Viloyat hokimi viloyat hududidagi navbatdagi bog‘chaga bordi
Surxondaryo viloyati hokimi U.Qosimov Qiziriq tumanidagi ijtimoiy soha obektlaridagi sharoitlar bilan tanishdi. Jumladan, tumandagi 16-sonli maktabgacha ta’lim tashkilotini ham ko‘zdan kechirdi. Viloyat hokimi ushbu bog‘chada bolalarning ta’lim-tarbiya olishlari uchun yaratilgan sharoitlar bilan tanishib, mavjud muammolarni o‘rgandi. Bolalarga xorijiy til va kasb-hunar o‘rgatishni turli o‘yinlar yordamida, ularning yoshiga mos keladigan metodlar qo‘llagan holda bog‘cha yoshidan boshlash lozimligi ta’kidlandi. Bu borada ushbu bog‘chada olib borilayotgan ishlar bilan tanishdi. Tashrif so‘ngida bolalar uchun turli kitoblar va o‘yinchoqlar jamlanmalari topshirildi.
Quvasoyda "Zumradoylar davrasi" ko'rik-tanlovi bo'lib o'tdi
Farg'ona viloyatining Quvasoy shahar Maktabgacha ta'lim bo'limi tasarrufidagi 21-sonli davlat maktabgacha ta'lim tashkilotida "Zumradoylar davrasi" deb nomlangan ko'rik-tanlov bo'lib o'tdi. Ko'rik-tanlovda tashkilotning maktabga tayyorlov guruh tarbiyalanuvchi qizlari 4 ta shart bo'yicha o'zaro bellashdilar. Har bir qatnashuvchi qizlarning olgan bilimlari va ishtiroklari hay'at a'zolari tomonidan baholab borildi va tanlov yakunida ishtirokchilar turli yo'nalishlar bilan taqdirlandilar. Tanlovda ertak qahramonlarining ham qatnashishlari o'zgacha ko'tarinki kayfiyat baxsh etdi.
Maktabgacha ta’lim agentligi vakillari Janubiy Koreyada
Ayni kunlarda O‘zbekiston Respublikasi Maktabgacha va maktab ta’limi vazirligi huzuridagi Maktabgacha ta’lim agentligi vakillari Janubiy Koreyada qisqa muddatli xizmat safarida bo‘lib turishibdi. Agentlik vakillarining Janubiy Koreyadagi xizmat safari davomida: -bolalarga erta ta’lim berishni rivojlantirish sohasida faoliyat ko`rsatayotgan Janubiy Koreyaning ta`lim va ilmiy tadqiqot muassasalari vakillari o‘rtasida uchrashuvlar o`tkazish; -uchrashuvlar davomida ta’lim sohasidagi ikki tomonlama hamkorlikni yanada rivojlantirish masalalarini muhokama qilish; - Puchon universitetining 65 yilligini nishonlash marosimida ishtirok etish kabi tadbirlar rejalashtirilgan. Xizmat safarining birinchi kunida O‘zbekiston Maktabgacha ta’lim agentligi direktori o‘rinbosari N.Muslitdinov va maslahatchisi X.Buriyev hamda Koreya bolalarga g‘amxo‘rlik qilish va maktabgacha ta`lim instituti (KICCЕ) rahbari Sanghee Park o‘rtasida uchrashuv bo‘lib o‘tdi. Uchrashuv davomida Institut rahbari Sanghee Park O‘zbekiston Respublikasi Maktabgacha ta’lim vazirligi bilan 2021-yil 16-dekabrda tuzilgan bitim doirasida o`zaro hamkorlik aloqalari saqlanib qolganidan minnatdorlik bildirdi. Agentlik direktori o‘rinbosari N.Muslitdinov maktabgacha ta’lim sohasida ta’lim sifatini samaradorligini va pedagoglar malakasini oshirish hamda baholash uchun kelajakda mazkur Instituti (KICCЕ) bilan qo‘shma loyihalarni davom ettirishlarini ma`lium qildi. Bizni kuzatishda davom eting, xizmat safarining navbatdagi ushrashuvlari haqida ma’lum qilib boriladi.
