari, jismoniy va yuridik shaxslarga telefon orqali konsultatsiya berish va murojaatlarni qabul qilishni tashkil etish maqsadida 2023-yil iyul oyida Maktabgacha ta’lim agentligida «Koll markazi» faoliyati yo‘lga qo‘yildi. 2023-yil davomida Markazga biriktirilgan telefonlar orqali fuqarolar va tadbirkorlardan kelib tushgan 11 754 ta murojaatlar qabul qilinib, tegishli tartibda javob berilishi ta’minlandi.          2024-yilda 26,3 mingdan ortiq davlat-xususiy sheriklik asosidagi nodavlat maktabgacha ta’lim tashkilotlarini qo‘llab-quvvatlash uchun Davlat budjetidan  3 038,2 mlrd.so‘m mablag‘ ajratilgan. O‘zbekiston Respublikasi Prezidentining 2023-yil 25-dekabrdagi “2024-2026 yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida” PQ-404-son qaroriga asosan 2024-yilda jami 176 ta davlat maktabgacha ta’lim tashkilotlari obyektlarini qurish (43 ta obyekt), rekonstruksiya qilish (133 ta obyekt) ishlari amalga oshirilmoqda va mazkur maqsadlar uchun jami 1 020,0 mlrd so‘m mablag‘ajratilgan.          Maktabgacha ta’lim tizimida 2024-yil qator ustuvor vazifalarni amalga oshirish ko‘zda tutilmoqda. 2024-yil yakuniga qadar bolalarni maktabgacha ta’lim bilan qamrab olish darajasini 76,0 foizga, 6 yoshli bolalarni maktabga tayyorlov tizimi bilan qamrov darajasini 96 foizga yetkazish asosiy ustuvor vazifalardan hisoblanadi.

2023-yilning 16 oktyabr – 3 noyabr kunlari Termiz shahrida AQSh qishloq xo‘jaligi vazirligining “Bolalar ta’limi va ovqatlanishi uchun MakGovern-Doul xalqaro oziq-ovqat dasturi” doirasida Mehribonlik Korpusi (Mercy Corps) xalqaro nodavlat notijorat tashkiloti tominidan Maktabgacha va maktab ta’limi vazirligi huzuridagi Maktabgacha ta’lim agentligi bilan hamkorlikda Surxondaryo viloyatining Jarqo’rg’on, Qumqo’rg’on, Sho’rchi, Denov va Oltinsoy tumanlardagi 56 ta maqsadli maktabgacha ta’lim tashkilotlaridan taklif etilgan 168 nafar pedagog xodimlar uchun “O‘zbekiston Respublikasi maktabgacha ta’lim tizimida bolalarning ilk yoshidan savodxonlik, ratsional ovqatlanish, gigiyena va sog‘lom turmush tarzi ko‘nikmalarini shakllantirishda kompetensiyaviy yondashuvni joriy etish” mavzusida uch haftalik trening kursi tashkil etilmoqda.    Ushbu treningdan ko’zlangan asosiy maqsad - maktabgacha yoshdagi bo‘lgan bolalarning nutq, muloqot, o‘qish va yozish malakalarini rivojlantirish, pedagogik metodikalarni, bolalarning ratsional ovqatlanish va sog‘lom turmush tarzi ko‘nikmalarini oshirish, bola shaxsiga yo‘naltirilgan  differentsial yondashuv asosida ta’lim-tarbiya berish, shuningdek, ko’ngilsiz vaziyatlar sodir bo’lganda bolalarga birinchi tibbiy yordam ko‘rsatish bo‘yicha MTT pedagoglarining nazariy va amaliy kompetensiyalarini oshirishdan iborat.  Ma’lumot o'rnida,“Bolalar ta’limi va ovqatlanishi” uchun MakGovern-Doul xalqaro oziq-ovqat dasturi ikki hududda Qoraqalpog‘iston Respublikasi va Surxondaryo viloyatidagi davlat maktabgacha ta’lim tashkilotlarida amalga oshirilayotgan bo‘lib, ushbu dastur maktabgacha ta’lim tashkilotlarining moddiy-texnik bazasi va infratuzilmasini yaxshilash, bolalarning ilk yoshidan savodxonligini oshirish, hamda sog‘lom turmush tarzi va gigiyena ko‘nikmalarini rivojlantirish bo‘yicha MTT pedagoglari, hamshiralari, oshpazlari malakasini oshirish va pedagoglar uchun murabbiylik(mentorlik)ni amalga oshirish singari qator maqsadlarga erishishni nazarda tutadi.

