2022-yil 3-26 - oktyabr kunlari Yaponiya xalqaro hamkorlik agentligi JICAning “Maktabgacha ta’limda inklyuziv ta’lim amaliyotini mustahkamlash” nomli loyihasi doirasida “Inklyuziv ta’lim tajribasini rivojlantirish” mavzusida o‘quv-trening mashg‘uloti o‘tkazilmoqda. O‘quv-trening mashg‘ulotining asosiy maqsadi - O‘zbekistonda alohida ta’lim ehtiyojlari bo‘lgan bolalarni inklyuziv ta’limga jalb qilish, ularni ijtimoiy-psixologik qo‘llab-quvvatlash, ta’lim-tarbiya berish tizimini takomillashtirish, ularga ko‘rsatiladigan ta’lim xizmatlari sifatini yaxshilash borasidagi muammolarni bartaraf etish yuzasidan Yaponiya - O‘zbekiston davlatlari o‘rtasida tajriba almashish va tavsiyalarni qabul qilishdir. O‘quv-treningda inklyuziv ta’limning nazariy va amaliy masalalari quyidagi yo‘nalishlarda tashkil etiladi: 1. Inklyuziv ta’lim falsafasi va amaliyoti/Maxsus ta’lim ehtiyojlari. 2. Nogironlik nima? 3. Qulaylik yaratish/o‘qish uchun qulay sharoit yaratish (Yaponiya misolida). 4. Alohida ta’lim ehtiyojli bolalar uchun korreksion sinf/Resursxonasi/multidistiplinar mutaxassislar komandasi. 5. O‘quv dasturini moslashtirish. 6. Ko‘rish, eshitish qobiliyatlarining buzilish xususiyatlari va o‘qitish metodikasi (Yaponiya misolida). 7. Intellektual/aqliy zaif nogironlik xususiyatlari va o‘qitish metodikasi (Yaponiya misolida). 8. Inklyuziv muhit bo‘yicha master klass. Kam ta’minlangan nogironligi bor bolalarni qo‘llab-quvvatlash. 9. Oilaviy sharoitlarini o‘rganish. 10. Individual ta’lim rejasi va ta’lim dasturini bola extiyojiga moslashtirish. 11. O‘quv-trening davomida har bir ishtirokchilarning fikr-mulohazalari, taklif va tavsiyalari bilan tanishish. O‘quv-trening ishtirokchilari bilan Yaponiya misolida O‘zbekistonda inklyuziv ta’limning rivojlantirish istiqbollari bilan bog‘liq dolzarb muammolar va ularning yechimlari bo‘yicha metodik hamda amaliy masalalarni atroflicha muhokama qilish ko‘zda tutilgan. O‘quv-trening ishtirokchilarining xulosalari asosida ular tomonidan ishlab chiqiladigan yakuniy tavsiyalar respublikamizdagi inklyuziv ta’lim yo‘nalishini zamonaviy talablar darajasida rivojlantirish yo‘lidagi alohida ahamiyatga ega bosqich bo‘lib xizmat qiladi. Maktabgacha ta’lim vazirligi Axborot xizmati
CASIE 2022: Maqsad — qishloqlar va chekka hududlarda AKT orqali soha ko‘nikmalarini rivojlantirish
YUNESKO tashkiloti Markaziy Osiyo mamlakatlarida axborot kommunikatsiya texnologiyalari bo'yicha ta'lim simpoziumining 11 yilligini nishonlash maqsadida "Markaziy Osiyoning qishloq vа chekka hududlaridagi aholi malakalarini rivojlantirishda axborot texnologiyalaridan foydalanishni rag'batlantirish" mavzusida Markaziy Osiyo simpoziumini tashkil etishni rejalashtirgan edi. Shu munosabat bilan qo’sni respublikaning Almaty shahrida (Qozog'iston) 2022-yil 6-7 oktabr kunlаri ta'limda axborot-kommunikatsiya texnologiyalari bo'yicha simpozium o'tkazilmoqda. So‘nggi o‘n yil ichida Markaziy Osiyo mamlakatlarida milliy ta’lim tizimini takomillashtirish, malaka oshirishga ustuvor ahamiyat berish, alohida ehtiyojli talabalar va o'qituvchilar uchun yaxshi muhit yaratish, elektron o‘quv materiallarini ishlab chiqish va infratuzilmani rivojlantirish hamda mustahkamlash, kasb-hunar ta'limini yanada shakllantirish kabi yo’nalishlarda ko‘plab ishlar amalga oshirildi. Simpoziumga qatnashish uchun 6 ta davlatdan 44 nafar ishtirokchi taklif etilgan