Oʻzbekiston Respublikasi Prezidentining 2021-yil 14-yanvardagi “Shaxmatni yanada rivojlantirish va ommaviylashtirish hamda shaxmatchilarni tayyorlash tizimini takomillashtirish chora-tadbirlari toʻgʻrisida”gi PQ-4954-son, 2023-yil
8-maydagi “2026-yil Oʻzbekistonda boʻlib oʻtadigan 46-Butunjahon shaxmat olimpiadasiga kompleks tayyorgarlik koʻrish hamda shaxmatni ommaviy harakatga aylantirishga oid chora-tadbirlar toʻgʻrisida”gi PQ-150-son qarorlariga muvofiq Maktabgacha taʼlim tashkilotlari tarbiyalanuvchilari oʻrtasida “Shaxmat festivali” musobaqalarini tashkil etish vazifasi belgilangan.
Shu munosabat bilan, Oʻzbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligining tegishli buyrugʻiga hamda “Maktabgacha taʼlim tashkilotlari tarbiyalanuvchilari oʻrtasida “Shaxmat festivali” musobaqalarini oʻtkazish toʻgʻrisidagi nizom”ga muvofiq maktabgacha taʼlim tashkiloti tarbiyalanuvchilari oʻrtasida “Shaxmat festivali” musobaqasining maktabgacha ta’lim tashkiloti boshqichi joriy yilning 4-5 iyun kunlari, tuman (shahar) bosqichi 11-12 iyun kunlari, viloyat bosqichi 19-20 iyun kunlari oʻtkazildi.
Bugun, 4-iyul Toshkent shahrida joylashgan O‘zbekiston shaxmat federatsiyasi binosida maktabgacha ta’lim tashkilotlarining tarbiyalanuvchilari oʻrtasida “Shaxmat festivali” musobaqasining respublika bosqichi o‘tkazildi.
Unda maktabgacha taʼlim tashkilotlarining tarbiyalanuvchilari oʻrtasida shaxmat boʻyicha “Shaxmat festivali” musobaqasining Respublika bosqichida viloyat bosqichida gʻolib boʻlgan jami 28 nafar maktabgacha taʼlim tashkilotlarining 14 nafar oʻgʻil va 14 nafar qiz bola tarbiyalanuvchilari oʻzaro bellashishdi.
Murosasiz kechgan bahslar yakunida o‘g‘il bolalar o‘rtasida Sultonhusayn Babajobov — Xorazm viloyati — 1-o‘rinni, Dilshodbek Jalilov — Buxoro viloyati — 2-o‘rinni, Muhammadayyub Abdullayev — Farg‘ona viloyati 3-o‘rinni egalladi. Qiz bolalar o‘rtasida Larina Zarina — Qoraqalpog'iston Respublikasi — 1-o‘rinni, Zahro Esanboyeva — Navoiy viloyati — 2-o‘rinni, Kumushoy Uzoqova — Qashqadaryo viloyati — 3-o‘rinni egalladi.
Musobaqa yakunlari boʻyicha oʻgʻil va qiz bola tarbiyalanuvchilardan 1-, 2- va 3-oʻrin gʻoliblari aniqlandi va agentlikning diplomi bilan qolgan ishtirokchilar faxriy yorliq hamda qimmatbaho sovgʻalar bilan taqdirlandilar.
Eslatib o‘tamiz: Musobaqada maktabgacha taʼlim tashkilotining 5-7 yoshli oʻgʻil va qiz bola tarbiyalanuvchilari yakka tartibda ishtirok etishdi. Shuningdek, bu yil maktabgacha ta’lim tashkilotlarining tarbiyalanuvchilari oʻrtasida “Shaxmat festivali” musobaqasi 4 marotaba o‘tkazildi.
Ma’lumot uchun: Mazkur musobaqalarining 1-bosqichi tashkilot bosqichida 66 971 nafar tarbiyalanuvchi, 2-bosqichi tuman va shahar bosqichida 6 149 nafar, 3-bosqichi hududiy viloyat bosqichida 358 nafar, 4-bosqichi respublika bosqichida 28 nafar tarbiyalanuvchi ishtirok etdi.
