1-iyun Xalqaro bolalarni himoya qilish kuni munosabati bilan Oʻzbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligi hamda O‘zbekistonda SHHT Xalq diplomatiyasi markazi bilan hamkorlikda SHHTga a’zo davlatlar bolalari orasida ekologik savodxonligini oshirish, tabiatni muhofaza qilish, ularni tasviriy san’at va badiiy ijodga bo‘lgan qiziqishini oshirish, iqtidorli yosh rassomlarni aniqlash maqsadida SHHT a’zo davlatlardagi maktabgacha va maktab yoshidagi bolalari o‘rtasida joriy yilning 30 - may – 2 - iyun kunlari Toshkent fotosuratlar uyida “Tabiatni birgalikda asraylik” mavzusida Xalqaro bolalar rasmlari ko‘rgazmasi tashkil etilgan edi. Hakamlar hay’ati tomonidan ko‘rgazmada ishtirok etgan va g‘olib deb topilgan asarlar aniqlandi. Bugun Oʻzbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligi binosida tashkilotchilar tomonidan “Eng yaxshi maktabgacha ta’lim tashkiloti”, “Eng yaxshi yosh qatnashchi”, “Eng faol ustoz”, “Eng yaxshi qoraqalpog‘istonlik qatnashchi”, “Eng faol viloyat”, “Eng faol tarbiyachi” nominatsiyalari bo‘yicha g‘oliblariga O‘zbekistonda SHHT Xalq diplomatiyasi markazi direktori Qobiljon Sobirov, O‘zbekiston Respublikasi maktabgacha va maktab ta’lim vazirining birinchi o‘rinbosari, Maktabgacha ta’lim agentligi direktori Agripinna Shin, Toshkentdagi “Свiтанак” Belarus madaniyat markazi raisi Tatarenko Galina Aleksandrovna, Xitoyning O‘zbekistondagi elchixonasi maslahatchisi Janob Chi Junlin va Xitoy elchixonasining ikkinchi kotibi U Menin xonim mukofot va diplomlarni topshirishdi. “Tabiatni birgalikda asraylik” mavzusida Xalqaro bolalar rasmlari ko‘rgazmasida g‘oliblar quyidagilar: “Eng yaxshi maktabgacha ta’lim tashkiloti” nominatsiyasi g‘olibi O‘zbekiston Respublikasi Toshkent shahar, Sergeli tumani, 539-sonli maktabgacha ta’lim tashkiloti tarbiyalanuvchisi Madina Umrzokova (7 yosh). "Eng yaxshi yosh ishtirokchi" nominatsiyasi g'olibi Belarus Respublikasi Grodno shahri vakili Artur Skorov (6 yosh). (Sovrin Belarusning O‘zbekistondagi elchixonasi xodimiga topshirildi) "Eng faol ustoz" nominatsiyasi g'olibi Belarus Respublikasi, Bixov shahridagi "Moskalkova N.T." nomidagi davlat ta'lim muassasasi 3-umumta'lim maktabi o'quvchisi Gubskiy Dmitriy (10 yosh). (Sovrin Belarusning O‘zbekistondagi elchixonasi xodimiga berildi). “Eng yaxshi qoraqalpog‘istonlik qatnashchi” nominatsiyasi g‘olibi Qoraqalpog‘iston Respublikasi, Qo‘ng‘irot tumanidagi 18-sonli maktabgacha ta’lim tashkiloti tarbiyalanuvchisi Artikboyev Nurislom. “Eng faol viloyat” nominatsiyasi g‘olibi Navoiy viloyati, Navoiy shahar 20- sonli maktabgacha ta’lim tashkiloti tarbiyalanuvchisi E’zoza Hikmatova. “Eng faol tarbiyachi” nominatsiyasi g‘olibi – Xitoy Xalq Respublikasi Markaziy Badiiy Akademiyasi Bolalarni estetik tarbiyalash ilmiy markazi tarbiyalanuvchisi Vu Sixan. (Sovrin Xitoyning O‘zbekistondagi elchixonasi xodimiga berildi) Tadbirda davomida keyingi yillarda “Tabiatni birgalikda asraylik” mavzusida Xalqaro bolalar rasmlari ko‘rgazmasini SHHTga a’zo davlatlardagi maktabgacha va maktab ta’limi tashkiloti tarbiyalanuvchilari o‘rtasida hamkorlikda o‘tkazish