MTT ga moslashuv davri jajji bolalar uchun jiddiy sinovdir: tanish oilaviy muhitdan u o'zi uchun yangi sharoitga o’tadi, bu muqarrar ravishda bolaning xatti-harakatlarining o'zgarishiga, uyqu va ishtahaning buzilishiga olib keladi. Bolaning 1-3 yoshlik payti onadan ajralishga yuqori sezuvchanlik va yangi narsaga qo‘rquv bilan tavsiflanadi. Shuning uchun, MTT ga moslashuvni imkon qadar osonlashtirish va yumshatish uchun mutaxassis va tajribali onaning maslahatlarini e’tiboringizga havola etamiz.
Nilufar Djumayeva, Navoiy shahar 26-DMTT psixologi: Bolani MTTga moslashuvini yaxshilashda avvalambor MTTdagi muhit katta rol o‘ynaydi. Aksariyat bolalar uchun bog‘chaga borish ular hayotidagi ilk murakkab stress bo'lishi mumkin. Moslashuv jarayoni ma’lum vaqt davom etadi:ba’zi bolalar bog‘chaga tez ko‘nikadilar, ayrimlariga ozroq muddat talab qilinadi. Bolani MTT ga qabul qilish bilan uning hayotida ko‘plab o‘zgarishlar yuz beradi: qat’iy kun tartibi, ota-onalarning MTTda bo’lmasligi, xulq-atvorga yangi talablar, yangi xona, tengdoshlar bilan doimiy aloqa. Bu o‘zgarishlarning barchasi bir vaqtning o‘zida bola bilan yuz beradi va shuning uchun stressli vaziyatni yaratadi. Masalan:injiqlik, qo‘rquv, ovqatdan bosh tortish, uyga talpinish.
Bolaning moslashuvi 7 kun, 10 kun 1 oy,1 yilgacha davom etadi. Bola moslashuvida asosan ota-ona va tarbiyachi rol o‘ynaydi. Bola kelganda birinchi navbatda tarbiyachiing mehribonligi, samimiyligi, xushmuomalaligi, erkalashi bilan bolani o‘ziga jalb eta olishi uning tez moslashuviga yordamlashadi. Shuningdek, moslashuvning davomiyligi bolaning rivojlanish darajasiga ham bog‘liq, agar bola bilan uyda tizimli ravishda ota-ona, yaqinlari shug‘ullangan bo‘lsa, muloqotga kirishimli va mustaqil bo‘lsa (o‘zi mustaqil hojatga chiqa olishi, qoshiq ushlay olishi, so‘rg‘ichdan ajralgan bo‘lishi, kiyimlarini yechib-kiyishi) guruhdagilar bilan tezda aloqa o‘rnatadi, mazmunli o‘yinlar bilan o‘zini tuta oladi, faol bo‘ladi va tez moslashadi.
Elnora Akramova, ona: Ikkita farzandimda bog‘chaga moslashuv har xil kechgan. Katta o‘g‘lim uyda yagona nabira bo‘lgani uchun hamma e’tibor unda bo‘lgan. Ko‘chada kam o‘ynardi shuning uchun bolalar bilan ham chiqishmasdi, o‘yinchoqlarni bo‘lishib o‘ynash “fojia” edi (kuladi). Shuning uchun bog‘chaga borish unga yoqmadi, axir uyida hamma narsa muhayyo bo‘lsa, istaganini qilsa albatta uy yaxshi edi-da! 1 oy davomida ko‘z yoshlar, janjal-to‘polon bilan olib bordik. Keyin malakali tarbiyachilar ancha o‘rgatib olishdi, har kuni ming “hiyla” bilan olib qolishar edi.
Kichik o‘g‘limda esa chiqargan sabog‘imdan foydalanib, bog‘cha yoshigacha uni ancha mustaqil qildim, tengdoshlari bilan ko‘chada o‘ynatdim, erkaliklarini birin-ketin tartibga soldim. Natijada, MTTga jon deb bordi, hatto MTT bilan tanishuvga olib borganimda qolaman deb yig‘lagan. Shulardan kelib chiqib ayta olamanki, MTTga bolani moslashuvida ota-ona va tarbiyachining roli 50 ga 50 bo‘lishi kerak.
Moxira Beknazarova, Sirdaryo viloyati 11-sonli DMTT metodisti: Ota-onalarga bolani MTT ga moslashuv davrida amal qilish lozim bo‘lgan tavsiyalarimni berib o‘taman:
Uydagi kun tartibini MTT guruhi rejimiga moslashtiring;
MTTga borish arafasida asabiylashmaslikka, xavotiringizni ko'rsatmaslikka harakat qiling;
MTTning menyusi bilan tanishing va uyda bolaning ratsioniga yangi taomlarni kiriting;
Iloji boricha, bolani mustaqil bo'lishga o'rgating;
Bolaning oldida MTT xodimlarini tanqid qilmang, nimadir sizni qoniqtirmayotgan bo‘lsa, alohida gaplashib oling;
Dam olish kunlarida farzandingizning kun tartibini keskin o‘zgartirmang;
Farzandingizda biror yomon odat bo'lsa, uni aynan moslashuv davrida bartaraf etishga urinmang, bu bolani battar injiq qilib qo’yadi;
Bir muddat televizor ko'rishini kamaytiring;
Bolani emotsional jihatdan qo'llab-quvvatlang: maqtang, arzimagan yordamini ham katta qilib ko‘rsating;
Jazolamang, ayniqsa, bolani bog’cha bilan "qo'rqitmang", o'z vaqtida uyga olib keting;
Uning injiqliklariga toqatliroq bo'ling