Farg‘onada yana bir bog‘cha mukammal rekonstruksiyadan chiqarilib, foydalanishga topshirildi
Farg‘ona viloyati Yozyovon tumanining Yuqori mahalla fuqarolar yig‘ini hududidagi 22-sonli davlat maktabgacha ta’lim tashkilotining binosi «Obod qishloq» dasturiga asosan mukammal rekonstruksiyadan chiqdi. Kuni kecha quruvchilar tomonidan qurilishi yakunlangan 120 o‘rinli bu bino foydalanishga topshirildi. Binoning tantanali ochilish marosimida tuman hokimi D. Jalilov, mahalla faollari, keng jamoatchilik vakillari ishtirok etdi. Ochilish marosimida ishtirok etgan nuroniylar bu binoda tarbiyalangan o‘g‘il-qizlarimiz orasidan olimu-fuzalolar, el koriga yaraydigan farzandlar yetishib chiqishini tilab, duolar qilishdi. Ma’lumot uchun: Bino rekonstruksiyasiga 2 milliard 400 million so‘m mablag‘ sarflandi. Tashkilot binosi 1987 yillarda qurilgan bo‘lib, ta’mirtalab bo‘lib qolgandi. Shuning bilan birga barcha mashg‘ulot xonalari va yotoqxonalar zamonaviy mebellar bilan jihozlandi. Bundan tashqari qo‘shimcha 60 o‘rinli yangi oshxona binosi ham qurib bitkazildi.
"Taom tayyorlaymiz" ko'rgazmali-didaktik o'yini.
"Taom tayyorlaymiz" ko'rgazmali-didaktik qo'llanmasi kichik va katta maktabgacha yoshdagi bolalar bilan ishlashga mo'ljallangan bo'lib, oziq-ovqat mahsulotlari, tayyor ovqatlarning tarkibi, topishmoqlarni topish qobiliyati, e'tibor va xotirani rivojlantirish bo'yicha bolalarning tasavvurlarini shakllantirishda yordam beradi. Ma'lumki, ovqatlanish bolaning rivojlanishida katta rol o'ynaydi. Bolalarni erta yoshdan boshlab to'g'ri tashkil etilgan, oqilona ovqatlanishga o'rgatish juda muhimdir. To'g'ri tashkil etilgan ovqatlanish tanani barcha zarur oziq moddalar (oqsillar, yog'lar, uglevodlar, vitaminlar va mineral tuzlar) va energiya bilan ta'minlaydi. Ushbu didaktik o'yinning maqsadi bolalarning mahsulotlar haqidagi bilimlarini rivojlantirish, qanday mahsulotlar tayyor ovqatlarning tarkibiga kirishi, atrofdagi dunyoga bo'lgan qiziqishni orttirishni o'z ichiga oladi. Bolalarni tasniflash, taqqoslash, umumlashtirish yuzasidan mashq qilishga undaydi. Kommunikativ qobiliyatlarni va izchil nutqni rivojlantirishga ko'mak beradi.