bo‘yicha Oʻzbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligi hamda O‘zbekistonda SHHT Xalq diplomatiyasi markazi o‘rtasida memorandum imzolandi. Tadbir yakunida doirasida Toshkent shahridagi bir qator davlat maktabgacha ta’lim tashkiloti tarbiyalanuvchilari tomonidan musiqa va raqs dasturlari namoyish etildi. Eslatib o ‘tamiz: SHHT a’zo davlatlardagi maktabgacha va maktab yoshidagi bolalar o‘rtasida joriy yilning 30-may – 2-iyun kunlari Toshkent fotosuratlar uyida o‘tkazilgan “Tabiatni birgalikda asraylik” mavzusida Xalqaro bolalar rasmlari ko‘rgazmasida O‘zbekiston, Tojikiston, Belorusiya Respublikalari va Xitoy Xalq Respublikasi maktabgacha va maktab yoshidagi bolalarning ijod mahsuli bo'lgan 1000dan ortiq rasmlar ishtirok etib, shundan 300dan ortiq rasmlar O‘zbekiston Respublikasi maktabgacha ta’lim tashkiloti tarbiyalanuvchilarining ijod mahsuli edi.
Maktabgacha ta’limning yangi shakli bolalarni o‘qishga tizimli tayyorlaydi
Ilg‘or xorijiy mamlakatlar tajribasi asosida 2019-2023 yillarga mo‘ljallangan ta’lim sohasini rivojlantirish rejasiga muvofiq, Jahon banki bilan hamkorlikda yurtimizning olis tumanlari va chekka hududlarida maktabgacha ta’limning yangi — muqobil shakllari amaliyotga tatbiq etildi. Jumladan, Namangan viloyati Kosonsoy pedagogika kolleji va Samarqand viloyati Tayloq pedagogika kollejida “Bolalarni erta yoshdan rivojlantirishni takomillashtirish” loyihasi amalga oshirilmoqda. Uning doirasida tajriba-sinov tariqasida har biri 20 ta rivojlantiruvchi o‘yin guruhini o‘z ichiga olgan “Ilk rivojlanish markazlari” faoliyati yo‘lga qo‘yildi. Batafsil: https://yuz.uz/news/maktabgacha-talimning-yangi-shakli-bolalarni-oqishga-tizimli-tayyorlaydi Янги Ўзбекистон №147.pdf
Tender oʻtkazish toʻgʻrisida eʼlon
Tender nomi: Davlat maktabgacha taʼlim tashkilotlariga mebel jihozlarni elektron shaklda xarid qilish. Tender predmeti (tovar) – 2023-yilda Davlat maktabgacha taʼlim tashkilotlarini mebel jihozlar bilan taʼminlashni tashkil etish. Tender tashkilotchisi: Maktabgacha taʼlim agentligi. Tenderda mulkchilik shaklidan qatʼiy nazar, mebel jihozlarni ishlab chiqarish va/yoki buyurtmachiga sifati va bahosi jihatidan maʼqul tarzda hamda lot boʻyicha koʻrsatilgan miqdorlarda ishlarni bajarish imkoniyati va tajribasiga ega barcha mahalliy va xorijiy korxona va tashkilotlar ishtirok etishlari mumkin. Tender savdolari ishtirokchisi: Oʻzbekiston Respublikasi qonunlari talablariga javob beradigan, ishlarni bajaruvchi obekti hisoblangan yuridik shaxs boʻlishi; Shartnoma tuzish huquqiga ega boʻlishi; Shartnomani bajarish uchun yetarli moliyaviy resurslarga ega boʻlishi hamda tender hujjatlarida koʻrsatilgan talablarni bajarishi kerak. Tender ishtirokchilari maxsus axborot portaliga (https://etender.uzex.uz/home) joylashtirilgan elektron shakldagi tender hujjatlarini yuklab olishlari va unda koʻrsatilgan talablar bilan tanishib chiqqan holda oʻz takliflarini topshirishlari lozim. Tenderda takliflarning shakli va topshirish shartlari tender hujjatida koʻrsatilgan. Tender takliflari elektron shaklda taqdim etiladi, tender hujjatlarida