bo’lib, ular qishloq va chekka hududlarda inklyuziv va sifatli ta'lim hamda hayot davomidagi ta'lim ko'nikmalarini rivojlantirishga bo'lgan ehtiyojini hal qilish bo'yicha tizim siyosati va amaliyotlarini muhokama qiladilar. Shuningdek, qatnashchilar tadbir davomida a'zo daylatlar AKTdan foydalangan holda qishloq va chekka hududlardagi bilim oluvchilar uchun ta'limni tiklash va o'zgartirishga qanday hissa qo'shishi bo'yicha qisqa rejalarni ishlab chiqishadi hamda taqdim qilishadi. Ma'lumot uсhun, 2011-yildan buуоn YUNESKO Koreya Ta'lim va Tadqiqot Axborot Xizmati (KERIS) tashkiloti bilаn hamkorlikda har yili Markaziy Osiyo mamlakatlarida axborot-kommunikatsiya texnologiyalari (АКТ) bo'yicha ta'lim simpoziumlarini tashkil etib kelmoqda. Ta'limda axborot-kommunikatsiya texnologiyalari bo'yicha Markaziy Osiyo simpoziumi (СDМЕ) Markaziy Osiyo daylatlari uсhun ta'lim sohasidagi dolzarb muаmmоlаrni birgalikda muhоkаmа qilish vа ta'lim tizimida DKTdаn samarali foydalanish orqali ulаrni hal etish yo'llarini aniqlashda asosiy рlаtformа vazifasini o'taydi Insoniyat taraqqiyotining ustuvor asosi sifatida tan olingan va qabul qilingan, noan’anaviy tarmoqlar, qishloq va chekka hududlarni rivojlantirish bilan bir qatorda iqtisodiyotni diversifikatsiya qilish bo‘yicha tegishli dastur va strategik qarorlar qabul qilishda eng muhim negiz bo’lib xizmat qilgan bo’gin ham aslida ta’lim tizimi edi. Albatta, bundan keyin ham yanada taraqqiy etgan jamiyatga olib boroladigan yo’llar faqatgina ta’lim tizimi bilan barpo etiladi. Maktabgacha ta’lim vazirligi Axborot xizmati
Bugun, 2022-yil 6-oktabr kuni Surxondaryo viloyati Sherobod tumanidagi 21-sonli davlat maktabgacha ta’lim tashkilotida favqulodda baxtsiz hodisa yuz berdi, natijada tarbiyalanuvchi I.J. (2018 yilda tug‘ilgan) vafot etdi. Qayd etilishicha, tarbiyalanuvchi I.J. tashkilot hududidagi bolalar o‘yin maydonidagi temir aylanada o‘ynagan va ehtiyotsizlik natijasida hayot uchun xavfli bo‘lgan jarohatlar olgan. O‘limning aniq sababi va vaqti aniqlanmoqda. Maktabgacha ta’lim vazirligi marhumning oila a’zolariga chuqur hamdardlik bildiradi. Ayni paytda ish prokuraturaga o‘tkazilgan, tergov harakatlari olib borilmoqda. Ehtiyotsizlik oqibatida voqea sodir bo‘lgan vaqtdagi mas’ul shaxslarga nisbatan O‘zbekiston Respublikasi qonunchiligida nazarda tutilgan choralar qo‘llaniladi. Ayni paytda mazkur baxtsiz hodisa tufayli 21-sonli davlat maktabgacha taʼlim tashkiloti direktori lavozimidan ozod etilib, viloyat Maktabgacha ta’lim boshqarmasi va tuman maktabgacha taʼlim boʻlimi rahbariyatiga nisbatan intizomiy jazo choralari qoʻllanilgan. Tarbiyachi va tarbiyachi yordamchisiga nisbatan tergov harakatlari olib borilmoqda. Maktabgacha ta’lim vazirligining mas‘ul xodimlari holatni nazoratga olgan. Maktabgacha ta’lim vaziri tomonidan bunday holatlar takrorlanmasligi hamda bolalar xavfsizligini ta’minlash maqsadida, respublikadagi barcha davlat maktabgacha ta’lim tashkilotlaridagi o‘yin maydonchalarida joylashgan xavfli temir konstruksiyalarni inventarizasiyadan o‘tkazish, ularni demontaj qilish, shuningdek, idoraviy qurilish me’yorlari va talablariga muvofiqlashtirish topshirig‘i berildi. Maktabgacha ta’lim vazirligi Axborot xizmati