2022-yil 22-iyun kuni Maktabgacha taʼlim vazirligi huzurida Jamoatchilik kengashining yigʻilishi hamda sohada amalga oshirilgan ishlar va rejalashtirilgan vazifalar yuzasidan matbuot anjumani boʻlib oʻtdi. I. Maktabgacha taʼlim tizimi boʻyicha 2017-2021-yillarda amalga oshirilgan ishlarning tahliliy maʼlumoti 2017-yilda maktabgacha taʼlim tizimiga ajratilgan mablagʻlarning (jami 2,0 trln.soʻm) YAIMdagi ulushi 0,7 foizni tashkil etgan boʻlsa,2021-yilda 7,3 trln.soʻm ajratilgan boʻlib bu koʻrsatkich 1,06 foizni tashkil etdi. Shu bilan birga, Davlat byudjeti xarajatlari tarkibidagi ulushi2017-yilda 4,46 foizni, 2021-yilda kelib 4,86 foizni tashkil etdi. 2017-2021-yillarda bolalarni maktabgacha taʼlim bilan qamrab olish darajasi ikki barobardan oshdi. Jumladan, 2017-yilda maktabgacha yoshdagi bolalarning 708 ming nafari, 2020-yilda 1 mln 700 ming nafari,(60,9 foiz) maktabgacha taʼlim bilan qamrab olingan boʻlsa, bugungi kunga qadar qoʻshimcha 257 ming nafar (+ 8,5 foiz) bola qamrab olinishi hisobiga ularning soni 1 mln 957 ming nafarga (69,4 foiz) yetdi. Respublikadagi barcha bolalar uchun bir xil boshlangʻich imkoniyatlarni yaratish yoʻlida har bir bolaning maktabga kirishidan bir yil oldin umumiy oʻrta taʼlimga majburiy bir yillik tayyorgarlikdan oʻtishga boʻlgan huquqi “Maktabgacha taʼlim va tarbiya” toʻgʻrisidagi qonun bilan kafolatlandi. Endilikda bolalar maktabga chiqishdan oldin bir yillik majburiy bepul maktabga tayyorlovdan oʻtkazilmoqda. Joriy yil yakuniga kelib qamrab olingan 6 yoshli bolalar soni 589 ming nafarga (83,8 foiz) yetdi. 2017-yildagi 5 211 ta maktabgacha taʼlim tashkilotlari soniga nisbatan besh barobarga oshib, hozirda 28 012tani (2020-yilda 18 254 ta) tashkil etmoqda. Tizimga xususiy sektorning jalb qilinishi natijasida nodavlat maktabgacha taʼlim tashkilotlari soni 250 tadan 21 600 taga yetdi. Jumladan, davlat-xususiy sherikchilik sohasidagi oilaviy maktabgacha taʼlim tashkilotlari soni 19 672 taga yetdi. Davlat-xususiy sherikchiligi asosidagi maktabgacha taʼlim tashkilotlarining 56 foiz tarbiyalanuvchilari imtiyozli shartlarda ota-ona toʻlovini amalga oshiradi. Ushbu maktabgacha taʼlim tashkilotlarini tashkil qilishga 2,2 trln. soʻm imtiyozli kredit mablagʻlari yoʻnaltirildi. Natijada maktabgacha taʼlimga jalb etilgan bolalarning 32 foizi nodavlat maktabgacha taʼlim tashkilotlarida taʼlim-tarbiya olmoqda. 2018-2021-yillarga moʻljallangan Investitsiya dasturlari doirasida1 424 ta (2021-yilda 199 ta) obyektlarda qurilish-taʼmirlash ishlari amalga oshirilishi natijada bolalar uchun qoʻshimcha 73 mingdan ortiq (2021-yilda 12 395) oʻrinlar yaratildi. Ijtimoiy himoyaga muhtoj oila farzandlari uchun bepul maktabgacha taʼlimning muqobil turlari joriy etildi. Jumladan: “Aqlvoy” loyihasi doirasida respublikadagi maktabgacha taʼlim tashkilotlari mavjud boʻlmagan hamda qamrov koʻrsatkichlari past boʻlgan142 ta MFYda 7 mingga yaqin bolalarni qamrab oladigan qayta jihozlangan 65 ta avtobuslar negizida 387 ta mobil guruhlar shakllantirildi. BMTning Xalqaro bolalar fondi YUNISEF tashkiloti bilan hamkorlikda tajriba-sinov tariqasida Namangan va Xorazm viloyatlarida8 ta maktabgacha taʼlimning “Turli xil yoshdagi maktabgacha taʼlim guruhlari” (oʻyin guruhlari) muqobil shakli joriy etilib, jami 400 nafar bola qamrab olindi. Shu kunga qadar Maktabgacha taʼlim vazirligi va xorijiy hamkorlar oʻrtasida Oʻzbekiston Respublikasida maktabgacha taʼlim tizimini rivojlantirishga qaratilgan 71 ta memorandum va kelishuvlar imzolandi. Maktabgacha taʼlim sohasiga xorijiy investitsiyalarni keng jalb etish boʻyicha 141 mln (2021-yilda 43,6 mln) AQSH dollari miqdorida xalqaro kelishuvlarga erishilgan. Shuningdek, maktabgacha taʼlim tashkilotlarini yuqori malakali kadrlar bilan taʼminlash hamda sifatli taʼlim xizmatini koʻrsatish boʻyicha ham muayyan ishlar amalga oshirilmoqda. 2021-2022 oʻquv yilidan boshlab Maktabgacha taʼlim vazirligi tasarrufidagi 96 ta pedagogika kollejlarida jami 54 551 nafar talaba oʻqimoqda. Shundan, kunduzgi taʼlim shakli bilan bir qatorda 11 300 dan ziyod talabalarni qamrab olgan holda ilk bor sirtqi, kechki va dual taʼlim shakllari ham joriy etildi. 2021-2022 oʻquv yilida Toshkent shahrida Puchon universitetining (Janubiy Koreya) “Maktabgacha taʼlim” yoʻnalishida 1 198 nafar talaba, “A.I.Gersen nomidagi Rossiya davlat pedagogika universiteti” Federal davlat-byudjet oliy taʼlim muassasasi filialining Maktabgacha taʼlim sohasiga oid 298 nafar talaba tahsil olmoqda. Maktabgacha taʼlim tizimidagi pedagoglar soni 2017-yilda 58 400 nafarni, 2021-yil yakunida esa 134 641 nafarni tashkil etdi. Shuningdek, oliy maʼlumotli pedagoglar salmogʻi 21,6 foizdan 33,8 foizgacha (2021-yilda +2,1 foiz) yetkazildi. 2017-2021-yillarda Maktabgacha taʼlim tashkilotlari direktor va mutaxassislarini qayta tayyorlash va ularning malakasini oshirish institutida 18 469 nafar rahbar, mutaxassis va pedagoglar malakasini oshirgan, 1 443 nafar nomutaxassis kadrlar qayta tayyorlash kurslaridan oʻtgan. 50 mingdan ortiq rahbar, mutaxassis va pedagoglar uchun kasbiy kompetensiyalarini rivojlantirish boʻyicha qisqa muddatli kurslar tashkil qilingan. 2018-2021-yillar davomida maktabgacha taʼlim tashkilotlariga 55 ming dona “Ilk qadam” dasturi va davlat talablari, 122 ming komplekt didaktik plakat va kartochkalar, 2 mln 768 ming dona ish daftarlari, 12,5 ming komplekt mavzuli rejalashtirish toʻplami, 153 ming komplekt didaktik oʻyinlar, 475 ming dona bolalarni rivojlantiruvchi oʻyinchoqlar, 80 ming komplekt badiiy adabiyotlar, pedagoglar uchun 255 ming dona oʻquv va metodik qoʻllanmalar yetkazib berildi. Inklyuziv taʼlim tamoyillari va imkoniyati cheklangan bolalarga yordam koʻrsatishning yangi shakllari joriy etilmoqda. Jumladan, Nukus, Qarshi shaharlari va Qibray tumanida “Imkon” reabilitatsiya markaziga ega boʻlgan koʻp tarmoqli ixtisoslashtirilgan va qoʻshma turdagi maktabgacha taʼlim tashkiloti kabi yangi shakllari joriy etildi. 2021-yilda barcha koʻp tarmoqli ixtisoslashtirilgan davlat maktabgacha taʼlim tashkilotlari reabilititsiya asbob uskunalari bilan taʼminlandi. Jahon sogʻliqni saqlash tashkiloti mutaxassislari bilan birgalikda bolalarni ovqatlantirish standartlari, jumladan, oziq-ovqat mahsulotlari roʻyxati hamda ovqat tayyorlash texnologiyasini koʻrib chiqilib, ushbu tamoyillarni amaliyotga tatbiq etish va bolalarning sogʻlom ovqatlanishini taʼminlash maqsadida maktabgacha taʼlim tashkilotlari uchun taomlar retsepti kitobi ishlab chiqildi. II. Maktabgacha taʼlim sohasida hal etilishi lozim boʻlgan dolzarb muammolar va ularni bartaraf etish yoʻllari. Birinchidan, respublikada 1,1 mingga yaqin MFYda maktabgacha taʼlim tashkilotlari mavjud emas. Buning uchun: - har yilgi Investitsiya va boshqa dasturlar doirasida davlat maktabgacha taʼlim tashkilotlarini qurish va boʻsh turgan obyektlarni rekonstruksiya qilish; - maktabgacha taʼlimning muqobil shakllarini joriy qilish; - qurilishning muqobil shakllaridan foydalanish; - yangi qurilish uchun xorijiy grant va kredit mablagʻlarini jalb qilish; - nodavlat sektorning sohadagi ulushini oshirish; - turar-joy binolarining birinchi qavatlaridan foydalangan holda yangi quvvatlarni yaratish ishlarini rivojlantirish. Ikkinchidan, maktabgacha taʼlim tashkilotlari xodimlarining oylik maoshlari pastligi kadrlar qoʻnimsizligini keltirib chiqarmoqda, shuningdek tajribali kadrlarni jalb etish imkoniyatlarini pasaytirmoqda. Maʼlumot uchun, oliy toifadagi tarbiyachining bazaviy tarif stavkasi 1,8 mln soʻmni; birinchi toifadagi 1,7 mln soʻmni; ikkinchi toifadagi 1,57 mln soʻmni va oliy maʼlumotli tarbiyachining bazaviy tarif stavkasi 1,45 mln soʻmni hamda oshxona oshpazining ish haqi miqdori 909 ming soʻmni tashkil etadi. Buning uchun: - maktabgacha taʼlim tashkiloti tarbiyachilari ish haqi miqdorini boshlangʻich sinf oʻqituvchilarining ish haqiga tenglashtirish; - maktabgacha taʼlim tizimi xodimlarining bazaviy tarif stavkalarini oshirish boʻyicha normativ-huquqiy hujjatni qabul qilish. Uchinchidan, maktabgacha taʼlim tashkilotlarida oliy maʼlumotli pedagog kadrlar ulushi atigi 33,8 foizni tashkil etadi. Oliy maʼlumotli kadrlar ulushini oshirish uchun: A.I.Gersen nomidagi Rossiya davlat pedagogika universiteti Toshkent filiali va Toshkentdagi Puchon universitetida maktabgacha taʼlim yoʻnalishlarida sirtqi taʼlim shaklini kengaytirish; A.I.Gersen nomidagi Rossiya davlat pedagogika universiteti bilan hamkorlikda “Komanda pedagogov pod klyuch” loyihasini amalga oshirish; maktabgacha taʼlim sohasida kadrlarni fanlararo integrativ tayyorlash, bunda maktabgacha taʼlim yoʻnalishida universal kadr tayyorlashni, yaʼni har bir bitiruvchi ham tarbiyachi, ham musiqa rahbari, ham jismoniy tarbiya yoʻriqchisi, ham xorijiy til oʻqituvchisi kompetensiyasi bilan tayyorlanishini taʼminlash boʻyicha takliflar ishlab chiqish; - Maktabgacha taʼlim tashkilotlari rahbar kadrlari zahirasini maqsadli oʻqitish kurslarini yoʻlga qoʻyish; - bakalavriatning nopedagogik taʼlim yoʻnalishlari bitirgan oliy maʼlumotli kadrlar uchun kasbiy qayta tayyorlash kurslarini, musiqa, jismoniy tarbiya, xorijiy til yoʻnalishlarini bitiruvchilari uchun pedagogik qayta tayyorlash kurslari tarmogʻini kengaytirish. Toʻrtinchidan, maktabgacha taʼlim tashkilotlari pedagog kadrlarining salohiyati past, rahbar va pedagog kadrlarning professional tayyorgarligi va mahoratini oshirib borishning samarali tizimi mavjud emas. Buning uchun: - KOICA ning “Oʻzbekistonda kadrlarni tayyorlash, oʻqitish va rivojlantirish boʻyicha Kompleks markazni tashkil etish orqali maktabgacha taʼlim tashkilotlari pedagog kadrlari salohiyatini oshirish” loyihasi doirasida tizimli ishlarni yoʻlga qoʻyish; nodavlat maktabgacha taʼlim tashkilotlaridagi pedagog kadrlarni malakasini oshirish, shu jumladan qisqa muddatli oʻquv kurslarini tashkil etish; - pedagog kadrlarni malakasini oshirishning koʻp ballik tizimga asoslangan uzluksiz, muqobil shakllarini tajriba-sinov tariqasida joriy etish; - pedagogika kollejlari bazasida oliy taʼlim muassasalari ishtirokida tajriba-sinov tariqasida “Maktabgacha taʼlim klasteri” faoliyatini yoʻlga qoʻyish; pedagog kadrlarning kasbiy rivojlanish monitoringini olib borishning elektron axborot tizimini joriy etish.

Anjuman 2022-yilning 13-iyun kuni soat 16:00da AOKAda “Sifatli taʼlim-inson kapitalini rivojlantirishning hal qiluvchi omili” hamda “Bogʻcha xodimlarining professional tayyorgarligi va mahoratini oshirib borishda olib borilayotgan amaliy ishlar” mavzularida boʻlib oʻtadi. ПРЕСС_РЕЛИЗ_Сифатли_таълим_борасидаги_матбуот_анжуманига.docx

Joriy yilning 2-3-iyun kunlari Sirdaryo viloyatida “Maktabgacha taʼlim tizimida Kuzatuv kengashi faoliyatini samarali tashkil etish” mavzusidagi Respublika seminari boʻlib oʻtdi. Birinchi kuni Qoraqalpogʻiston Respublikasi, Toshkent shahri va viloyatlardan tashrif buyurgan seminar ishtirokchilari kutib olindi.  Ikkinchi kuni ishtirokchilar Guliston tumanida “Maktabgacha taʼlim tashkilotlari faoliyatini boshqarish yuzasidan jamoatchilik nazoratini takomillashtirishda Kuzatuv kengashlari faoliyatining oʻrni” haqidagi maʼlumotlar bilan tanishish maqsadida “Terakzor” MFYdagi 15-sonli davlat maktabgacha taʼlim tashkilotiga tashrif buyurdi. Tashkilot Kuzatuv kengashining amaldagi faoliyati (meʼyoriy ish hujjatining yuritilishi, amaliy jarayonlar, taqdimotlar, treninglar, davra suhbatlari) haqida ishtirokchilarga maʼlumot berildi.  Dastlab ishtirokchilar ushbu tashkilotda Kuzatuv kengashi tomonidan yaratilgan «Eko bogʻ» va bolalarga yaratilgan sharoitlar bilan tanishdilar. Oʻzbekiston Respublikasi Maktabgacha taʼlim vazirligi vakillari tadbirni ochib berishdi.  Soʻngra mehmonlarga  Kuzatuv kengashi faoliyatiga oid taqdimot namoyish etildi. Shuningdek, shubalarga boʻlinib, amaliy faoliyat jarayonlari kuzatildi. 1-shubada Maktabgacha taʼlim tashkilotida Kuzatuv kengashi faoliyatini tashkil etishning dastlabki bosqichlari, 2-shubada Kuzatuv kengashining davlat maktabgacha taʼlim tashkilotining moddiy texnik bazasini mustahkamlashdagi roli, 3-shubada esa Kuzatuv kengashining asosiy faoliyat bosqichlari toʻgʻrisida maʼlumotlar berildi. Ushbu jarayonlar yakunida ishtirokchilar fikr-mulohazalari tinglandi hamda oʻzaro tajriba almashildi. Ikkinchi yoʻnalish Guliston tumanidagi “Beshbuloq” MFY dagi 13-sonli davlat maktabgacha taʼlim tashkilotida “kuzatuv kengashi va jamoat tashkilotlari hamkorligida bolalarga milliy urf-odatlar, anʼanalar va qadriyatlarni singdirish borasida amalga oshirilgan ishlar” mavzusidagi seminarga tashrif buyurildi. Dastlab 13-sonli davlat maktabgacha taʼlim tashkiloti “Koʻzmunchoq” nomli milliy musiqiy dastasining musiqiy dasturi namoyish etildi. Seminar davomida Guliston shahridagi 15-sonli davlat maktabgacha taʼlim tashkilotida Kuzatuv kengashi bilan hamkorlikda tashkil etilgan “Pedagog ustaxonasi” faoliyati va pullik taʼlim-tarbiya xizmatlari koʻrsatilishi toʻgʻrisidagi ish-tajribalarni oʻrganish maqsadida ushbu tashkilotga tashrif buyurildi. Shuningdek, ushbu tashkilotda Kuzatuv kengashi bilan hamkorlikda tashkil etilgan pedagog ustaxona faoliyati va pullik taʼlim-tarbiya xizmatlari koʻrsatish boʻyicha taqdimot koʻrsatildi. Bundan tashqari tashkilotning Kuzatuv kengashi bilan hamkorlikda tashkil etilgan pullik taʼlim-tarbiya xizmatlarining yoʻlga qoʻyilganligi boʻyicha amaliy mashgʻulotlar kuzatildi. “Pedagog ustaxonasi” faoliyatiga oid master-klass oʻtkazildi. Tadbir soʻnggida tarbiyalanuvchilar ijrosida “Ozod yurtim kelajagi” nomli musiqiy dastur namoyish etildi.Press reliz Sirdaryo Respublika seminari.docx