koʻrsatilgan 1–shaklga muvofiq tenderda ishtirok etishga ariza bilan qabul qilinadi. Avans toʻlov amalga oshirilgan kundan boshlab 90 (toʻqson) kalendar kun muddatda jihozlarni tasdiqlangan roʻyxat boʻyicha davlat maktabgacha taʼlim tashkilotiga yetkazish va oʻrnatish ishlarini amalga oshirish Tender gʻoliblaridan talab etiladi. Tender jarayonlari va tartibi haqida qoʻshimcha maʼlumot olish istagida boʻlgan tender ishtirokchilari, eʼlon nashr qilingan sanadan boshlab (haftaning shanba va yakshanba kunlaridan tashqari) har kuni soat 10:00dan 17:00ga qadar Maktabgacha taʼlim agentligining quyidagi manzili boʻyicha murojaat qilishlari mumkin: Manzil: Toshkent shahar, Mirobod tumani, Amir Temur shoh koʻchasi 17-uy, tel: (+99891 010-71-77). e-mail : equip@mpe.uz Masʼul: J.Mamanazarov, B.Nabixoʻjayev Tender takliflari zakalat koʻrinishida: mahalliy va xorijiy korxonalar boʻlgan tender ishtirokchilari tomonidan tender taklifi bermoqchi boʻlgan lotning cheklangan qiymatidan 1,0 foiz miqdoridagi pul mablagʻlarini naqdsiz shaklda maxsus hisob raqamiga oʻtkazishi shart. Tender ishtirokchisi mahsulot namunalarini eʼlon muddati tugagunga qadar (shanba va yakshanba kunlaridan tashqari) taqdim etishi lozim. Manzil: Toshkent shahar, Yashnobod tumani, Oqdaryo koʻchasi 122-uy, tel.: (+99891 010-71-77) Tender takliflari maxsus axborot portalida koʻrsatilgan sanadan kechiktirilmagan holda elektron shaklda taqdim etilishi lozim. 2023-yilda davlat maktabgacha taʼlim tashkilotlari uchun xarid qilinishi rejalashtirilgan mebel jihozlarining eng yuqori summasi Lot raqami Lot nomi Jihozlar soni Eng yuqori summasi Boʻnak summasi( 1,0% ) Jami: 4 263 528 000 42 635 280 Lot № 1 Davlat maktabgacha taʼlim tashkilotlari uchun mebellar (Respublikaning 4 ta hududi boʻyicha) Roʻyxat boʻyicha 4 263 528 000 42 635 280
Maktabgacha ta’lim agentligida “Zakovat” intellektual o‘yini bo'lib o'tdi
Bugun Maktabgacha ta’lim agentligining xodimlari o'rtasida “Zakovat” intellektual o‘yini o‘tkazildi. Agentlikda tashkil etilgan “Zakovat” intellektual o‘yinida 4 ta jamoa: 1- jamoa “Taraqqiyot sari” 2 – jamoa “Aqlvoy” 3 - jamoa “Tinchimas ixtirochilar” 4 - jamoa “Intilish” jamoalari o‘rtasida g‘oliblik uchun bellashdilar, natijada, 1-o‘rin “Aqlvoy” jamoasiga 2-o‘rin “Taraqqiyot sari” jamoasiga 3-o‘rin “Tinchimas ixtirochilar” jamoasiga nasib etdi. O‘yin yakunida Maktabgacha va maktab ta’limi vazirining birinchi o‘rinbosari - Maktabgacha ta’lim agentligi direktori A.Shin so‘zga chiqib, “Zakovat” intellektual o‘yinida ishtirok etib g‘olib bo‘lgan jamoalarni tabriklab, bu kabi o‘yinlarni doimiy o‘tkazib turish lozimligi bo‘yicha mas’ullarga ko ‘rsatma berdi. Shuningdek, A.Shin ushbu o‘yin jamoada jipslikni, o‘zaro hurmatni yanada mustahkamlashida xizmat qilishini ta’kidladi. Eslatib o‘tamiz: O‘zbekiston Respublikasi Prezidentining “Zakovat” intellektual o‘yinini aholi o‘rtasida ommaviy-ma’rifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida”gi 2022-yil 20-yanvardagi PQ-96-son qarori asosida Maktabgacha ta’lim agentligining xodimlari o‘rtasida “Zakovat” intellektual o‘yini tashkil etildi.
