Joriy yilning 13-dekabr kuni O‘zbekiston Respublikasi Oliy Majlisi Qonunchilik palatasining navbatdagi majlisi bo‘lib o‘tdi.
Unda "Maktabgacha taʼlim tashkilotlari tarmog‘i kengaytirilishi hamda sohada nodavlat sektor ulushining oshirilishi munosabati bilan “Maktabgacha taʼlim va tarbiya to‘g‘risida”gi O‘zbekiston Respublikasining Qonuniga o‘zgartishlar kiritish haqida”gi Qonun loyihasi muhokamaga qo‘yilgan.
Ushbu hujjat asosan “Maktabgacha taʼlim va tarbiya to‘g‘risida”gi qonunga oilaviy nodavlat maktabgacha taʼlim tashkilotlarida bolalar sonini 50 nafargacha ko‘paytirishga qaratilgan o‘zgartirishlar kiritilgan.
Taʼkidlash lozimki, oilaviy bog‘chalar bolalarni 50 nafargacha olishi uchun tashkilotda yetarlicha shart-sharoit bo‘lishi lozim. Yaʼni, jihozlar yetarliligi, joyning kengligi - shular sirasiga kiradi.
“Deputatlarning aytishicha, qonun loyihasining qabul qilinishi oilaviy nodavlat maktabgacha taʼlim tashkilotlari faoliyatining yana-da kengaytirilishiga hamda bolalarni maktabgacha taʼlim-tarbiya bilan qamrab olish darajasini oshirishga xizmat qiladi”, - deyiladi Oliy Majlis Qonunchilik palatasining Axborot xizmati xabarida.
Majlisda qonun loyihasi deputatlar tomonidan qabul qilindi.
Eslatma! Bolalar sonini oshirish istagida bo‘lgan oilaviy NMTT rahbarlari tizimning masʼul xodimlari bilan bog‘lanishi zarur.
Maktabgacha ta'lim vazirligi Axborot xizmati