O‘zbekiston Respublikasi Maktabgacha ta’lim vazirligining korrupsiya faktlariga doir murojaatlarni ko‘rib chiqish natijalari haqidagi 9 oylik H I S O B O T I. Umumiy ma’lumot O‘zbekiston Respublikasi Maktabgacha ta’lim vazirligiga korrupsiya faktlariga doir kelib tushgan murojaatlarning umumiy soni 130 tani tashkil qilib, ularning 87 tasi turli idora va tashkilotlardan hamda fuqarolardan vazirlik devonxonasi orqali hamda 43 tasi @antikorr_mdo rasmiy telegramm kanal orqali kelib tushgan. https://mf.ijro.uz/ tizimi orqali joriy yilda kelib tushgan 87 ta murojaatlarning: - 30 tasi O‘zbekiston Respublikasi Prezidenti pochtasi orqali; - 44 tasi vazirlikka yozma tarzda yuborilgan xat orqali; - 3 tasi O‘zbekiston Respublikasi Korrupsiyaga qarshi kurashish agentligi orqali; - 2 tasi O‘zbekiston Respublikasi Bosh prokuraturasi orqali; - 8 tasi boshqa tashkilot va idoralar orqali kelib tushgan. II. Ko‘rib chiqish natijalari Kelib tushgan murojaatlar amaldagi qonunchilik asosida belgilangan muddatlarda ko‘rib chiqilib, ko‘rib chiqish natijalari bo‘yicha huquqbuzarlik alomatlari aniqlangan murojaatlar qonuniy chora ko‘rish uchun huquqni muhofaza qiluvchi organlarga yuborilgan. Aybdor shaxslarga nisbatan amaldagi mehnat qonunchiligiga asosan intizomiy jazo choralari qo‘llanilishi ta’minlangan. Anonim murojaatlarni ko‘rib chiqmasdan qoldirish to‘g‘risida xulosa qilingan. Ba’zi murojaatlarni o‘rganish natijalari: @antikorr_mdo telegram kanali orqali Andijon viloyati Xo‘jaobod tumanida davlat-xususiy sheriklik asosida tashkil etilgan oilaviy shakldagi NMTT rahbari K.M. tomonidan 2022 yil 21 yanvar kuni kelib tushgan murojaatda davlat-xususiy sheriklik asosida tashkil etilgan oilaviy nodavlat maktabgacha ta’lim tashkilotlari uchun bepul yetkazib berilishi belgilangan metodik qo‘llanmalar uchun tuman maktabgacha ta’lim bo‘limi davlat-xususiy sheriklik shoʻba mudiri R.S. tomonidan pul talab qilinayotganligi ma’lum qilingan. O‘rganish davomida murojaatda ko‘rsatilgan vajlar o‘z tasdig‘ini topganligi sababli, Xo‘jaobod tuman maktabgacha ta’lim bo‘limining 2022 yil 25 yanvardagi 166-sonli buyrug‘i bilan tuman maktabgacha ta’lim bo‘limi DXSH shoʻba mudiri o‘z lavozimidan ozod etilgan hamda to‘plangan hujjatlar qonuniy chora ko‘rish uchun huquqni muhofaza qiluvchi organlarga yuborilgan. III. Minimallashtirish choralari Korrupsiya faktlariga doir kelib tushgan murojaatlardan kelib chiqib korrupsion xavf-xatarlarni minimallashtirish bo‘yicha vazirlikning @antikorr_mdo rasmiy telegramm kanali tashkil etildi va unga kelib tushadigan xabarlarni tizimli o‘rganish tashkillashtirilgan. Vazirlikning hududiy bo‘linmalarining korrupsiyaga qarshi kurashish va komplayens nazoratini amalga oshirish bo‘yicha bosh mutaxassislari tomonidan har bir hududiy bo‘linmalarning rasmiy telegramm kanali hamda ishonch telefonlari ishga tushirilib, har bir davlat maktabgacha ta’lim tashkilotlarida korrupsion hatti-harakatlar aniqlangan taqdirda murojaat qoldirishlari uchun “ishonch quti”lari tashkil etilgan. Mahalliy yo‘lovchilar tashish transportlarining saloniga korrupsion xatti-harakatlar bo‘yicha murojaat qilish imkonini beruvchi telegramm kanal va ishonch telefoni aks ettirilgan flayerlar joylashtirilgan. Mahalliy televideniye va raidokanallar orqali qisqa metrajli roliklar namoyishi hamda eshittirishlar yo‘lga qo‘yilgan. Huquqni muhofaza qiluvchi organlar xodimlari bilan hamkorlikda har xaftaning juma kunlari korrupsiyaga qashi kurashish yo‘nalishida seminar-treninglar o‘tkazilishi odat tusiga kiritilgan.