O‘zbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligi hamda “Mehribonlik Korpusi” (Mercy Corps) bilan hamkorlikda 2023-yilning 12- va 21-iyul kunlari Surxondaryo viloyati Termiz shahri va Qoraqalpog‘iston Respublikasi Nukus shahrida “Maktabgacha ta’lim sifatini oshirish va pedagoglarning kasbiy rivojlanishining ahamiyati” mavzusida amaliy konferensiya bo‘lib o‘tdi.
Pedagogika kollejlaridagi bitiruvchilar mutaxassisliklari bo'yicha diplomlarini olishmoqda
Ayni kunlarda Maktabgacha taʻlim agentligi tasarrufidagi pedagogika kollejlarida bitiruvchilarga diplom topshirish marosimlari boʻlib oʻtmoqda. 2022-2023 oʻquv yilida respublika bo'yicha pedagogika kollejlarida jami 17 752 nafar oʻquvchilar o'qishni tamomladi. Shundan, maktabgacha taʼlim tashkiloti tarbiyachisi yoʻnalishi bo'yicha 14234 nafar; Maktabgacha taʼlim tashkiloti yordamchi tarbiyachisi yoʻnalishini 3184 nafar; Musiqa rahbari yoʻnalishini bo'yicha 139 nafar; Jismoniy tarbiya yoʻnalishini bo'yicha 122 nafar; Kutubxonashunoslik yoʻnalishini bo'yicha 18 nafar; Oshpaz yoʻnalishini esa 58 nafar oʻquvchilar o'qishni bitirdilar. Eslatib o'tamiz: Pedagogika kollejalarida “Maktabgacha ta’lim tashkiloti tarbiyachisi”, “Maktabgacha ta’lim tashkiloti yordamchi tarbiyachisi”, “Kutubxonashunoslik” “Jismoniy tarbiya”, “Musiqa rahbari” yo‘nalishlari mavjud.