1-iyun - Xalqaro bolalarni himoya qilish kuni munosabati bilan Bogʻot, Shovot, Xiva tumanlarida va Urganch shahrida bittadan davlat xususiy sherikchiligi asosidagi maktabgacha taʼlim tashkilotlari faoliyati yoʻlga qoʻyildi. Gurlan tumanidagi «Oyilma» mahallasida esa 120 oʻringa moʻljallangan davlat maktabgacha taʼlim tashkiloti “Obod qishloq” davlat dasturi doirasida 2 yarim milliard soʻm mablagʻ evaziga yangidan qurildi. Urganch shahridagi 38-sonli mahallada ham yana bir «Shaxzoda» nomi bilan yangi DXSH asosidagi nodavlat MTT 100 nafar bola quvvatida faoliyat yurita boshladi. Loyihaning jami qiymati 3 mlrd 100 million soʻm boʻlib, shundan tadbirkorga 2 mlrd 300 million soʻm kredit ajratildi. Ushbu nodavlat bogʻchaning ochilishi natijasida Urganch shahridagi bolalarning maktabgacha taʼlimga qamrovi 100 foizga yetdi. Xiva tumanida yana bir yangi foydalanishga topshirildi. “Indavak” mahallasidagi bolalarning endilikda 295 nafari maktabgacha taʼlimga qamrab olindi. Buning hisobiga tumanda bolalar qamrovi 61.3 foizga yetdi. Yangi ochilgan davlat xususiy sherikligi asosidagi ushbu maktabgacha taʼlim tashkiloti 100 nafar bolajon uchun xizmat qiladi. Loyihaning jami qiymati 3 mlrd 446 million soʻm boʻlib, shundan tadbirkorga 2 mlrd 300 million soʻm kredit ajratildi.

Sankt-Peterburgdagi A.I.Gersen nomidagi Rossiya davlat pedagogika universiteti tashkil etilganining 225-yilligiga bagʻishlangan tadbirlarda ishtirok etish maqsadida, Maktabgacha taʼlim vazirligi rahbariyati hozirda Sankt-Peterburgga tashrif buyurishgan. Tashrif doirasida Oʻzbekiston delegatsiyasi Rossiya Federatsiyasi maorif vaziri S.S. Kravsov bilan uchrashadi, Rossiya universiteti tashkil etilganining yubiley sanasiga bagʻishlangan tantanali tadbirlarda ishtirok etadi, shuningdek, Rossiyaning yetakchi taʼlim markazlari “Isteʼdodlar akademiyasi” va “Raqamli texnologiyalar akademiyasi”ga tashrif buyurish va faoliyati bilan tanishishdir. Shu bilan birga, Rossiya tomoni bilan «Malыsh» loyihasi boʻyicha muzokaralar olib borish va «Komanda pedagogov «Komanda pod kluch» loyihasining dastlabki strategiyasi va konsepsiyasini muhokama qilish rejalashtirilgan.   Eslatib oʻtamiz, ushbu istiqbolli loyihalarni amalga oshirish boʻyicha memorandumlar 2021-yil 16-17-noyabr kunlari Moskva shahrida boʻlib oʻtgan ikkinchi Oʻzbekiston-Rossiya taʼlim forumi doirasida imzolangan edi.

Maktabgacha taʼlim vazirligi, Ichki ishlar vaziri Jamoat xavfsizligi departamenti Yoʻl harakati xavfsizligi xizmati, Xalq taʼlimi vazirligi, UNICEFning Oʻzbekistondagi vakolatxonasi hamda Sogʻliqni saqlash vazirligi global kampaniya doirasida Oʻzbekistonda yoʻl harakati xavfsizligi haftaligi boshlanganini eʼlon qildi. Jahon yoʻl harakati xavfsizligi haftaligining maqsadi koʻplab oʻlim va jarohatlanishlarga sabab boʻlayotgan yoʻl-transport hodisalari muammosiga eʼtibor qaratishdir. Bu yil global miqyosdagi kampaniya yuqori tezlikni kamaytirishga qaratilgan, chunki aynan shu holat jiddiy jarohatlar va oʻlimga olib keladigan asosiy sabablardan biridir. “Maktabgacha yoshdagi bolalar uchun, ularning atrofidagi transport visotalarini sezish qiyinroq. Ular atrofdagi vaziyatni baholay olmaydilar. Shu bois transport vositalaridan foydalanayotganda ota-onalar bolalar oʻrindiqlaridan foydalanmasliklari va bolaga xavfsizlik kamarini taqmasliklari, shuningdek, piyodalar yoʻlagida qarovsiz qoldirishi koʻpincha yoʻl-transport vositalarida bolalarning jarohatlanishi va halok boʻlishiga sabab boʻladi. Piyoda bolalar oʻzlarining eʼtiborsizligi tufayli aksariyat hollarda avtomobil gʻildiraklari ostiga tushib qolishadi, kattalar aybi bilan avtomobillarda yoʻlovchi bolalar jarohatlanib halok boʻladi”, deydi Maktabgacha taʼlim vaziri A.Shin. Oʻzbekistonda joriy yilning dastlabki uch oyida 1469 ta yoʻl-transport hodisasi qayd etilgan boʻlib, ulardan 204 tasi bolalar ishtirokida sodir boʻlgan, 39 tasi oʻlimga sabab boʻlgan. Qurbonlarning aksariyati oʻsmirlardir. Yoʻl-transport hodisalarining asosiy sabablari tezlikni oshirish (455 ta), yoʻl harakati qoidalariga rioya qilmaslik (110 ta) va zarur infratuzilmaning yoʻqligi (250 ta), jumladan, piyodalar oʻtish joyining yoʻqligi (804 ta) boʻlgan. Ayrim mamlakatlar tajribasi shuni koʻrsatadiki, oqilona sarmoya evaziga yoʻl-transport hodisalarining toʻliq oldini olish mumkin. Quyidagi chora-tadbirlar yoʻl-transport hodisalarida bolalar oʻlimini sezilarli darajada kamaytirishga koʻmak berishi mumkin: yoʻl harakatining barcha qatnashchilari, jumladan, oʻsmirlar va yoshlar uchun qonunlar ijrosini taʼminlaydigan milliy qonunchilik va siyosatni mustahkamlash; infratuzilma va avariyadan keyingi xizmatlar; maktab hududini yaxshilash dasturlari va maktab hududida yoʻl harakati qoidalarini buzganlik uchun jarimalar tizimini ishlab chiqish; yangi haydovchilarga haydovchilik guvohnomalarini berishning ishonchli tizimini ishlab chiqish va joriy etish; maktab oʻquvchilari uchun yoʻl harakati xavfsizligi boʻyicha oʻquv dasturlarini ishlab chiqish va amalga oshirish; aholi xabardorligini oshirish boʻyicha samarali tizimini ishlab chiqish va joriy etish; fuqarolik jamiyati tashkilotlarini qoʻllab-quvvatlash.

Kuni kecha, 2022–2026-yillarga moʻljallangan Yangi Oʻzbekistonning taraqqiyot strategiyasini “Inson qadrini ulugʻlash va faol mahalla yili”da amalga oshirishga oid Davlat dasturini ijrosini tashkil etish boʻyicha brifing boʻlib oʻtdi. Barchaga maʼlumki, bugungi kunda respublikada jami – 588 695 nafar 6 yoshli bolalar  maktabga tayyorlov tizimi bilan qamrab olingan. Ularning 162 208 nafari Majburiy bepul bir yillik boshlangʻich taʼlimga tayyorlov guruhlariga, 357 699 nafari toʻliq kunlik tayyorlov guruhlariga, 68 788 nafari qisqa muddatli tayyorlov guruhlariga jalb etilishi natijasida qamrov darajasi 83,8 foizga yetkazildi. Yangi Oʻzbekistonning taraqqiyot strategiyasini “Inson qadrini ulugʻlash va faol mahalla yili”da amalga oshirishga oid Davlat dasturining 38-maqsadga muvofiq, Maktabgacha taʼlimdagi qamrov darajasini hozirgi 67 foizdan kamida 80 foizga yetkazish belgilangan. Ushbu maqsadning 200-bandida 2022-yil yakuniga qadar 6 yoshli bolalarni maktabgacha tayyorlov tizimi bilan qamrab olish darajasini 90 foizga yetkazish koʻzda tutilgan. Bunda Davlat maktabgacha taʼlim tashkilotlarida qoʻyidagi guruhlar tashkil qilinadi: toʻliq kunlik guruhlar; 1-chorakda 11 347 ta 2-chorakda 11 372 ta 3-chorakda 11 409 ta 4 chorakda 11 474 ta qisqa muddatli guruhlar; 1-chorakda 6 250 ta 2-chorakda 6 303 ta 3-chorakda 6 483 ta 4 chorakda 6 615 ta majburiy bepul tayyorlov guruhlari. 1-chorakda 5 441 ta 2-chorakda 5 826 ta 3-chorakda 6 354 ta 4 chorakda 6 723 ta Xabaringiz bor, Oʻzbekiston Respublikasi Prezidentining “Qamrov darajasi past boʻlgan tumanlarda maktabgacha taʼlim tashkilotlari tarmogʻini kengaytirish boʻyicha qoʻshimcha chora-tadbirlar toʻgʻrisida”gi qarori doirasida 53 ta tumanda imzolanishi belgilangan 100 ta loyihadan 89 tasi bilan bitimlar imzolandi, bunda 9 ta loyiha kredit mablagʻlarini jalb qilmagan holda amalga oshirilmoqda, loyihaga oʻz ulushini kiritilgan 74 ta bitim boʻyicha -160,4 mlrd. soʻm kredit ajratish yuzasidan Moliya vazirligiga tavsiya berilgan. Bugungi kunda umumiy quvvati 21 950 oʻrin quvvatga ega 747 ta oilaviy nodavlat maktabgacha taʼlim tashkilotlari bilan bitimlar imzolandi. Davlat dasturining 201-bandiga muvofiq, Maktabgacha taʼlim tizimiga xususiy sektor mablagʻlarini jalb qilish orqali yangi nodavlat maktabgacha taʼlim tashkilotlari tashkil etiladi. 2022-yilda davlat-xususiy sherikchiligi asosidagi 1300 ta nodavlat maktabgacha taʼlim tashkilotlarini hamda oilaviy maktabgacha taʼlim tashkilotlarini tashkil etiladi. Vazirligimiz tomonidan maktabgacha taʼlim tizimi xodimlarini malakasini oshirish toifalarga ajratgan holda har bir toifa uchun oʻquv rejalari, ularning ichidagi modullarning mazmuni Janubiy Koreya, Singapur, Fransiya va Rossiya davlatlarining tajribalarini inobatga olgan holda oʻquv dasturlari, oʻquv uslubiy majmualari muvofiqlashtirildi. Hozirgi davrda Maktabgacha taʼlim vazirligi Gersen nomidagi Rossiya davlat pedagogika universiteti Toshkent shahridagi filiali bilan hamkorlikda tashkil etilgan, klaster usulida tajriba-sinov uchun qisqa muddatli kurslar uchun Sillabuslar va oʻquv uslubiy majmualari ishlab chiqildi. Shu bilan birga malaka oshirish kurslari faqat anʼanaviy tarzda oʻtkazilmasdan, malaka oshirish va qayta tayyorlash kurslari masofaviy shaklda (my.mdomoi.uz platformasi orqali) oʻtkazilishi joriy etildi. Oʻzbekiston Respublikasi Vazirlar Mahkamasining “Fargʻona va Namangan viloyatlarida tajriba-sinov tariqasida maktabgacha taʼlim tashkilotlari rahbar va pedagog kadrlarini malakasini oshirish boʻyicha Maktabgacha taʼlim klasterlari faoliyatini yoʻlga qoʻyish toʻgʻrisida”gi qaror loyihasi ishlab chiqilib, tegishli vazirlik va idoralari bilan kelishgan holda vazirlikning xati asosida Vazirlar Mahkamasiga kiritildi. Shuningdek, Oʻzbekiston Respublikasi Maktabgacha taʼlim vazirligi, Oʻzbekiston Respublikasi Oliy va oʻrta maxsus taʼlim vaziriligi, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasining “Maktabgacha taʼlim tashkilotlari rahbar va pedagog kadrlarining kasbiy bilimi, koʻnikmalari va mahoratini uzluksiz rivojlantirib borishning yangi tizimini tajriba-sinovdan oʻtkazish toʻgʻrisida” qoʻshma qarori bilan “Maktabgacha taʼlim klasterlarida maktabgacha taʼlim tashkilotlari rahbar va pedagog kadrlarining malakasini oshirish boʻyicha muvaqqat tartibi” tasdiqlandi. Davlat dasturining 39-maqsadi Maktabgacha taʼlim tizimida taʼlim sifatini yangi bosqichga olib chiqishga bagʻishlangan. Xususan, dasturning 202-bandida 3 ta vazifa belgilangan. Jumladan, bogʻcha xodimlarining professional tayyorgarligi va mahoratini oshirib borishning takomillashtirilgan tizimini joriy etish ham qayd etib oʻtilgan. Unga koʻra, maktabgacha taʼlim tizimi xodimlarining malakasini oshirish shakl va metodikalarini xalqaro tajriba asosida qayta koʻrib chiqiladi. Shuningdek, hududlarda davlat va nodavlat maktabgacha taʼlim tashkilotlari rahbar va pedagog kadrlarining kredit-modul tizimiga asoslangan uzluksiz malaka oshirish tizimi joriy etiladi. Shu bilan birga, maktabgacha taʼlim tizimi boshqaruv kadrlari zaxirasini maqsadli oʻqitish tizimini yoʻlga qoʻyish ham ushbu bandda sanab oʻtilgan. 40-maqsadda esa Maktabgacha taʼlim tizimida byudjet mablagʻlarining maqsadli va samarali sarflanishini taʼminlash belgilangan.   Xususan, dasturning 203-bandiga koʻra, Maktabgacha taʼlim tizimida moliyaviy jarayonlarning shaffof tarzda amalga oshirilishi uchun zarur sharoitlar yaratiladi. Ushbu band ijrosini amalga oshirish uchun maktabgacha taʼlim tashkilotlarida zamonaviy raqamli texnologiyalar va idoralararo elektron hamkorlik yoʻlga qoʻyiladi. Shu bilan birga Toshkent shahar, Bektemir tumanidagi davlat maktabgacha taʼlim tashkilotlarida yagona axborot tizimi tajriba-sinov tariqasida joriy etiladi.