Hududlarda “Tibbiyot oyligi” o‘tkazilmoqda
Samarqandda joriy yilning 21-30 sentyabr kunlari “Tibbiyot oyligi” davomida “Maktabgacha ta’lim tashkilotlarida tarbiyalanuvchilar hayoti va sog‘ligini mustahkamlash”ga qaratilgan amaliy o‘quv seminari, viloyat maktabgacha ta’lim boshqarmasi, sog‘liqni saqlash boshqarmasi, sanitariya epidimiologik osoyishtaligi va jamoat salomatligi boshqarmalari hamda Samarqand davlat tibbiyot universiteti hamkorligida o‘tkazildi. Ushbu “Tibbiyot oyligi” davomida viloyat hududidagi jami 705 ta davlat maktabgacha ta’lim tashkilotlaridan 680 nafar tibbiyot xodimlari ishtirok etishib, seminar dasturi asosida: O‘zbekiston Respublikasi Maktabgacha ta’lim vazirligi va Sog‘liqni saqlash vazirligining 2018-yil 30-apreldagi “Maktabgacha ta’lim tashkilotlarida bolalarning hayoti va sog‘ligini muhofaza qilishni tashkil etish tartibi to‘g‘risida”gi nizomni tasdiqlash haqidagi 3012-sonli qarori ijrosi to‘g‘risida; “Maktabgacha ta’lim tashkilotlarida tarbiyalanayotgan bolalarni xavfsiz va sifatli ovqatlantirishni tashkil etishiga oid gigiyenik talablar” mavzusida; “Maktabgacha ta’lim tashkilotlarida tarbiyalanuvchilar o‘rtasida yuqumli kasalliklarni oldini olishga qaratilgan profilaktik ishlar” mavzusida; “Bolalar to‘g‘ri ovqatlanishini va ularga tibbiy yordamni ko‘rsatilishini tashkil etish uchun maktabgacha ta’lim tashkilotlarida zarur shart-sharoitlar yuzasidan 626-sonli qaror ijrosi to‘g‘risida”; “Maktabgacha ta’lim tashkilotlarida tibbiy xizmatni tashkil etish” nomli tibbiy qo‘llanmaning taqdimoti hamda “Maktabgacha ta’lim tashkilotlarida hamshiralarning bir kunlik ish faoliyati” mavzularida taqdimotlar o‘tkazilib, seminar ishtirokchilariga tushunchalar berildi. Shuningdek, MTT tibbiyot xodimlari, seminarda ishtirok etgan mutaxassislardan ish faoliyatlari davomida kerakli bo‘lgan ma’lumotlarni savol-javoblar orqali olishdi. Eslatib o‘tamiz, so‘nggi paytlarda maktabgacha ta’lim tashkilotlarida kuzatilayotgan noxush holatlar yuzasidan Maktabgacha ta’lim vaziri tomonidan kengaytirilgan yig‘ilish o‘tkazilib, unda: - joylardagi tibbiyot kollejlari va texnikumlarda maktabgacha ta’lim tashkilotlarida tibbiyot xodimlari uchun shoshilinch holatlarda birinchi tibbiy yordam ko‘rsatish bo‘yicha o‘quv seminarlarini tashkil etish; - maktabgacha ta’lim tashkilotlarida pedagog xodimlar uchun shoshilinch holatlarda birinchi tibbiy yordam ko‘rsatish bo‘yicha o‘quv seminarlarni tashkil etish; - tarbiyalanuvchilarni ommaviy tibbiy ko‘rikdan o‘tkazish kabi dolzarb masalalar muhokama qilingan edi. Maktabgacha ta’lim tizimida respublika bo‘ylab “Tibbiyot oyligi” davom etmoqda. Maktabgacha ta’lim vazirligi Axborot xizmati
“Elektron tijorat to‘g‘risida”gi Qonunning(O‘RQ–792-son, 29.09.2022-y.) mohiyati va ahamiyati haqida
Joriy yilning 29-sentabrida “Elektron tijorat to‘g‘risida”gi O‘RQ–792-son Qonun Prezident tomonidan imzolandi Qonunga ko‘ra, Axborot texnologiyalari va kommunikatsiyalarini rivojlantirish vazirligi elektron tijorat sohasidagi vakolatli davlat organi hisoblanadi. Elektron tijoratda sotuvchi, xizmatlarni yetkazib beruvchi yoki ishlarni bajaruvchi sifatida ishtirok etuvchi yuridik yoki jismoniy shaxslar shuningdek elektron tijoratda tovarlarning xaridori, isteʼmolchisi sifatida ishtirok etuvchi yuridik yoki jismoniy shaxslar elektron tijorat ishtirokchilaridir. Sotuvchi elektron tijoratni davlat roʻyxatidan oʻtkazilgan paytdan faoliyatini amalga oshirish huquqiga ega. Xaridor quyidagi