Bugun O‘zbekiston Respublikasi maktabgacha va maktab ta’limi vazirining birinchi o‘rinbosari – Maktabgacha ta’lim agentligi direktori A.Shin "Rossiya Maorif Vazirligi Akademiyasi" rektori P.Kuzmin bilan uchrashuv o'tkazdi. Uchrashuv davomida P.Kuzmin mamlakatning ijtimoiy-iqtisodiy rivojlanishida maktabgacha ta’lim tizimini rivojlantirish muhimligini ta’kidlab, O‘zbekiston Respublikasi rahbariyatining maktabgacha va maktab ta’limi sohasini takomillashtirish masalalariga e’tiborini yuqori darajada baholadi. Rossiya delegatsiyasi rahbari Rossiya Maorif Vazirligi Akademiyasining Rossiya Federatsiyasi pedagog kadrlarining malakasini oshirish bo’yicha faoliyati haqida qisqacha ma’lumot berdi. Rossiya tomoni Rossiya poytaxtining maktabgacha ta’lim tizimini rivojlantirishga qaratilgan chora-tadbirlarini amalga oshirishda Moskva shahri tajribasiga alohida e’tibor qaratdi. Xususan, O‘zbekiston tomoni Rossiyaning "Raqamli ta’lim muhiti" (“Цифровая образовательная среда”) federal loyihasi, "Men yagona davlat imtihonidan o‘taman” (“Я сдам ЕГЭ”) loyihasi, qo‘shimcha professional ta’lim raqamli tarmog‘i va ta’limiy kontentdagi raqamli kutubxona bilan tanishdi. Uchrashuv yakunida tomonlar Maktabgacha ta’lim tizimini rivojlantirishdagi Rossiya tajribasini o‘rganish, shuningdek, Rossiya ta’lim loyihalari bilan yaqindan tanishish maqsadida Maktabgacha ta’lim agentligi delegatsiyasini Moskva shahriga yuborish imkoniyatini ko‘rib chiqishga kelishib oldilar.
Ijtimoiy tarmoqlarda "Toshkent shahar Chilonzor tumanidagi 230-sonli bog‘cha direktorining 15 yoshli o‘g‘li 4 nafar qizchaga tegajog‘lik qilganligi haqida" xabarlar tarqalmoqda. Maktabgacha ta’lim agentligi tomonidan ushbu holat zudlik bilan nazoratga olindi. O‘z o‘rnida tuman ichki ishlar organlari tomonidan holat bo‘yicha sudga oid tibbiyot va psixologik ekspertizalari tayinlanib, surishtiruv ishlari olib borilayotganligi, tuman prokuraturasi alohida nazoratga olganligi hamda tekshiruv natijasi yuzasidan qo‘shimcha axborot taqdim etilishini ma’lum qilamiz.
Bugun Maktabgacha ta'lim agentligi direktorining o'rinbosari O.Rahmatillayev UNICEFning O'zbekistondagi vakillari va ta'lim sohasidagi xalqaro ekspert Tereza Gonsales xonim bilan uchrashuv o'tkazdi. Uchrashuvda tomonlar Surxondaryo viloyatida inklyuziv ta'lim, ijtimoiy xizmatlar va huquqiy yordamdan keng foydalanishni ta'minlashga qaratilgan istiqbolli loyihani amalga oshirish masalalarini muhokama qildilar. Ushbu loyiha Surxondaryo viloyati maktabgacha ta'lim tashkilotlari negizida 10 ta inklyuziv ko'p tilli maktabgacha ta'lim guruhlari, shu jumladan til va etnik jihatdan kam sonli bo'lgan bolalar uchun guruhlarning tashkil etilishini nazarda tutadi. Loyiha doirasida UNICEF ta'mirlash ishlari xarajatlarini qoplash, guruh xonalarini mebel, o'yinchoqlar, o'quv materiallari bilan jihozlash, shuningdek uslubiy yordam ko'rsatish shaklida ko'mak beradi. Eslatib o'tamiz, Tereza Gonsales xonim yaqin kunlarda Surxondaryo viloyatida ish yuzasidan tashrif buyurgan edi. Tashrif davomida u Surxondaryo viloyati maktabgacha va maktab ta'limi boshqarmasining mas'ul xodimlari, loyiha bo'yicha tanlangan maktabgacha ta'lim tashkilotlari direktorlari, metodistlari va tarbiyachilari bilan suhbatlar o'tkazish imkoniyatiga ega bo'ldi.