O‘zbekiston prezidentining “O‘zbekiston—2030” strategiyasi to‘g‘risida”gi farmoni va “O‘zbekiston—2030” strategiyasini 2023-yilda sifatli va o‘z vaqtida amalga oshirish chora-tadbirlari to‘g‘risida”gi qarori loyihalari jamoatchilik muhokamasiga qo‘yildi. Kelgusi 7 yilda mamlakatimizning asosiy rivojlanish yo‘nalishlarini belgilab beruvchi “O‘zbekiston – 2030” strategiyasi va uni 2023-yilda amalga oshirish chora-tadbirlari loyihalari joriy yilning 31-iyulidan boshlab regulation.gov.uz va 2030.strategy.uz portallarida keng jamoatchilik muhokamasi uchun joylashtirildi. “O‘zbekiston – 2030” strategiyasining maqsadlari va samaradorlik ko‘rsatkichlari oson qabul qilish va tushunish uchun qulay shaklda ifodalangan bo‘lib, unda 5 ta yo‘nalish bo‘yicha 100 ta maqsad nazarda tutilgan. “O‘zbekiston – 2030” strategiyasini 2023-yilda amalga oshirish chora-tadbirlari loyihalarida muddatlar va ijrochilar kesimidagi amaliy vazifalar, erishiladigan aniq maqsadli ko‘rsatkichlar va strategiyani amalga oshirish doirasida ishlab chiqiladigan normativ-huquqiy hujjatlar ro‘yxati tasdiqlanmoqda. Fuqarolardan loyihalarning muhokamasida faol ishtirok etib, mamlakatimiz taraqqiyotiga xizmat qiladigan takliflarni regulation.gov.uz va 2030.strategy.uz portallariga yuborishlarini so‘raymiz. Jamoatchilik muhokamasi 2023-yil 9-avgustga qadar davom etadi. Unutmang, Yangi O‘zbekistonni birgalikda barpo etamiz!
O‘zbekiston bolalari Jahonni zabt etmoqda.
Mental arifmetika boʻyicha 15 ta mamlakat va mintaqalar o’rtasida (Bangladesh, Kambodja, Kanada, Xitoy, Xorvatiya, Ekvador, Hindiston, Indoneziya, Malayziya, Meksika, Panama, Filippin, Tayvan, O'zbekiston va Venesuela) Yakkasaroy tumanidagi 132-sonli davlat maktabgacha ta’lim tashkiloti tarbiyalanuvchisi Qudratova Risolatxon ishtirok etib faxrli 1-oʻrinni qoʻlga kiritdi.
Ijtimoiy tarmoqlarda Namanganda bog‘cha tarbiyalanuvchilari ovqatdan zaharlanganligi haqida xabarlar tarqaldi. Aniqlanishicha, joriy yilning 25 - iyul kuni Namangan viloyati, Uychi tumanidagi “Gulshan” nomli oilaviy nodavlat maktabgacha ta’lim tashkilotining tarbiyalanuvchilari uyqudan uyg‘ongach, 3 nafar tarbiyalanuvchilar ko‘ngil aynashi va qorin og‘rig‘iga shikoyat qilgan. 50 o‘rinli NMTTda bugungi kunda 48ta tarbiyalanuvchi qamrab olingan. Tashkilotdagi bir guruh 15 nafar tarbiyalanuvchilari shu zahoti oshqozon-ichak faoliyati funksiyasi buzilishida gumonlanib, tuman shifoxonasiga olib borilgan va darhol tekshiruvdan o‘tkazilgan. Natijada 2 nafar tarbiyalanuvchilarda sifati tez buziluvchi mahsulotni iste’mol qilishi oqibatida oshqozon-ichak faoliyati funksiyasi buzilishi kuzatilgan, tuman tibbiyot birlashmasining bolalar yuqumli kasalliklari bo‘limiga yotqizilgan. Qolgan 13 nafar tarbiyalanuvchining holati yaxshi bo‘lganligi uchun o‘sha kunning o‘zida uylariga ketishlariga shifokorlar tomonidan ruxsat berilgan. Shifoxonada qolgan 2 nafar tarbiyalanuvchilar barcha zaruriy muolajalar ko‘rsatilib butunlay sog‘ayganidan so‘ng 26 - iyul kuni uylariga ketishga ruxsat berilgan. Hozirda bolalarning hammasi o‘zini sog‘lom his qilib, Uychi tumanidagi “Gulshan” nomli oilaviy nodavlat maktabgacha ta’lim tashkilotida ta’lim-tarbiya jarayonlarida ishtirok etishmoqda. Namangan viloyati, Uychi tumanidagi maktabgacha va maktab ta’limi bo‘limiga qarashli barcha davlat va nodavlat maktabgacha ta’lim tashkilotlari mas’ullariga ta’lim tashkilotlariga sifati tez