“Oʻzbekistonda iqlim oʻzgarishi oqibatlarini yumshatish boʻyicha qisqa (2021-2023-yillar) va oʻrta muddatli (2023-2025-yillar) chora-tadbirlarni amalga oshirish rejasi”ning 44-bandiga muvofiq “Xalqaro Yer sayyorasi kuni munosabati bilan maktabgacha taʼlim tashkilotlarining tarbiyalanuvchilari oʻrtasida “Tabiat bolalar nigohida” mavzusida bolalar rasmlari tanlovi va Respublika koʻrgazmasini tashkil etish” vazifasi belgilangan. Mazkur band ijrosini ta’minlash maqsadida “Tabiat bolalar nigohida” mavzusida bolalar rasmlari tanlovining maktabgacha ta’lim tashkiloti, tuman (shahar), viloyat bosqichlari oʻtkazilib, hududiy boʻlinmalar bosqichida gʻolib deb topilgan rasmlar Respublika bosqichiga taqdim etilgan. Joriy yilning 29-aprel kuni Mirobod tumanida joylashgan 34-sonli Davlat maktabgacha ta’lim tashkilotida “Tabiat bolalar nigohida” mavzusidagi rasmlar tanlovi gʻoliblarni taqdirlash hamda tashkil etilgan “Tabiat bolalar nigohida” respublika koʻrgazmasining ochilish marosimi bo’lib o’tdi. Mazkur tanlov Maktabgacha ta’lim vazirligining tashabbusi bilan hududlarda, “Xalqaro Yer kuni” munosabati bilan maktabgacha taʼlim tashkilotlarining tarbiyalanuvchilari oʻrtasida oʻtkazildi. Tanlov va koʻrgazmaning: davlat maktabgacha taʼlim tashkiloti 1-bosqichi 10-20-mart kunlari; tuman (shahar) 2-bosqichi 20-30-mart kunlari; hududiy boshqarma 3-bosqichi 1-10-aprel kunlari oʻtkazildi. Tanlov va koʻrgazmaning Respublika bosqichida 14 ta hududdan 3 tadan yuborilgan umumiy 42 ta rasmlar ishtirok etadi. Shu yilning 27-aprel kuni Respublika bosqichiga taqdim etilgan 14 ta hududdan yuborilgan jami 42 ta rasmlar turli vazirlik va idoralar xodimlaridan iborat komissiya aʼzolari tomnidan baholandi hamda I, II, III oʻrin va nominatsiyalar gʻoliblari aniqlandi. Jumladan: I oʻrin - Dadamirzayev Gʻanimirza, Namangan viloyati Toʻraqoʻrgʻon tumani, 9-son DMTT II oʻrin - Saloxiddinova Xurshida, Samarqand viloyati Kattaqoʻrgʻon tumani,5-son DMTT II oʻrin - Xudayberganova Ziyoda, Xorazm viloyati Yangibozor tumani, 17-son DMTT III oʻrin - Tavakallova Shaxnoza, Buxoro viloyati Romitan tuumani, 29-son DMTT III oʻrin - Roʻzimov Shaxzodbek, Qoraqalpogʻiston Respublikasi Ellikqal’a tumani, 3-son DMTT III oʻrin - Abdusalomova Dilnozaxon, Toshkent shahri Uchtepa tumani, 360-son DMTT Oʻrin olgan va nominatsiyalar gʻoliblari vazirlikning diplom, faxriy yorliq va esdalik sovgʻalari bilan taqdirlandi. Nominatsiyalar g'oliblari.docx

Kuni kecha Oʻzbekiston Respublikasi Maktabgacha taʼlim vazirligida Koreyaning “EdulikGlobal” taʼlim kompaniyasi prezidenti va ijrochi direktori Chungrim Xon xonim boshchiligidagi delegatsiya bilan uchrashuv boʻlib oʻtdi. Suhbat chogʻida Maktabgacha taʼlim vazirligi oʻrtasidagi hamkorlikning bugungi holati va uni rivojlantirish istiqbollari va Koreyaning “EdulikGlobal” taʼlim kompaniyasining Oʻzbekiston Respublikasida maktabgacha taʼlim tizimini raqamlashtirishga qaratilgan hamkorlikda amalga oshirilayotgan S-board loyihasi doirasidagi ishlar muhokama qilindi. Uchrashuv davomida Chungrim Xon xonim “EdulikGlobal” kompaniyasi tomonidan Toshkent shahrining Bektemir tumanida Oʻzbekiston Respublikasi sharoitlariga moslashtirilgan dastlabki S-board dasturining 1.5-versiyasi eksperimental sinovdan oʻtkazildi. Toshkent shahri boʻylab, yil yakuniga qadar eksperimental sinovning keyingi bosqichlarida S-board dasturining 2.0 versiyasi sinovdan oʻtkaziladi. Eksperimental sinov jarayonlarida S-board dasturining yakuniy versiyasi ishlab chiqilib, keyinchalik respublikaning barcha maktabgacha taʼlim tashkilotlarida joriy etiladi. Shuningdek, Chungrim Xon xonim “EdulikGlobal” kompaniyasi maktabgacha taʼlim tizimiga yangi ilgʻor innovatsion gʻoyalar, ishlanmalar va texnologiyalarni yanada joriy etishning turli yoʻnalishlarida Maktabgacha taʼlim vazirligi bilan oʻzaro manfaatli hamkorlikni yoʻlga qoʻyish tarafdori ekanini alohida taʼkidladi. Xususan, “EdulikGlobal” kompaniyasi prezidenti Maktabgacha taʼlim vazirligi tizimidagi tashkilotlarida, Chungrim Xon xonim tomonidan ishlab chiqilgan - davlat xizmatchilari uchun ingliz tilini oʻrganadigan onlayn platformani ishga tushirishni taklif qildi. Mehmonlarning taʼkidlashicha, soʻnggi yillarda Oʻzbekistonda maktabgacha taʼlim sohasida amalga oshirilgan keng koʻlamli islohotlar natijasida salmoqli natijalarga erishilgan, shu bilan birgalikda respublikada maktabgacha taʼlim tizimidagi yangi yutuq va innovatsion yechimlarga erishish yoʻlida olib borilgan ishlar maktabgacha taʼlim sohasida yuksak natijalarga erishish uchun zamin yaratilgan.   Muzokaralar natijasida Oʻzbekiston Respublikasida oʻquv jarayonini rivojlantirishda birgalikdagi ishlarni davom ettirish toʻgʻrisida tomonlar kelishib olishdi.