Janubga yo‘l olgan “Aqlvoy” avtobuslari
“Aqlvoy” mobil guruhlar faoliyati maktabgacha ta’lim sohasida jahon e’tirofiga sazovor bo‘layotgan loyiha desak, mubolag‘a bo‘lmaydi. Bugun Maktabgacha ta’lim agentligi tomonidan yurtimizning janubiy hududlari Qashqadaryo va Surxondaryo viloyatlariga ham “Aqlvoy” avtobusi yo‘l olgani bizni quvontiradi. Mobil guruhlarni tashkil etish maqsadida qayta jihozlangan ISUZU NC-40 avtobuslarida bolajonlar ta’lim olishlari uchun barcha sharoitlar muhayyo. Shubhasiz, olis va borish qiyin bo‘lgan tog‘li hududlar va qishloqlardagi bolalarga sifatli maktabgacha ta’lim olish imkoniyatini beruvchi innovatsion yechimdir. Loyiha faoliyatiga nazar solsak, u tajriba-sinov loyihasi sifatida O‘zbekiston Respublikasi Vazirlar Mahkamasining tegishli qaroriga muvofiq 2019-2020-o‘quv yilidan boshlab, mobil guruhlar bazasida maktabgacha ta’lim xizmatlarini ko‘rsatish bo‘yicha Qoraqalpog‘iston Respublikasi va viloyatlarning tumanlari (jami 16 ta) da amalga oshirildi va mobil guruhlarni “Uzavtosanoat” ko‘magi bilan zamonaviy talablarga javob beradigan va qayta jihozlangan 16 ta ISUZU NC 40 avtobuslarida tashkil etildi. Mazkur tajriba-sinov loyihasini amaliyotga joriy etish natijasida respublikamizdagi 40 ta mahallalarida 44 ta jihozlangan maydonchalar tashkil etilgan va respublikamizning eng chekka va olis hududlaridagi 1 600 nafarga yaqin maktabgacha ta’limga qatnamaydigan 3-7 yoshli bolalar qamrab olingan. Shuningdek, 2021-yilda respublikaning barcha hududlariga “Aqlvoy” mobil guruhlarni tashkil etish maqsadida qayta jihozlangan 49 ta ISUZU HC-40 avtobuslari yuborildi va 98 ta o‘yin maydonchalari qurildi va jihozlandi. Mazkur loyihaning ikkinchi bosqichida 294 ta mobil guruh tashkil etilib, unga qo‘shimcha 4 704 nafar bolalar qamrab olingan bo‘lsa, hozirda 65 ta ISUZU HC-40 avtobuslari bazasida 7 mingga yaqin 3 yoshdan 7 yoshgacha bo‘lgan bolalar qamrab olinib, 387 ta mobil guruhlari tashkil etildi va aholining 195 nafari (65 nafar haydovchi, 130 nafar tarbiyachi va tarbiyachi yordamchilari) ish bilan ta’minlandi. Bugun esa navbatdagi bosqichga ko‘ra, joriy yilning 5-may kuni Qashqadaryo viloyatining Ko‘kdala, Kitob, Dehqonobod tumanlarida 6 ta o‘yin maydonchalari (qurilib jixozlangan) tashkil etilib, 3 ta ISUZU HC-40 avtobuslari va shuningdek, Surxondaryo viloyatining Bandixon, Denov, Oltinsoy, Qumqo‘rg‘on tumanlarida 8 ta o‘yin maydonchalari (qurilib jixozlangan) tashkil etilib, 4 ta ISUZU HC-40 avtobuslari qayta jihozlanib yuborildi. Natijada, ushbu hududlarda 42 ta mobil guruhlari tashkil etilib, ularda 672 nafar maktabgacha yoshdagi bolalar maktabgacha ta’lim bilan qamrab olinadi.
“Aqlvoy” avtobusi - olis va borish qiyin bo‘lgan tog‘li hududlar va qishloqlardagi bolalarga sifatli maktabgacha ta’lim olish imkoniyatini beruvchi innovatsion yechimdir. Maʼlumot uchun, bugungi kunga qadar loyihaning 1 va 2 bosqichlari davomida 65 ta ISUZU HC-40 avtobuslari bazasida 7 mingga yaqin 3 yoshdan 7 yoshgacha bo‘lgan bolalar qamrab olinib, 387 ta mobil guruhlari tashkil etilgan edi. Loyihaning uchinchi bosqichida janub viloyatlariga yuborilgan jami 7 ta avtobuslar yana 672 nafar bolalarni qamrab olib, 42 ta mobil guruhlarni tashkil etish imkonini beradi.