huquqlarga ega: - shartnomalar tuzish orqali tovarlarni sotib olish; - tovarlar, ishlab chiqaruvchi va tovarlarni sotib olishning boshqa shartlari toʻgʻrisida toʻliq axborot olish; - elektron tijorat sohasida amalga oshiriladigan operatsiyalarda ishtirok etish uchun shartlarning tengligini talab qilish; - oʻz huquqlari va qonuniy manfaatlari himoya qilinishini talab qilish. Xaridor: - shartnoma tuzish toʻgʻrisidagi taklif qabul qilinganidan keyin shartnoma tuzish uchun zarur boʻlgan hujjatlarni va maʼlumotlarni taqdim etishi; - toʻlov tizimlari operatorlariga toʻlovlarni amalga oshirish uchun zarur boʻlgan axborotni qonunchilikka muvofiq taqdim etishi shart. Xaridor qonunchilikka hamda shartnomaga muvofiq boshqa huquqlarga ega boʻlishi va uning zimmasida oʻzga majburiyatlar ham boʻlishi mumkin. Elektron tijorat operatorlari jumlasiga quyidagilar kiradi: - telekommunikatsiya tarmoqlari operatorlari va provayderlari; - elektron savdo maydonchalari operatorlari; - toʻlovga oid xizmatlarni yetkazib beruvchilar; - elektron tijorat subyektlarining elektron hujjatlarini va elektron xabarlarini saqlash boʻyicha xizmatlar koʻrsatuvchi yuridik shaxslar. Elektron tijoratda shartnoma taraflar oʻrtasida shartnomaning shartlarini elektron hujjatlar va (yoki) xabarlarni tasdiqlash yoʻli bilan kelishish orqali elektron hujjat shaklida rasmiylashtiriladi. Elektron tijoratda hujjatlarni shakllantirish taraflarning kelishuviga koʻra amalga oshiriladi. Elektron tijorat operatorlariga yoki sotuvchilariga shartnoma taraflarini identifikatsiya qilish imkonini beradigan, tovarlarni (ishlarni, xizmatlarni) realizatsiya qilish chogʻida axborot tizimlari orqali shakllantirilgan elektron tarzdagi cheklar, kvitansiyalar, xabarlar va boshqa hujjatlar tovarlar (ishlar, xizmatlar) sotib olinganligini tasdiqlaydigan qogʻozdagi shunga oʻxshash hujjatlarga tenglashtiriladi. Elektron tijoratdagi hujjatda hujjatni imzolagan shaxsning roziligini ifodalaydigan hamda uni identifikatsiya va autentifikatsiya qilish imkonini beradigan elektron tasdiqlash usullari (“SMS”, “Face-ID” va boshqalar) ham imzo sifatida tan olinadi. Elektron tijoratdagi elektron hujjatlar, shuningdek elektron shaklda qayd etilgan, oʻz yuboruvchisini identifikatsiya qilish imkonini beradigan axborot qogʻozda rasmiylashtirilgan va oʻz qoʻli bilan imzolangan hujjatlarga tenglashtiriladi hamda ulardan shartnoma tuzilganligining dalili sifatida foydalanilishi mumkin. Shartnoma faqat axborot tizimlaridan foydalanilgan holda tuzilganligiga asoslanib, haqiqiy emas deb topilishi mumkin emas. Elektron tijorat sohasida toʻlovlar quyidagi usullar bilan amalga oshiriladi: - naqd pul mablagʻlari bilan – naqd pul mablagʻlari toʻlov vositasi tarzida virtual terminallar (“E-POS”) orqali qabul qilinganligini tasdiqlaydigan hujjatlarni hamda sotuvchi va sotilgan tovarlar (ishlar, xizmatlar) toʻgʻrisidagi axborotni oʻzida aks ettiradigan hujjatlarni xaridorga taqdim etish orqali; - pul mablagʻlarini bank hisobvaragʻidan oʻtkazish orqali – pul mablagʻlarini bank hisobvaragʻidan (shu jumladan bank kartalarining hisobvaragʻidan) oʻtkazish vositasida, shu jumladan shaxsiy kabinet (masofadan xizmat koʻrsatish tizimi) orqali yoki toʻlov tashkilotining tizimi orqali oʻtkazish vositasida; - elektron pullardan foydalangan holda – elektron pullar tizimida ochilgan elektron hamyondagi pul mablagʻlarini oʻtkazish vositasida. Qonun rasmiy eʼlon qilingan kundan uch oy oʻtgach kuchga kiradi.