Bugun UNICEF Maktabgacha taʼlim vazirligi va “Bilim Makon” axborot va pedagogika texnologiyalari innovatsion markazi bilan birga Learning Passport “Bolalik Akademiyasi” raqamli platformasini ishga tushirdi. Platforma Oʻzbekistonda maktabgacha taʼlimni qoʻllab-quvvatlashga qaratilgan.Learning Passport UNICEF va Microsoft hamkorligida yaratilgan boʻlib, moslashuvchan raqamli oʻquv platformasidir. Hozir platforma butun dunyo boʻylab millionlab bolalarning oʻqishini qoʻllab-quvvatlash uchun ishlatilmoqda.Mazkur platforma maktabgacha taʼlim pedagoglari uchun malaka oshirish kurslari; mashgʻulotlar rejalari; qoʻshimcha oʻqish uchun materiallar, raqamli taʼlim va tarbiya resurslari bilan taʼminlaydi. Bularning bari “Ilk qadam” maktabgacha taʼlim davlat oʻquv dasturi va Oʻzbekiston Respublikasining erta va maktabgacha yoshdagi bolalar rivojlanishi boʻyicha davlat talablari asosida ishlab chiqilgan.Maʼlumotlarga koʻra, bola miyasining 90 foizi 5 yoshga qadar rivojlanadi. Bu davrda ota-onalar va pedagoglar bolaga butun umri davomida taʼlim olishi uchun mustahkam poydevor qoʻyishda yordam berishlari mumkin. Buning uchun tarbiyalovchi va ragʻbatlantiruvchi muhit yaratishlari, bola bu orqali oʻrganishi, rivojlanishi va yutuqlarga erishisha olishi zarur.“Ushbu ahamiyatli davr hayotda faqat bir marta keladi, shu bois u maktabgacha yoshdagi millionlab bolalar uchun juda muhimdir. Ular butun umri davomida erishadigan jismoniy va ruhiy natijalar, moliyaviy taʼminlanganlik darajasi aynan shu vaqt ichida koʻrsatiladigan yordamga bogʻliq”, dedi maktabgacha taʼlim vaziri Agrippina Shin. Mazkur texnologik innovatsion gʻoya butun mamlakat boʻylab maktabgacha yoshdagi bolalarga maktabgacha taʼlim tashkilotlariga qatnashi yoki qatnamasligidan qatʼi nazar, yuqori sifatli oʻquv resurslaridan foydalanish imkonini beradi. “Maʼlumotlarga koʻra, aynan erta va maktabgacha yosh davrida sarmoya kiritish foydali. Bolalarni erta yoshidanoq tarbiyalash, himoya qilish, ragʻbatlantirish va qoʻllab-quvvatlash ijobiy oʻzgarishlarga olib keladi. Erta taʼlimga kiritilgan sarmoya 16 baravar koʻpayib qaytadi, – dedi UNICEFning Oʻzbekistondagi vakolatxonasi rahbari Munir Mamedzade. – Shuning uchun ham UNICEF Oʻzbekistonda Learning Passport “Bolalik akademiyasi” oʻquv platformasini ishga tushirish boʻyicha innovatsion yondashuvni tatbiq qildi. Ushbu platforma 3–6 yoshli bolalarning tarbiyachilari va ota-onalari oʻz bilim va koʻnikmalarini oshirishlariga imkon yaratadi”. “Bolalik akademiyasi” platformamiz eng avvalo sifatli taʼlim olamidir. Pedagoglar zamonaviy metodikalar asosida tayyorlangan mashgʻulotlardan foydalanishi, oʻz ustida ishlashlari uchun qoʻshimcha mutolaa manbalarini qoʻllashi, ota-onalar esa bola taʼlim tarbiyasi va parvarishi boʻyicha foydali maʼlumotlarni oʻzlari uchun kashf etishlari mumkin”, dedi Shahnoza Mirziyoyeva. “Bilim Makon” markazi direktori Oyatullo Rahmatullayevga koʻra: “Pedagoglar – bola hayotiga eng koʻp taʼsir koʻrsatadigan shaxslardan biri. Ular malaka oshirish kurslarida oʻqib, yangi bilim va koʻnikmalarni egallashlari va uni oʻz ish faoliyatlarida qoʻllashlari mumkin boʻladi. Tarbiyachilar zamonaviy va ilgʻor taʼlim amaliyotlaridan foydalanganda bolalar jismoniy, hissiy va taʼlimiy jihatdan oʻsishga erishadi. “Bolalik akademiyasi” pedagoglarimizning shaxsiy va kasbiy rivojlanishi uchun katta qulayliklar taqdim etadi”.Ota-onalar va vasiylar bolalar sogʻlom rivojlanishi uchun zarur boʻlgan poydevorni yaratadilar. “Bolalik akademiyasi” uyda taʼlim berish borasida beqiyos koʻmakchidir. U oddiy mashgʻulotlar kutubxonasi va ota-onalar uchun maslahatlar, birgalikda oʻynaladigan oʻyinlar boʻyicha koʻrsatmalarni oʻz ichiga oladi. Birgalikdagi oʻyinlar ota-onalar va bolalarning oʻzaro munosabatlarini rivojlantiradi.“Bolalik Akademiyasi” bolalar foydalanishi uchun ham qulay. Ular savodxonlik, hisoblash va ijtimoiy-hissiy koʻnikmalarni rivojlantiruvchi oʻyinlarni oʻynashlari, oʻz ona tillaridagi elektron kitoblarni oʻqishlari mumkin. Bundan tashqari, oʻquv-koʻngilochar videolarni tomosha qilish va yoshga mos kutubxonadan foydalanish imkoniyatlari ham mavjud.   “Bolalik akademiyasi”ni ishga tushirish orqali Oʻzbekiston boʻylab 20 mingga yaqin pedagogni qamrab olish, 1,5 millionga yaqin bolalarning oʻqish va rivojlanish natijalarini yaxshilash koʻzda tutilgan.

Jizzax viloyatining Doʻstlik tumanida bir kunda 3 ta DMTT foydalanishda topshirildi. Endilikda 520 nafar bolajonlar maktabgacha taʼlim tashkilotlariga qamrab olinadi.Joriy yilning 8-aprel kuni Jizzax viloyati Doʻstlik tumani “Navroʻz” mahallasida 10-son DMTT 140 oʻrinli, 3-son DMTT 240 oʻrinli, 7-son 140 oʻrinli DMTTlar foydalanishga topshirildi. Barcha sharoitlarga ega, keng va yorugʻ xonalar, sport va musiqa zallari, innovatsion taʼlim berishga ixtisoslashgan jihozlar endilikda kichkintoylarimizning porloq istiqboli uchun xizmat qiladi. Shuningdek, Surxondaryo viloyati Qumqoʻrgʻon tumanning chekka hududida joylashgan «Mehrobod» mahallasida 90 oʻrinli 26-sonli davlat maktabgacha taʼlim tashkilotining qurilish ishlari yakunlanib foydalanishga topshirildi. Ushbu tashkilot mahalliy byudjet mablagʻlari hisobidan yangidan qurildi. Bundan tashqari, aholi bandligini taʼminlash maqsadida, ushbu tashkilotga hududdagi 20 nafar pedagog va ishchi xodimlar ishga qabul qilish koʻzda tutilgani. Shuningdek, maktabgacha taʼlim tashkilotida 3 ta guruh uchun moʻljallangan, zarur mebellar bilan jihozlangan keng va yorugʻ xonalar, zamonaviy musiqa zali, shinam yotoqxona va barpo qilingan. «Mehrobod» mahallasida 327 nafar 3 yoshdan 7 yoshgacha boʻlgan bolalar mavjud boʻlsa, shularning 120 nafari ushbu davlat maktabgacha taʼlim tashkilotiga qamrab olinishi koʻzda tutilgan. Shundan 90 nafari kuni uzaytirilgan guruhda, qolgan 30 nafari qisqa guruhlarga qamrab olinadi. Shu bilan birga, Qumqoʻrgʻon tumanining “Hurriyat” mahallasida ham 140 oʻrinli 10-sonli davlat maktabgacha taʼlim tashkiloti ham bolajonlarga oʻz eshigini ochdi. Ushbu davlat maktabgacha taʼlim tashkiloti 1978-yil qurilgan boʻlib, 2021-yilda “Obod qishloq dasturi” asosida taʼmirga tushib, 1 mlrd 800 mln mablagʻ hisobidan kapital taʼmirlash ishlari olib borildi. Maktabgacha taʼlim tashkilotida 6 ta kuni uzaytirilgan va 2 ta qisqa guruh uchun moʻljallangan, zarur mebellar bilan jihozlangan keng va yorugʻ xonalar, zamonaviy musiqa zali, shinam yotoqxona, oshxona va yozgi ayvonchalar barpo qilingan.   “Hurriyat” mahallasida 398 nafar 3 yoshdan 7 yoshgacha boʻlgan bolalar mavjud boʻlsa, shularning 190 nafari ushbu davlat maktabgacha taʼlim tashkilotiga qamrab olinishi koʻzda tutilgan. Shundan 140 nafari kuni uzaytirilgan guruhda, qolgan 50 nafari qisqa guruhlarga qamrab olindi.

Qashqadaryo viloyati Qamashi tumanida bir kunning oʻzida 3 ta maktabgacha taʼlim dargohi faoliyat boshladi. Buning natijasida yana 300 nafar bolajonlar maktabgacha taʼlimga qamrab olindi. Jumladan, “Balandchayla” MFYda 150 oʻringa moʻljallangan 23-DMTT, “Toʻqboy” MFYda esa Nilufar Sanayeva rahbarligidagi 100 oʻrinli xususiy va «Savsantepa» MFYda Iroda Mengaliyeva tashabbusi bilan 50 oʻringa moʻljallangan oilaviy bolalar bogʻchasi faoliyat boshladi. Shu bilan birga Surxondaryo viloyati ham 4 ta maktabgacha taʻlim tashkiloti ochildi. Oltinsoy tumani “Oqarbuloq” mahallasida 90 oʻrinli yengil konstruksiya asosida qurilgan 25-sonli davlat maktabgacha taʼlim tashkiloti bolajonlarga oʻz eshigini ochdi. Ushbu tashkilotga hududdagi 24 nafardan ortiq pedagog va ishchi xodimlar ishga qabul qilindi. Shundan 2 nafar xodim “Ayollar daftari”da hamda 1 nafar xodim “Yoshlar daftari”da roʻyxatda turuvchi fuqarolardir. Viloyatdagi Boysun tumanning olis va togʻli hududida zamon talablariga mos maktabgacha taʼlim tashkiloti faoliyat boshladi. Boysun tuman markazidan 15 km olisda joylashgan “Toʻda” mahallasida 90 oʻrinli yengil konstruksiya asosida qurilgan 15-sonli davlat maktabgacha taʼlim tashkilotining oʻz faoliyatini boshladi. Ushbu tashkilotga hududdagi 25 nafardan ortiq pedagog va ishchi xodimlar ishga qabul qilindi. Shundan 6 nafar xodim “Ayollar daftari”da roʻyxatda turuvchi fuqarolardir. Surxondaryo viloyati Qiziriq tumani “Bogʻiston” mahallasida 50 oʻrinli 56-sonli oilaviy nodavlat maktabgacha taʻlim tashkiloti oʻz faoliyatini boshladi. Sherobod tumani “Chuqurkoʻl” mahallasida 90 oʻrinli yengil konstruksiya asosida qurilgan 38-sonli davlat maktabgacha taʼlim tashkilotining ochildi.   Ushbu tashkilot mahalliy byudjet mablagʻlari hisobidan yangidan qurildi. Bundan tashqari, aholi bandligini taʼminlash maqsadida, ushbu tashkilotga hududdagi 17 nafar pedagog va ishchi xodimlar ishga qabul qilindi. Shundan 2 nafar xodim “Ayollar daftari”da roʻyxatda turuvchi fuqarolardir. Shuningdek, Sirdaryo viloyati Mirzaobod tumanida bir kunda 3 ta davlat maktabgacha taʼlim tashkilotlarining yangi binolari foydalanishga topshirildi. Tumanning “Mirzo Ulugʻbek” mahallasida 150 oʻrinli 16-sonli davlat maktabgacha taʼlim tashkiloti investitsiya dasturi asosida 5 mlrd 700 mln soʻm mablagʻ evaziga yangitdan bunyod etildi. T.Axmedov mahallasida “Obod qishloq” dasturi bilan 150 oʻrinli 13-sonli davlat maktabgacha taʼlim tashkilotiga 4mlrd 300mln soʻm mablagʻ sarflandi. Tumanning “Navbahor” mahallasida joylashgan 20-sonli davlat maktabgacha taʼlim tashkiloti esa homiylik asosida qurilgan boʻlib, 7 mlrd mablagʻ evaziga 100 nafar bolajonni oʻz bagʻriga oldi.