buziluvchi mahsulotlarni olib kirmaslik, tarbiyalanuvchilarga turli gazli ichimliklarni ichirmaslik, unli oziq-ovqat mahsulotlariga alohida e’tibor qaratish bo‘yicha ogohlantirilib, tushuntirish ishlari to‘liq olib borilgan. Hurmatli maktabgacha ta’lim tizimida faoliyat yuritayotgan rahbar va xodimlar hamda ota-onalar!!! Maktabgacha ta’lim tashkilotlarida yuqumli kasalliklar hamda ovqatdan zaharlanish holatlarining oldini olish maqsadida O‘zbekiston Respublikasi Bosh davlat sanitariya vrachining “O‘zbekiston Respublikasi maktabgacha talim tashkilotlarida tarbiyalanayotgan bolalarni xavfsiz va sifatli ovqatlanishni tashkil etishga oid gigiyenik talablari to‘g‘risida”gi (O‘zbekiston Respublikasi Adliya vazirligi tomonidan 2021-yil 26-iyunda ro‘yxatdan o‘tkazilgan, ro‘yxat raqami 30-son) SanQvaN 0016-21-sonli sanitariya qoidalari, normalari va gigiyena normativlariga ko‘ra maktabgacha ta’lim tashkilotlarida ishlatilishiga ruxsat berilmaydigan oziq-ovqat mahsulotlari ro‘yxati quyidagilar: · kalla-poycha mahsulotlari (buyrak, yurak, jigar, o‘pka, yelin); · barcha yovvoyi xayvonlarning go‘shti; ichi tozalanmagan parranda go‘shti; · 2,3,4-kategoriyali go‘sht, parranda, baliq go‘shti; · go‘shtning yog‘i va shilliq pardalarining miqdori 20 foizdan ko‘p bo‘lishi; · xolodes, go‘shtning bezli kiyomlari, diafragma, kalla go‘shtidan rulet; · dudlangan mahsulotlar, barcha turdagi kolbasalar, sosiska, sardelka; · charvi yog‘i, dumba yog‘i, margarin va boshqa gidrogenizasiyalangan yog‘lar; · yog‘lilik darajasi 82,5 foizdan kam bo‘lgan sariyog‘ (sigir yog‘i); o‘simlik moyiga sut qo‘shilgan mahsulotlar (spred); · tvorog mahsulotiga qo‘shilgan smetana, shokolad, o‘simlik moyi qo‘shib tayyorlangan muzqaymoq; · qimiz va etanol saqlovchi achitilgan sut mahsulotlari (0,5 foizdan yuqori); · pasterizasiyalanmagan sutdan tayyorlangan tvorog va smetana, termik ishlov berilmagan, katta idishdagi tvorog va smetana; · oshxona sharoitida tayyorlangan qatiq; · suvda suzuvchi parrandalarni go‘shti va tuxumlari (salmonellyoz bilan zararlanish xavfi bo‘lgani sababli); · po‘stlog‘i ifloslangan, yorilgan va salmonellyoz uchraydigan xo‘jaliklardan keltirilgan tuxumlar; · barcha turdagi uy sharoitida tayyorlangan konservalar; · germetik berkitilishida kamchiligi bo‘lgan, idishi ezilgan, shishgan (bombaj), qopqog‘i zanglagan, yorlig‘i bo‘lmagan konservalangan mahsulotlar; · ombor zararkunandalari va mayda chiqindilar bilan zararlangan yormalar, dukkaklilar, un, makaron mahsulotlari, quruq mevalar; · pestisid va nitrat miqdori laboratoriyada tekshirilmagan, mog‘orlagan, buzilgan meva va sabzavotlar; · uy sharoitida tayyorlangan va ota-onalar tomonidan uydan olib kelingan, sifati va xavfsizligini tasdiqlovchi xujjatlari bo‘lmagan taomlar va oziq-ovqat mahsulotlari (shu jumladan, bayramlar va tug‘ilgan kunlarni nishonlashda); · kremli qandolat mahsulotlari (pirojniy va tortlar), kremlar; · turli qo‘ziqorinlar va ulardan tayyorlangan mahsulotlar; · kvas, mors, gazli ichimliklar, sun’iy rang, mazza, hid beruvchi vositalar qo‘shilgan taom hamda ichimliklar, · yog‘da qovurilgan (frityur) mahsulotlar (grenka, chipselar, fri); · mayonez, murch, xantal, xren, sirka, qahva; barcha turdagi karamellar; · quruq konsentratlar asosida tez tayyorlanadigan 1 va 2 taomlar; · bir kun oldingi yoki oldingi ovqatdan qolgan ovqat qoldiqlari; · qovurilgan tuxum, omletdan tashqari; tuxum barak.