Sirdaryoda “Zukko Bolajon” fotoalbomi taqdimoti bo‘lib o‘tdi
“Ma’naviyat festivali” karvoni bu safar Sirdaryo viloyatiga safar qildi. Guliston shahri 17-sonli MTMda “Yangi O‘zbekiston – inson qadri ulug‘langan yurt” shiori ostida o‘tkaziligan tadbirda “Zukko Bolajon” fotoalbomining taqdimoti ham bo‘lib o‘tdi. “Ma’naviyat festivali”da O‘zbekiston xalq artistlari, ziyolilar, olimlar, “Ma’rifat” targ‘ibotchilar jamiyati a’zolari ham qatnashib, bog‘cha tarbiyachilariga o‘zgacha kayfiyat berishmoqda. Jumladan, Sirdaryodagi “Manaviyat festivali”da O‘zbekiston xalq artistlari Gavhar Zokirova, Dilorom Karimova hamda Aziz Rajabiy bolajonlar uchun o‘z ijodidan namunalar ijro etishdi. Tarbiyalanuvchilar esa “Go‘zal O‘zbekistonim”, “Mard yigitlar o‘ynasin”, “Olti xolfa” raqslarini ijro etib, tadbirni bayramga aylantirishdi. Fotoalbom taqdimoti davomida Sirdaryo viloyatining o‘ziga xos urf-odatlari, qadriyatlari aks etgan burchaklar, bolajonlar uchun faoliyat yuritayotgan kulolchilik ustaxonasi, qo‘g‘irchoq teatri ijrosi barchaga birdek manzur bo‘ldi. Ma’lumot uchun “Zukko Bolajon” fotoalbomi Respublika Ma’naviyat va ma’rifat markazi, O‘zbekiston Respublikasi maktabgacha ta’lim vazirligi, "Ma’rifat" targ‘ibotchilar jamiyati hamda Oliy majlis huzuridagi jamoat fondi hamkorligida chop qilingan. Albom mamlakatimizdagi 17 nafar fan arboblari, adabiyot, san’at, madaniyat namoyandalari, olimlar, shoir-yozuvchilar va sportchilar tomonidan ma’naviy-axloqiy tarbiyani rivojlantirishga hissa qo‘shadigan xulosalar asosida to‘ldirilib, 100 dan ortiq lavhalar bilan boyitilgan. “Zukko Bolajon” fotoalbomi taqdimoti bungacha Toshkent shahar hamda Samarqand, Surxondaryo viloyatlarida ham o‘tkazilgan.