Maktabgacha taʼlim vazirligi delegatsiyasi Parijda xizmat safarining uchinchi kuni navbatdagi samarali uchrashuvni oʻtkazdi. YUNESKO Bosh direktori Odri Azule xonim joriy yilning noyabr oyida Toshkent shahrida erta yoshdagi bolalarni tarbiyalash va taʼlim berish boʻyicha II Butunjahon konferensiyasini oʻtkazish masalasini muhokama qilish uchun tashkilot bosh ofisida vazirlik rahbariyatini qabul qildi. Vazirlar darajasidagi mazkur anjumanni oʻtkazish uchun Oʻzbekistonning mezbon davlat sifatida tanlanishi YUNESKO rahbariyati tomonidan toʻliq qoʻllab-quvvatlandi. Shu bois mazkur uchrashuv tashkilot Bosh direktoriga minnatdorchilik va hurmat-ehtirom bildirish uchun navbatdagi imkoniyat boʻldi. Odri Azule mamlakatimizning maktabgacha taʼlimni nafaqat mamlakat miqyosida, balki xalqaro miqyosda rivojlantirishga qoʻshayotgan hissasini yuqori baholadi.   Respublikamizning erta rivojlanish sohasidagi yutuqlari sezilarli boʻlib, xalqaro ekspertlar va hamkorlar tomonidan haqli ravishda baholanmoqda.

Bugun Oʻzbekiston Respublikasi Prezidenti Administratsiyasi huzuridagi Axborot va Ommaviy Kommunikatsiyalar Agentligida Maktabgacha taʼlim vazirligining “Davlat-xususiy sherikligi xususidagi muammolar va ularning yechimlari borasidagi amalga oshirilayotgan ishlar” mavzusida matbuot anjumani boʻlib oʻtdi. Ushbu matbuot anjumanida soha mutaxassislari tomonidan 2017 — 2021-yillarda maktabgacha taʼlim tizimini tubdan isloh qilish va takomillashtirish, maktabgacha taʼlim tashkilotlarini davlat tomonidan boshqarishning samarali tizimini yaratish hamda uning moddiy-texnika bazasini mustahkamlashda davlat-xususiy sherikligi hamda nodavlat sektorini rivojlantirishga qaratilgan loyihalar va bu borada olib borilgan ishlar, natijalar, kamchiliklar, yutuqlar haqida soʻz yuritilib, quyidagilar maʼlum qilindi: Maktabgacha taʼlim tizimini, shu jumladan maktabgacha taʼlim xizmatlari nodavlat sektorini yanada rivojlantirish, maktabgacha taʼlim tashkilotlari tarmogʻini kengaytirish va moddiy-texnika bazasini mustahkamlash, bolalarning maktabgacha taʼlim tizimiga yanada kengroq qamrab olinishini taʼminlash hamda maktabgacha taʼlim sohasidagi davlat-xususiy sherikchiligi uchun qulay shart-sharoitlar yaratish maqsadida, davlat-xususiy sheriklik yoʻnalishida Oʻzbekiston Respublikasi Prezidentining 3 ta, Oʻzbekiston Respublikasi Vazirlar Mahkamasining 13 ta qarorlari qabul qilinib hozirgi kunga qadar amal qilinmoqda. Qabul qilingan qarorlar ijrosi sifatida 2018-2021-yillarda davlat-xususiy sheriklik asosida 179 270 quvvatga ega nodavlat maktabgacha taʼlim tashkilotlarini tashkil etish uchun 1 733 nafar tadbirkorlar bilan bitimlar imzolangan. 2018-2021-yillarda davlat-xususiy sheriklik asosida 20 643 nafar tadbirkorlar tomonidan 626 374 quvvatga ega nodavlat maktabgacha taʼlim tashkilotlari faoliyati yoʻlga qoʻyildi hamda 70 mingdan ortiq yangi ish oʻrinlari yaratildi. Xususan, 116 267 quvvatga ega 1 154 ta davlat-xususiy sheriklik hamda 510 107 quvvatga ega 19 489 ta oilaviy nodavlat bogʻchalar faoliyati yoʻlga qoʻyilgan. Jami faoliyati boshlangan 20 643 ta davlat-xususiy sheriklik asosidagi nodavlat maktabgacha taʼlim tashkilotlariga qamrab olingan 626 374 nafar bolalarning 384 593 (61,4%) nafari ijtimoiy koʻmakka muhtoj oila farzandlari hisoblanadi (DXSH loyihalarida 28 601 (24,6%), oilaviy loyihalarda 360 135 nafari (70,6%). Oʻzbekiston Respublikasi Prezidentining “Qamrov darajasi past boʻlgan tumanlarda maktabgacha taʼlim tashkilotlari tarmogʻini kengaytirish boʻyicha qoʻshimcha chora-tadbirlar toʻgʻrisida” 2021-yil 10-iyundagi PQ-5144-sonli qaroriga asosan qamrovi past boʻlgan tumanlarda 54 825 oʻringa moʻljallangan 2 033 ta oilaviy shakldagi bitimlar imzolandi va oʻz faoliyatini boshladi. Natijada, bolalarni maktabgacha taʼlimga qamrab olishda davlat-xususiy sheriklik ulushi 2019-yilga nisbatan 14,0 foizdan 31 foizga oshirildi. Moliya vazirligi va hududlarga biriktirilgan tijorat banklari bilan hamkorlikda 118 042 quvvatga ega 1 155 ta loyihalarni imtiyozli kreditlar bilan moliyalashtirish uchun 2,1 trln. soʻm miqdorida resurs mablagʻi yoʻnaltirildi. Qolgan loyihalar oʻrnatilgan tartibda moliyalashtirish ishlari amalga oshirilmoqda. Qamrovi past boʻlgan tumanlarda Ishchi guruhi tomonidan koʻrib chiqilgan 90 ta davlat xususiy sheriklik bitimlari imzolanib, oʻrnatilgan tartibda Moliya vazirligiga moliyalashtirish uchun yoʻnaltirildi. 2018-2021-yillarda davomida davlat-xususiy sheriklik asosida 179 270 quvvatga ega 1 733 nafar tadbirkorlar bilan bitimlar imzolangan. Shundan: 118 042 quvvatga ega 1 155 ta loyiha toʻliq moliyalashtirildi; 19 643 quvvatga ega 180 ta loyihaga kredit talab etilmaydi; 7945 quvvatga ega 64 ta loyihaga imtiyozli kredit ajratish uchun tavsiya berildi; 5350 quvvatga ega 48 ta loyiha Saudiya taraqqiyot fondi tomonidan moliyalashtirilishi rejalashtirilgan; 10 975 quvvatga ega 97 ta loyihaga biriktirilgan tijorat tomonidan oʻrnatilgan tartibda oʻz mablagʻlari hisobidan imtiyozli kredit ajratish ishlari olib borilmoqda. 14 550 quvvatga ega 166 ta bilan bitim bekor qilindi (tadbirkorlarning oʻz mablagʻi evaziga davom ettirish hamda iqtisodiy jihatdan samarasiz deb topilgan loyihalar) 2 765 quvvatga ega 23 ta loyihalar bilan bitim bekor qilish ishlari olib borilmoqda 2018-2020-yillarda imtiyozli kredit ajratilgan, biroq bitimda koʻrsatilgan muddatda oʻz faoliyatini boshlamagan loyihalar soni 74 tani tashkil etadi. 74 ta loyihalardan 46 tasi boʻyicha 9 mlrd. 712 mln.soʻm penya undirish maqsadida sudlardagi daʼvo arizalar qondirildi. Qolgan 28 ta muammoli loyihalar boʻyicha daʼvo arizalari tayyorlanmoqda. Islom taraqqiyot banki hamda Neftni eksport qiluvchi mamlakatlar tashkiloti (OPEK) hamkorligida jami 53 mln. AQSH dollari miqdorida imtiyozli mablagʻlarni ajratilishi hisobiga 200 dan ziyod davlat-xususiy sheriklik loyihalarini amalga oshirilishi yuzasidan muzokaralar olib borilmoqda. Kelishuvga erishilgan taqdirda 2023-yildan boshlab loyihalar moliyalashtirilishi rejalashtirilgan. 2022-yilda amalga oshiriladigan asosiy vazifalar. 2022-yilda davlat-xususiy sheriklik asosida 100 ta hamda 1 200 ta oilaviy shakldagi nodavlat maktabgacha taʼlim tashkilotlarini tashkil etish orqali qoʻshimcha 45 000 dan ziyod quvvat hamda 4 000 ta yangi ish oʻrinlarini yaratish rejalashtirilgan.   Saudiya taraqqiyot jamgʻarmasi bilan umumiy qiymati 10,9 mln. AQSH dollari miqdoridagi “Maktabgacha taʼlim tashkilotlarini yaratish” loyihasini amalga oshirish boʻyicha ikki tomonlama kelishuvga erishilgan. Kelishuvga asosan 5 350 quvvatga ega 48 ta loyiha moliyalashtirilishi nazarda tutilgan.

Abdulla Qodiriy nomidagi Jizzax davlat pedagogika institutida “Talaba ishga joylashadi” shiori ostida oʻtkazilgan mehnat yarmarkasida Jizzax viloyat maktabgacha taʼlim boshqarmasi xodimlari, boshqarma tasarrufidagi tuman boʻlimi mudirlari ishtirok etdilar. Boshqarma tasarrufidagi davlat maktabgacha taʼlim tashkilotlarida mavjud 109 ta vakant oʻrinlarga 200 dan ziyod talabalardan murojaat qabul qilindi. Qabul qilingan murojaatlar boʻyicha boshqarma hamda institutning maktabgacha taʼlim fakulteti bilan memorandum imzolandi. Shuningdek, Xalq deputatlari viloyat kengashining 34-sessiyasi boʻlib oʻtdi. Sessiyada Jizzax viloyat maktabgacha taʼlim boshqarmasi tomonidan Oʻzbekiston Respublikasi Qonunining ijrosi yuzasidan amalga oshirilgan ishlar haqida maʼlumot berildi. Sessiya davomida viloyat hokimining buyrugʻi bilan Jizzax viloyat maktabgacha taʼlim boshqarmasi uchun alohida bino ajratildi.