Bugun Maktabgacha ta’lim agentligi tomonidan joriy yilning 6 oyi davomida amalga oshirilgan ishlar hisobotiga bag‘ishlangan matbuot anjumani bo‘lib o‘tdi. Unda maktabgacha ta’lim tizimining turli yo‘nalishlari bo‘yicha faoliyati sarhisob qilindi. Matbuot anjumani davomida quyidagilar ma’lum qildi: Xususan, 2023-yil iyul holatida jami 30 792 ta maktabgacha ta’lim tashkilotlari faoliyati yo‘lga qo‘yilgan bo‘lib, ularning 6 734 tasi davlat va 24 058 tasi nodavlat (789 ta xususiy, 21 941 ta oilaviy va DXSH asosidagi 1 328 ta nodavlat MTT) maktabgacha ta’lim tashkilotlaridir. Shuningdek, MTTlarda 2 111 487 nafar yoki 72 foiz bolalar maktabgacha ta’limga qamrab olingan bo‘lib, shundan 647 655 nafar 6 yoshli bolalarning 563 331 nafari 2023-2024 o‘quv yilida maktabga chiqadiganlarni tashkil etadi. Joriy yilning may oyida qayta jihozlangan 7 ta ISUZU HC-40 avtobuslari Qashqadaryo va Surxondaryo viloyatlariga yuborildi. Natijada mobil guruhlar bazasida maktabgacha ta’lim xizmatlarini ko‘rsatish bo‘yicha 156 ta MFYlarda 72 ta ISUZU HC-40 avtobuslari bazasida tashkil etilgan 429 ta mobil guruhlarida 7 000 nafarga yaqin 3 yoshdan 7 yoshgacha bo‘lgan bolalar qamrab olindi. 1 iyul holatiga ko‘ra, respublikada jami umumiy quvvati 650 guruhga mo‘ljallangan 74 ta ko‘p tarmoqli ixtisoslashtirilgan maktabgacha ta’lim tashkilotlari mavjud, ularda 576 guruh (88,6%) faoliyat ko‘rsatmoqda va 6 077 nafar rivojlanishida jismoniy yoki psixik nuqsonlari bo‘lgan tarbiyalanuvchilar tarbiyalanmoqda. 2022-2023 o‘quv yili davrida Maktabgacha ta’lim agentligi va Sog‘liqni saqlash vazirligining malakali mutaxassislari ishtirokida tashkil etilgan tibbiy-psixologik-pedagogik komissiya tomonidan 8 976 nafar bola ko‘rikdan o‘tkazildi va 7 804 nafar bolaga davlat ko‘p tarmoqli ixtisoslashtirilgan MTTlarga xulosa-yo‘llanma berildi. O‘zbekiston Respublikasi Vazirlar Mahkamasining 2023 yil 23 martdagi 47-sonli bayonida belgilangan vazifalar ijrosini ta’minlash maqsadida, gigiyenik me’yorlarga va “Aqlvoy oshpaz” reseptlar to‘plamidan foydalangan holda 10 kunlik yagona mavsumiy taomnoma ishlab chiqildi va aprel oyida Toshkent shahridagi 4 ta MTT tajriba sinovidan o‘tkazildi.Aniqlangan kamchiliklarni inobatga olib O‘zbekiston Respublikasi Sanitariya-epidemiologik osoyishtalik va jamoat salomatligi qo‘mitasining “Maktabgacha ta’lim tashkilotlarida tarbiyalanuvchilarni sog‘lom ovqatlantirishni tashkil etish uchun yagona mavsumiy taomnomalarni tasdiqlash va amaliyotga joriy qilish to‘g‘risida” 2023-yil 23-maydagi 1 va 12 sonli qo‘shma qarori qabul qilindi. 