Bugun Maktabgacha taʼlim vazirligi binosida “Maktabgacha taʼlim vazirligining 2022 yil I yarim yilligida amalga oshirilgan ishlar haqida hisoboti” yuzasidan Jamoatchilik kengashi va OAV uchun matbuot anjumani oʻtkazildi. Unda vazirlik huzuridagi Jamoatchilik kengashi a'zolari ham ishtirok etishdi. Unda 2022-yil I yarim yilligida amlaga oshirilgan ishlar haqida hisoboti” mavzusidagi matbuot anjumanida erishilgan ijobiy koʻrsatkichlar haqida hisobot berildi, ular quyidagilar: 2022-yilning birinchi yarmida Maktabgacha taʼlim vazirligi tashabbusi bilan jami 5 ta normativ-huquqiy hujjatlar tasdiqlandi. Bugungi kunga qadar Oʻzbekiston Respublikasi Prezidentining hududlarga tashriflari hamda sohalarni rivojlantirish boʻyicha oʻtkazilgan majlislar bayonlarida yuklatilgan jami 412 ta topshiriqdan 362 tasi bajarildi, 50 tasi belgilangan muddatda bajarish choralari koʻrilmoqda. Qabul qilingan hujjatlarga muvofiq maktabgacha taʼlim tashkilotlari soni28 012 taga yetkazildi. 3-7 yoshli bolalarning maktabgacha taʼlim bilan qamrab olish darajasi koʻrsatkich 69,4 foizga va 6 yoshli bolalarning maktabga tayyorlov tizimi bilan qamrovi 84 foizga yetkazildi. 5 060 quvvatga ega 46 ta davlat-xususiy sheriklik asosidagi hamda 11 970 quvvatga ega 342 ta oilaviy shakldagi nodavlat maktabgacha taʼlim tashkilotlari faoliyati yoʻlga qoʻyildi. Namangan va Qoʻqon shaharlarida tajriba-sinov tariqasida 1 400 nafardan ortiq maktabgacha taʼlim tashkilotlari rahbar va pedagog kadrlari malakasini oshirish boʻyicha maktabgacha taʼlim klasterlari faoliyatini tashkil etildi. Subsidiya va kompensatsiyalarni ajratish jarayonini raqamlashtirish, bunda inson va korrupsion omillarini yoʻqotish maqsadida “Nodavlat maktabgacha taʼlim tashkilotlarini boshqarish” axborot tizimi tajriba sinovdan oʻtkazildi. 28 245 nafar Pedagogika kollejlari bitiruvchilaridan 21 915 nafari ish bilan taʼminlandi. Shu bilan birgalikda matbuot anjumanida mavjud muammolar va ularning yechimi boʻyicha vazifalar ham quyidagicha maʼlum qilindi. Muammolar Maktabgacha taʼlimning nodavlat sektorini qoʻllab-quvvatlash maqsadida Davlat byudjetidan ajratilayotgan subsidiya va kompensatsiyalar samarali va maqsadli ishlatilmayapti. Jizzax, Qashqadaryo va Samarqand viloyatlaridagi byudjetdan subsidiyalar ajratilishida7,4 mlrd soʻm miqdoridagi kamchiliklar aniqlandi. Mazkur jarayonlar toʻliq raqamlashtirilmagan. Respublikaning 41 ta tuman (shahar) larida qamrov darajasi 60 foizdan past. Jumladan, Chiroqchi (32,8%), Qamashi (41,5%), Kitob (41%), Yangiyoʻl (45,3%) va Denov (44,9%) tumanlarida qamrov darajasi past boʻlib qolmoqda. Maktabgacha taʼlim tizimidagi pedagoglarning 34,5 foizi oliy maʼlumotga ega ekanligi taʼlim sifatiga salbiy taʼsir qilmoqda. Bu koʻrsatkich Toshkent viloyatida24,6 foizi, Sirdaryo viloyatida 26,4 foizi va Namangan viloyatida 27,8 foizi tashkil etadi. Vazifalar Vazirlar Mahkamasining nodavlat maktabgacha taʼlim tashkilotlariga subsidiyalar va kompensatsiyalar toʻlash tartibini belgilash yuzasidan normativ-huquqiy hujjat loyihasini ishlab chiqish. Nodavlat xususiy sektorni qoʻllab quvvatlash maqsadida zarur kredit va subsidiyalarni ajratish choralarini koʻrish. Oliy taʼlim muassasalarining 8 814 nafar maktabgacha taʼlim yoʻnalishi bitiruvchilarini maktabgacha taʼlim tashkilotlariga ishga yoʻllanma asosida yuborish choralarini koʻrish.
O‘zbekiston Respublikasi Maktabgacha ta’lim vazirligi huzuridagi Jamoatchilik Kengashining 2022 yil II yarim yilligi uchun mo‘ljallangan ISH REJASI
O‘zbekiston Respublikasi Maktabgacha ta’lim vazirligi huzuridagi Jamoatchilik kengashi tarkibi
1