Oʻzbekiston Respublikasi Vazirlar Mahkamasining “Moliya vazirligi huzurida davlat moliyaviy nazorati inspeksiyasi faoliyatini tashkil etish hamda byudjet tashkilotlarida moliyaviy nazoratni takomillashtirish chora-tadbirlari toʻgʻrisida”gi qarori qabul qilindi. Unga muvofiq: a) 2022-yil 1-apreldan boshlab Sirdaryo viloyatida tajriba-sinov tariqasida, 1-iyundan boshlab esa respublikaning qolgan barcha hududlarida: davlat maktabgacha taʼlim tashkilotlari va davlat-xususiy sheriklik asosida faoliyat yuritayotgan maktabgacha taʼlim tashkilotlari (keyingi oʻrinlarda — DXSH tashkilotlari) xodimlarining ishga kelib-ketishini hisobga olish (oʻz xodimlarini saqlash uchun davlat byudjetidan subsidiya olmaydigan davlat-xususiy sheriklik asosida faoliyat yuritayotgan maktabgacha taʼlim tashkilotlari bundan mustasno) hamda tarbiyalanuvchilarning davomatini yuritish shaxsni biometrik identifikatsiya qilish texnologiyasi orqali hisobga olinadi hamda mobil ilova yordamida Oʻzbekiston Respublikasi Maktabgacha taʼlim vazirligining “Bolalar bogʻchasi” maktabgacha taʼlimni boshqarish axborot tizimida (keyingi oʻrinlarda — “Bolalar bogʻchasi” axborot tizimi) va nodavlat maktabgacha taʼlim tashkilotlarini boshqarish axborot tizimida (keyingi oʻrinlarda — NMTTBAT) hisobi yuritiladi; DXSH tashkilotlarining davlat xususiy-sheriklik boʻyicha bitimlari NMTTBATda elektron shaklda tuziladi va tomonlarning elektron raqamli imzolari bilan tasdiqlanadi; DXSH tashkilotlariga, shu jumladan, oilaviy nodavlat maktabgacha taʼlim tashkilotlari hamda xususiy maktabgacha taʼlim tashkilotlariga ajratiladigan subsidiyalar va kompensatsiyalar hajmi “Bolalar bogʻchasi” axborot tizimi, NMTTBAT, “Mehnat.uz”, “Soliq.uz”, “UzASBO” hamda elektr energiyasi va tabiiy gaz taʼminoti va boshqa tashkilotlarning axborot tizimlaridagi maʼlumotlardan foydalangan holda avtomatik ravishda hisoblab chiqiladi; b) DXSH tashkilotlarida subsidiyalarni berish jarayonini raqamlashtirishda ushbu tashkilotlarda foydalaniladigan jihozlarni xarid qilish, aloqa xizmatlari va NMTTBATdan foydalanish bilan bogʻliq xarajatlar DXSH tashkilotlarining oʻz mablagʻlari hisobidan amalga oshiriladi; v) 2022-yil 1-iyundan boshlab DXSH tashkilotlariga subsidiyalar miqdorlari faqat shaxsni biometrik identifikatsiya qilish texnologiyalari orqali yigʻilgan elektron maʼlumotlar asosida NMTTBATda hisoblanadi va 2022-yil 1-iyuldan boshlab shakllantirilgan elektron buyurtmanoma va hisobotlar asosida toʻlanadi; g) mazkur bandning “a”, “b”, «v» kichik bandlarda belgilangan talablarni bajarmagan DXSH tashkilotlari va xususiy maktabgacha taʼlim tashkilotlariga subsidiyalar va kompensatsiyalar ajratilmaydi; d) “Bolalar bogʻchasi” axborot tizimi va NMTTBATni davlat hamda DXSH tashkilotlarida joriy etish natijasida iqtisod qilinadigan mablagʻlar ushbu axborot tizimlarini takomillashtirish va hududlarda joriy etishga hamda Maktabgacha taʼlim vazirligining boshqa vazifalarini bajarishga yoʻnaltiriladi; ye) 2022-yil 1-apreldan boshlab: maktabgacha taʼlim tashkilotlarining byudjetdan tashqari rivojlantirish jamgʻarmasi mablagʻlari boʻyicha rasmiylashtiriladigan moliyaviy va buxgalteriya hujjatlariga birinchi imzo qoʻyish huquqi ushbu tashkilotlarning direktorlariga beriladi; oilaviy nodavlat maktabgacha taʼlim tashkilotida 3 yoshdan 7 yoshgacha boʻlgan 12 — 50 nafar bolaga tarbiya berilishi uchun subsidiyalar ajratiladi.   Bunda yollangan tarbiyachi va yordamchi xizmatchilarga tegishli toifa boʻyicha 9 soatlik davlat maktabgacha taʼlim tashkilotlari uchun belgilangan mehnatga toʻlanadigan haqqa teng shartlarda va hajmlarda ish haqi toʻlanadi hamda birinchi guruh 25 nafar tarbiyalanuvchilardan iborat boʻlganda, qoʻshimcha kamida 12 nafar tarbiyalanuvchilar roʻyxati NMTTBATga kiritilgandan soʻng ikkinchi guruh avtomatik ravishda shakllantirilib, belgilangan shtat birliklari ajratilishiga ruxsat etiladi.

Yurtimizga Navroʻzi olam kirib kelishiga ham oz fursat qoldi. Ushbu bayram arafasida barcha hududlarda katta-katta tadbirlar oʻtkazilmoqda. Xususan, Toshkent shahar Shayxontohur tumani MTB tasarrufidagi 229-241-sonli davlat maktabgacha taʼlim tashkilotlari tarbiyalanuvchilari ishtirokida ham “Assalom Navroʻz” tadbirdan tashkil etildi.  Tadbirda bolajonlar ishtirokida sahna koʻrinishlari namoyish etildi hamda raqslar ijro etildi.

Joriy yilning 16-17-mart kunlari Toshkent shahrida sportning oʻzbek jang sanʼati doirasidagi “Kompleks mashq”, “Temuriylar jang usuli”, “Koʻrgazmali chiqish”, “Assalom tong” yoʻnalishlari boʻyicha Oʻzbekiston birinchiligi oʻtkazildi.   Turnirda Namangan viloyati Chortoq tumani Maktabgacha taʼlim boʻlimi xotin-qizlaridan tarkib topgan jamoa Namangan viloyati sharafini munosib himoya qildi. Ular musobaqaning “Assalom tong!” yoʻnalishi boʻyicha faxrli 1-oʻrinni egalladi.

Namangan viloyatining Uychi tumani Ovchibuloq mahallasida bironta ham MTTboʻlmagan. Aholi murojaatlari asosida qariyb 7 milliard soʻmga qurilgan 50-sonli davlat maktabgacha taʼlim tashkiloti oʻz faoliyatini boshladi. Tashkilot 180 nafar oʻringa moʻljallangan boʻlib, ota-onalik badal toʻlovi 50 foizni tashkil etadi. Shu bilan birga, viloyatning Uchqoʻrgʻon tumanida ham 25-sonli DMTT bolajonlarga eshik ochdi. Tashkilotni qurish uchun 3 mlrd 96 mln soʻm sarflangan boʻlib, 120 oʻringa moʻljallangan. MTT ish boshlashi natijasida 20 dan ortiq ish oʻrni yaratildi.   Ushbu 2 ta MTTning ochilishi 300 nafar bolaning qamroviga sabab boʻldi.

O‘zbekiston Respublikasi Maktabgacha ta’lim vazirligida Jahon sog‘liqni saqlash tashkilotining O‘zbekistonda reabilitatsiyani kuchaytirish bo‘yicha ekspert missiyasining ekspertlar guruhi bilan uchrashuv bo‘lib o‘tdi. Uchrashuvda Maktabgacha ta’lim vaziri o‘rinbosari Uzoqboy Begimqulov imkoniyati cheklangan bolalarning maktabgacha ta’lim tizimini takomillashtirish borasida amalga oshirilayotgan ishlar haqida ma’lumot berdi. Davlat ixtisoslashtirilgan maktabgacha ta'lim tashkilotlarida ko'p tarmoqli kompleks yondashuv amalga oshirilmoqda, bunda alohida ta'limga muhtoj bolalarga maktabgacha ta'lim bilan birgalikda yuqori sifatli reabilitatsiya yordami ko'rsatiladi. Bu esa bolalikdan nogironlikning oldini olish va kamaytirishga yordam beradi. Shu bilan birga bolalarning ijtimoiy moslashuvi, nogiron bolalarning har tomonlama hayotiy faoliyati va jamiyat hayotiga faol jalb etilishini ta'minlanadi.   Uchrashuvda maktabgacha yoshdagi bolalarni reabilitatsiya qilish bo‘yicha mavjud vaziyatning ustuvor masalalari muhokama qilinib, Jahon sog‘liqni saqlash tashkiloti mutaxassislari bilan o‘zaro hamkorlik qilish belgilab olindi.