2023-yilning birinchi yarim yilligida tadbirkorlar tomonidan 5 486 ta ariza kelib tushgan. Shundan, 2 089 ta loyiha ma’qullangan, 1 846 ta loyiha bo‘yicha bitim imzolangan. Natijada 59 072 ta yangi quvvat, 4 615 ta yangi ishchi o‘rin yaratildi. Shu bilan birga, 3 270 ta arizaga rad javobi berildi. Quvvati 41 920 nafar bolani qamrab olishga mo‘ljallangan 1 310 ta oilaviy MTTlar o‘z faoliyatini boshladi. Respublikadagi 740 ming nafarga yaqin tarbiyalanuvchilarni qamrab olgan 21 mingdan ortiq nodavlat (jumladan, oilaviy MTT) maktabgacha ta’lim tashlotlariga davlat byudjeti mablag‘lari hisobidan 1,2 trln. so‘m miqdorda subsidiyalar ajratildi. 2023-yilning 10-18-mart kunlari AQSH qishloq xo‘jaligi agentligining “Bolalar ta’limi uchun MakGovern-Doul xalqaro oziq-ovqat dasturi” doirasida Mehribonlik korpusi (Mercy Corps) xalqaro nodavlat notijorat tashkilotining O‘zbekistondagi filiali Maktabgacha ta’lim agentligi bilan hamkorlikda Qoraqalpog‘iston Respublikasi va Surxondaryo viloyatidagi 60 ta maktabgacha ta’lim muassasasining umumiy ovqatlanish shahobchalari, sanitariya-gigiyena ob’yektlari infratuzilmasi, suv ta’minoti yaxshilandi. Joriy yilning 25-iyun-8-iyul kunlarida Maktabgacha ta’lim agentligi va Koreya xalqaro hamkorlik agentligi (KOICA) o‘rtasidagi hamkorlik doirasida O‘zbekiston Respublikasining maktabgacha ta’lim sohasidagi 15 nafar mutaxassisi SOON CHUN HYANG universitetida malaka oshirish uchun Koreya Respublikasiga yuborildi. Maktabgacha ta’lim tashkilotlarida 2023 yilda 152 897 nafar rahbar va pedagoglar faoliyat yuritmoqda (bu ko‘rsatkich 2022 yil yakunida 151 746 nafarni tashkil etgan). Jami pedagoglarning 115 130 nafari (75,3%) davlat va 37 767 nafari (24,7%) nodavlat maktabgacha ta’lim tashkilotlariga to‘g‘ri keladi. 2023 yilning yanvar-iyun oylari davomida maktabgacha ta’lim tashkilotlarining 7828 nafar rahbar va pedagog kadrlarning hamda pedagogika kollejlarining 71 nafar pedagog kadrlarining malakasi oshirildi. Maktabgacha ta’lim agentligi tasarrufidagi 2 ta oliy ta’lim muassasalari - Toshkent shahridagi Puchon universitetida 1 426 nafar, A.I.Gersen nomidagi Rossiya davlat pedagogika universitetining filialida 612 nafar talaba tahsil olmoqda. Matbuot anjumani yakunida OAV vakillari o‘zlari qiziqtirgan savollarga javoblar olishdi.