Joriy yilning 4-mart kuni Maktabgacha taʼlim vazirligida “Maktabgacha taʼlim vazirligining faoliyatiga doir hisoboti — tizimdagi 2021-yil natijalari, 2022-yilda rejalashtirilgan vazifalar” mavzusida matbuot anjumani boʻlib oʻtdi. Unda Maktabgacha taʼlim vaziri Agrippina Shin, vazir oʻrinbosarlari, vazirlik masʼul xodimlari, shuningdek ommaviy axborot vositalari xodimlari ishtirok etdi. 2021-yilda Maktabgacha taʼlim tizimiga respublika byudjetidan jami 6,7 trln. soʻm mablagʻ ajratilib, hisobot davrida 6,6 trln. soʻm (98%) mablagʻ xarajat qilingan. Jumladan: Maktabgacha taʼlim vazirligi markaziy apparatini saqlash xarajatlari uchun 10,7 mlrd. soʻm mablagʻ ajratilib, ijrosi 10,5 mlrd. soʻmga (98%); Maktabgacha taʼlim vazirligining markazlashgan mablagʻlari hisobidan davlat maktabgacha taʼlim tashkilotlarini jihozlash, mantiqiy oʻyin, oʻyinchoqlar, oʻquv-didaktik materiallar bilan taʼminlashga 181 mlrd. soʻm mablagʻ ajratilib, ijrosi 177,1 mlrd. soʻmga (97,8%); Maktabgacha taʼlimni rivojlantirish jamgʻarmasiga 103,6 mlrd. soʻm (100%); Davlat maktabgacha taʼlim tashkilotlarining birinchi va ikkinchi guruh xarajatlariga 4,0 trln. soʻm mablagʻ ajratilib, ijrosi 4,0 trln. soʻmga (100%); Nodavlat maktabgacha taʼlim tashkilotlariga subsidiya uchun 1,2 trln. soʻm mablagʻ ajratilib, ijrosi 1,2 trln. soʻmga (100%); Nodavlat maktabgacha taʼlim tashkilotlarini oʻquv-metodik materiallar bilan taʼminlashga 39,2 mlrd. soʻm mablagʻ ajratilib, ijrosi 34,9 mlrd. soʻmga (89,2%); Aqlvoy dasturi doirasida mobil avtobuslar xarid qilishga 2,6 mlrd. soʻm (100%); Kadrlar tayyorlash, ularning malakasini oshirish va qayta tayyorlash xarajatlariga 50,7 mlrd. soʻm mablagʻ ajratilib, ijrosi 49,4 mlrd. soʻmga (97,4%); "Imkon" reabilitatsiya markaziga ega koʻp tarmoqli ixtisoslashtirilgan maktabgacha taʼlim tashkilotini saqlash xarajatlariga 1,4 mlrd. soʻm mablagʻ ajratilib, ijrosi 511,8 mln. soʻmga (36%); Investitsiya dasturi doirasida davlat maktabgacha taʼlim tashkilotlari obyektlarini qurish, rekonstruksiya qilish va kapital taʼmirlash ishlariga 1,1 trln. soʻm mablagʻ ajratilib, ijrosi 991 mlrd. soʻmga (88,4%) bajarilgan. 2021-yilda respublikada 8 849 ta (190 ta davlat, 8 539 ta oilaviy va DXSH asosidagi 120 ta nodavlat MTT) maktabgacha taʼlim tashkilotlari faoliyatini yoʻlga qoʻyilishi natijasida bolalarning maktabgacha taʼlim bilan qamrovi 6.1 foizga oshirildi. Maktabgacha taʼlimning hududiy boshqaruv organlari bilan birgalikda tungi smenada ishlovchi ayollarning farzandlari uchun 24 soatlik guruhlarni tashkil etishga boʻlgan haqiqiy ehtiyoj 6 196 ta davlat maktabgacha taʼlim tashkilotlaridagi 980 325 nafar bolalarning qonuniy vakillari oʻrtasida soʻrovnomalar oʻtkazish orqali oʻrganib chiqildi. Soʻrovnomalar natijasiga asosan, joriy yilning 1-iyun kunidan boshlab respublikaning 5 ta hududida jumladan, Andijon viloyatida — 25 ta, Buxoro viloyatida —10 ta, Jizzax viloyatida —4 ta, Navoiy viloyatida —4 ta, Xorazm viloyatida —5 ta, jami 48 ta 24 soatlik guruhlar faoliyati yoʻlga qoʻyildi. Bugungi kunda respublikada jami 27 103 ta maktabgacha taʼlim tashkiloti faoliyati yoʻlga qoʻyilgan boʻlib, ularning 6 387 tasi davlat va 20 716 tasi nodavlat (774 ta xususiy, 18 797 ta oilaviy va DXSH asosidagi 1 145 ta nodavlat MTT) maktabgacha taʼlim tashkilotlaridir. Maktabgacha yoshdagi 2,9 mln. nafar bolalardan 1,9 mln. nafari yoki 67% bolalar maktabgacha taʼlimga qamrab olingan boʻlsa, ularning 566 996 nafarini (82%) 6 yoshli bolalar tashkil etmoqda. 2022-yilda bolalarni maktabgacha taʼlimga qamrovini 70,7% ga yetkazish rejalashtirilgan. 2021-yilda 13 098 quvvatga ega 120 ta DXSH asosidagi NMTT lar hamda 239 484 quvvatga ega 8 553 ta oilaviy shakldagi NMTTlar tashkil etilishiga erishildi. Natijada, 252 582 ta qoʻshimcha quvvat (120 ta DXSH asosidagi NMTT va 8 553ta oilaviy MTTlar) hamda 22 720 ta yangi ish oʻrinlari yaratildi.  “Oʻzbekiston Respublikasi maktabgacha taʼlim tashkilotlarining xavfsiz va oqilona ovqatlanishini tashkil etishga qoʻyiladigan gigiyenik talablar” Sanitariya qoida va meʼyorlari (SanPiN) qayta koʻrib chiQilib, Oʻzbekiston Respublikasi Adliya vazirligi tomonidan roʻyxatdan oʻtkazildi. Maktabgacha taʼlim tizimidagi davlat-xususiy sheriklik va oilaviy nodavlat maktabgacha taʼlim tashkilotlarida sogʻlom ovqatlantirishni tashkil etish boʻyicha yoʻriqnoma hamda “Maktabgacha taʼlim yoshidagi bolalar uchun mavsumiy taomnoma”lar ishlab chiqildi. Maktabgacha taʼlim tashkilotlari uchun taomlar “Aqlvoy-oshpaz” nomli retseptlari kitobi ishlab chiqildi. Retseptlar kitobiga kiritilgan taomlar uchun texnologik kartalar asosida taomlarni tayyorlash jarayoni tajribadan oʻtkazildi. Ikki yuz ellikdan ortiq taomlarni tayyorlash texnologiyalari, sifat xarakteristikalari yangitdan yozib chiqildi. Tasdiqlangan manzilli dasturga muvofiq 222 ta obyektdan: - 41 ta obyekt oldingi yildan oʻtuvchi; - 181 ta yangidan boshlanuvchi obyektlar hisoblanadi. Bugungi kun holatiga 2021-yil Investitsiya dasturi doirasidagi 222 ta maktabgacha taʼlim tashkiloti obyektlaridan 199 tasida qurilish – taʼmirlash ishlari yakunlandi. 2021-yilda barcha manbalar hisobidan 3 ta loyiha doirasida 50,6 mln.AQSH dollari miqdoridagi mablagʻlar oʻzlashtirildi shundan: xalqaro moliya institutlari mablagʻlari – 35,8 mln. AQSH dollari; begʻaraz koʻmak (grant) xorijiy investitsiyalar – 14,8 mln. AQSH dollari Hisobot davrida Maktabgacha taʼlim sohasiga xorijiy investitsiyalarni keng jalb etish maqsadida 43,6 mln AQSH dollari miqdorida xalqaro kelishuvlarga erishilgan. Shu bilan birga, Prezidentning “2022 — 2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida”gi farmonida Maktabgacha taʼlim vazirligining zimmasiga 3 ta vazifa yuklatilgan. Xususan, 2022/2023-yillarda 6 yoshli bolalarni maktabgacha tayyorlov tizimi bilan qamrab olish darajasini 90 foizga, 2024/2025 oʻquv yili yakuniga qadar 100 foizga yetkaziladi. Maktabgacha taʼlim tizimiga xususiy sektor mablagʻlarini jalb qilish orqali 7 mingdan ziyod yangi nodavlat maktabgacha taʼlim tashkilotlari tashkil etiladi. Bogʻcha xodimlarining professional tayyorgarligi va mahoratini oshirib borishning takomillashtirilgan tizimi joriy etiladi. 2022 — 2026-yillarda 160 mingdan ziyod pedagog kadrlarning malakasini oshiriladi. Maktabgacha taʼlim tizimida moliyaviy jarayonlarning shaffof tarzda amalga oshirilishi uchun zarur sharoitlarni yaratiladi.

2020-yilning 6-noyabr kuni Maktabgacha taʼlim vazirligi uyushtirgan press-tur doirasida Toshkent viloyatidagi 4 ta MTT hamda Oʻrta Chirchiq tumanidagi pedagogika kollejiga tashrif buyurildi.Toshkent viloyatida 789 ta maktabgacha taʼlim tashkiloti, jumladan, 481 ta davlat, 26 ta idoraviy, 112 ta xususiy, 18 ta DXSH asosidagi va 152 ta oilaviy maktabgacha taʼlim tashkiloti mavjud. 2020-yilning 3-choragi holatiga koʻra, Toshkent viloyatida maktabgacha taʼlimga bolalarni qamrab olish koʻrsatkichi 49,5% ni tashkil etdi (2017-yilda 27,2%). Joriy yil oxiriga qadar MTV ushbu koʻrsatkichni 57,4% ga oshirishni rejalashtirmoqda. Oʻtgan uch yil mobaynida Toshkent viloyatida maktabgacha taʼlim tashkilotlari soni 1,8 barobar oshdi.“Oltin baliqcha» 12-sonli maktabgacha taʼlim tashkiloti, Toshkent viloyatiKeles shahrida joylashgan 12-sonli «Oltin baliqcha” MTT 2020 da ishga tushirildi. Yangi MTT sobiq tuman sud binosida joylashgan. Mazkur inshoot Maktabgacha taʼlim vazirligi balansiga olinib, “Anglesey Food” YAT MCHJ (korzinka.uz) homiyligida rekonstruksiya qilindi. Quvvati 480 oʻrin, yaratilgan ish oʻrinlari soni 25 tani tashkil etadi. Toʻla vaqtli guruhlardan tashqari, 12-sonli MTTda 6 yoshli bolalarni maktabga tayyorlash boʻyicha bepul qisqa muddatli guruhlar faoliyati tashkil etilgan.MDO va “Anglesey Food” YAT MCHJ oʻrtasidagi hamkorlik bu hayriya faoliyati shaklidagi davlat-xususiy sherikligidir (DXSH).“Aqlvoy” mobil MTT, Yangiyoʻl tumaniYangiyoʻl tumanida “Isuzu” avtobusi vositasida mobil MTT faoliyat yuritadi. Kun davomida, avtobus manzillarga boradi va 3 yoshdan 7 yoshgacha boʻlgan bolalarni qamrab oladi. Oʻqituvchilar oʻquvchilar bilan turli yosh guruhlari uchun moʻljallangan dastur boʻyicha ish olib boradilar, avtobus marshrutining har bir nuqtasi toʻsiqlar, kursi, argʻimchoq, oʻyingoh va bolalar maydonchalari bilan jihozlangan.“Aqlvoy” mobil MTT oddiy maktabgacha taʼlim tashkilotlari boʻlmagan chekka qishloq joylarida faoliyat koʻrsatadi.24-sonli MTT, Quyi Chirchiq tumaniQuyichirchiq tumani 24-sonli MTT idoralararo hamkorlik doirasida Oʻzbekiston davlat bojxona qoʻmitasi koʻmagida qurilgan. MTT quvvati 160 oʻrin, yaratilgan ish oʻrinlari soni 30 tani tashkil etadi.“Erudit kids planet”, Nurafshon shahar“Erudit kids planet” 100 oʻrinli oilaviy maktabgacha taʼlim tashkilotidir. MTTda 15 nafar oʻqituvchi va maʼmuriy xodimlar faoliyat koʻrsatib, toʻgaraklar tashkil etilgan.MTTda barcha belgilangan havfsizlik choralari koʻrilgan: niqob rejimi va ijtimoiy masofa saqlashga rioya etiladi, bolalar va xodimlar ertalab tekshiruvdan oʻtkaziladi hamda harorat kuniga ikki marta oʻlchanadi. Guruhlarda tozalash kuniga 4-marta amalga oshiriladi, binolar jadvalga muvofiq shamollatiladi.Toshkent viloyat pedagogika kollejiToshkent viloyat pedagogika kolleji dual taʼlim joriy etilgan birinchi oʻquv yurti boʻladi. Kollej oʻquvchilari akademik bilim olish bilan parallel ravishda bolalar bilan ishlash boʻyicha amaliy koʻnikmalarni rivojlantiradilar. Shu maqsadda kollejda 240 nafar oʻquvchiga moʻljallangan yangi davlat maktabgacha taʼlim tashkiloti qurildi.Dual taʼlim modelining anʼanaviy taʼlimga nisbatan ustunligi undagi nazariya va amaliyotning mustahkam bogʻliqligidadir. Oʻquvchilar oʻrganayotgan narsalari va olgan maʼlumotlarini oʻz ishlariga qanday tatbiq etish mumkinligini biladilar. Bunday yondashuv natijasida maktabgacha taʼlim tizimi nafaqat pedagogik bilimlarni oʻzlashtirgan, balki bolalar bilan ishlashni biladigan oʻqituvchilarga ham ega boʻladi.MTV mamlakatimiz boʻylab 97 ta pedagogika kollejida dual taʼlim tizimini joriy etmoqda. Kollejlardagi maktabgacha taʼlim tashkilotlari bepul bir yillik maktabga tayyorlov, shuningdek, oʻrnatilgan tartibda boshqa taʼlim xizmatlarini koʻrsatishni amalga oshiradi.